កោះកុង ៖ សមត្ថកិច្ចការិយាល័យព្រហ្មទណ្ឌកំរិតធ្ងន់ នៃស្នងការដ្ឋាននគរបាលខេត្តកោះកុងបានបញ្ចូនជនសង្ស័យដែលបានប្រព្រឹត្តិអំពើឃាតកម្មនៅស្រុកគិរីសាគរ ទៅសាលាដំបូងខេត្ត កាលពីវេលាម៉ោង៩.០០នាទីព្រឹក នាថ្ងៃទី ១៣ ខែតុលា ឆ្នាំ២០១៥ ។
ជនសង្ស័យឈ្មោះ មួង រដ្ឋា ភេទប្រុស ជាកម្មករទូកនេសាទ ហើយត្រូវបានសមត្ថកិច្ចស្រុកគិរីសាគរ ឃាត់ខ្លួនកាលពីយប់ថ្ងៃទី១១បន្ទាប់ពីជនសង្ស័យ បានយកកាំបិតចាក់ទៅលើជនរងគ្រោះ នៅក្នុងបរិវេណវត្តកោះកែវមរកត ស្ថិតក្នុងភូមិកោះស្តេច ឃុំកោះស្តេច ស្រុកគិរីសាគរ ខេត្តកោះកុង ។
បើតាមសមត្ថកិច្ចបានអោយដឹងថា យោងទៅតាមចម្លើយសារភាពរបស់ជនសង្ស័យបានអោយដឹងថា កាលពីយប់ថ្ងៃទី១០ ខែតុលា ខ្លួនបានផឹកស៊ីជាមួយឈ្មោះ សាំង វាសនា និង ឈ្មោះ ផន សុខុម នៅតូប អ៊ី មុំ ស្រាបៀរអស់ចំនួនមួយកេះ ជនរងគ្រោះឈ្មោះ ផន សុខុម បានមាត់ឡូឡាខ្លាំងៗ ហើយជនសង្ស័យឈ្មោះ មួង រដ្ឋា បានឃាត់កុំអោយឡូឡាខ្មាស់គេ ពេលនោះជនរងគ្រោះមិនព្រមស្តាប់ ក៏បានជជែកគ្នាជាមួយនិងជនសង្ស័យខ្លាំងៗ រហូតផ្អើលដល់សមត្ថកិច្ចមកឃាត់ពួកគេក៏បានបែកគ្នាទៅ ។ នៅថ្ងៃបន្ទាប់ ជនសង្ស័យបានមកលែងវត្តដដែលដោយបានដាក់កាំបិតដងខ្មៅមកជាមួយ ដើម្បីការពារខ្លួន ពេលមកដល់វត្តជនសង្ស័យបំរុងចូលទៅផឹកស្រាបៀរនៅតូបដដែលតែដោយឃើញជនរងគ្រោះអង្គុយផឹកនៅទីនោះមុន ជនសង្ស័យក៏បានទៅអង្គុយផឹកនៅតូបក្បែរនោះ ពេលដែលជនរងគ្រោះឈ្មោះផន សុខុម ដើរទៅបត់ជើងតូចនៅកន្លែងស្ងាត់ឈ្មោះ មួង រដ្ឋា ដែលជាជនសង្ស័យក៏បានតាមពីក្រោយហើយកេះស្មាជនរងគ្រោះសួរថា បងស្គាល់ខ្ញុំដែរអត់ ជនរងគ្រោះមិនទាន់ឆ្លើយផង ជនសង្ស័យក៏បានចាក់មួយកាំបិតចាំស្មាខាងឆ្វេង ហើយរត់ទៅពួននៅផ្ទះឈ្មោះ ម៉ូវ មួយ ហៅតាម៉ៅ ។ មួយសន្ទុះក្រោយមក ខ្លួនបានដើរចេញពីផ្ទះតាម៉ៅ បំរុងទៅដេក ក៏ត្រូវបានសមត្ថកិច្ចចាប់បានតែម្តង ហើយកសាងសំណុំរឿងបញ្ជូនទៅសាលាដំបូងខេត្តតាមនីតិវិធី ៕
