(ខេត្តកំពត)៖ នៅព្រឹកថ្ងៃទី ០៧ ខែមីនា ឆ្នាំ២០១៩ រដ្ឋបាលខេត្តកំពត បានរៀបចំមិទ្ទិញអបអរសាទរខួបលើកទី ១០៨ ទិវាអន្តរជាតិនារី ០៨មីនា ឆ្នាំ២០១៩ ក្រោមប្រធានបទ ” លើកកម្ពស់សមភាពយេនឌ័រ និងការគាំពារសង្គម ដើម្បីអភិវឌ្ឍន៍ធនធានមនុស្ស” ក្រោមអធិបតីភាព លោក ជាវ តាយ អភិបាលនៃគណ:អភិបាលខេត្តកំពត និងលោកស្រី ព្រមទាំង លោក អ៉ឹង ម៉េងហួរ ប្រធានក្រុមប្រឹក្សាខេត្ត និងលោកស្រី។
មានប្រសាសន៍ សំណេះសំណាល ក្នុងឱកាសនោះ លោក ជាវ តាយ បានលើកឡើងថា ការប្រារព្ធទិវាអន្តរជាតិនារី ៨មីនា នេះគឺ ដើម្បីរំលឹកវីរភាព នៃការតស៊ូរបស់នារីទូទាំងសកលលោក ក្នុងការទាមទារឲ្យមានការលើកកម្ពស់សិទ្ធិសេរីភាពប្រជាធិបតេយ្យ និងការអនុវត្តសិទ្ធស្មើរភាពរវាងបុរស និងស្ត្រី។
ជាមួយគ្នានេះ លោកអភិបាលខេត្ត បានសំណូមពរឲ្យកូនចៅ អាណាព្យាបាលទាំងអស់លើកកម្ពស់សីលធម៌សង្គម វប្បធម៌អហិង្សា នៅក្នុងគ្រួសារ និងសង្គម តាមរយៈការអប់រំទូន្មានប្រៀនប្រដៅ ដោយរៀបចំខ្លួនឲ្យក្លាយជាកូនល្អ សិស្សល្អ ពលរដ្ឋល្អ ជៀសឆ្ងាយពីគ្រឿងញៀន គ្រឿងស្រវឹង អំពើហិង្សា ដោយប្រកាន់ខ្ជាប់ខ្ជួននូវសីលធម៌ សុជីវធម៌ និងអនុវត្តគោលនយោបាយភូមិឃុំមានសុវត្ថិភាពឲ្យមានប្រសិទ្ធភាព។
សូមបញ្ជាក់ថា៖ សមាសភាពអញ្ជើញចូលរួមក្នុងពិធីនោះរួមមាន លោក លោកស្រីជាសមាជិក ក្រុមប្រឹក្សាខេត្ត លោក លោកស្រី ជាអភិបាលរងខេត្ត សាលាដំបូងខេត្ត នាយក នាយករងរដ្ឋបាល អង្គភាពចំណុះសាលាខេត្ត មន្ទីរអង្គភាពជុំវិញខេត្តសរុបចំនួន ១៤០០នាក់។
ក្នុងនោះដែរ ក៏មានការចូលរួមថវិកា ពីរដ្ឋបាលខេត្ត រដ្ឋបាលក្រុងស្រុក មន្ទីរអង្គភាពជុំវិញខេត្ត កងម្លាំងគ្រប់ប្រភេទ បានឧបត្ថម្ភដល់សមាជិសមាជិកា ជាស្ត្រី ចំនួន ១.២៥៧នាក់ ក្នុងម្នាក់ៗទទួលបានថវិកា ៥ម៉ឺនរៀល សរុប ៦២.៨៥០.០០០រៀល៕ សេង ណារិទ្ធ
