(ខេត្តកំពត) ៖ ដោយសារអស់ជម្រើស បន្ទាប់ពីប្រើវិធានផ្សព្វផ្សាយអប់រំ និងជូនដំណឹងជាញឹកញាប់ ពាក់ព័ន្ធនឹងការបំពានកាន់កាប់ទ្រព្យសម្បត្តិសាធារណៈរបស់រដ្ឋ កាលពីព្រឹកថ្ងៃទី០៤ ខែមីនា ឆ្នាំ២០១៩ អាជ្ញាធរក្រុងកំពតបានឈានដល់ដំណាក់កាលប្រើធម៌ក្តៅដោយចុះរុះរើសំណង់រឹងលើផ្ទៃព្រែកស្ថិតក្នុងភូមិអណ្តូងខ្មែរ សង្កាត់អណ្តូងខ្មែរ ក្រុងកំពត បំណងទប់ស្កាត់កុំឱ្យបទល្មើសកើតមានបន្តទៀត និងដើម្បីសោភ័ណភាពផងដែរ។
លោក លាង រឿនសុធី អភិបាលក្រុងកំពត បានបានប្រាប់ឱ្យដឹងថា កន្លងទៅអាជ្ញាធរក្រុងបានណែនាំដល់មេភូមិ ចៅសង្កាត់ឱ្យជម្រាបម្ចាស់សំណង់បញ្ឈប់សកម្មភាពសាងសង់ល្មើសច្បាប់ និងបំពានដីចំណីព្រែក។ ជាមួយនេះ ក្រុងក៏បានធ្វើសេចក្តីជូនដំណឹងពីរបីលើករួចមកហើយដែរ ប៉ុន្តែពួកគាត់ហាក់ដូចជាមិនស្តាប់សោះ។
ជាទូទៅដីចំណីព្រែកមានប្រវែង៣០ម៉ែត្រ តែសំណង់ទាំងនេះគឺស្ថិតនៅក្នុងចំណីព្រែកតែម្តង។ ទោះជាបែបនោះក្តី អាជ្ញាធរបានណែនាំពួកគាត់កុំឱ្យរំលោភបំពានតទៅទៀត តែការលួចសាងសង់បន្តកើតមានរហូតដល់ផ្ទៃព្រែកដូចឃើញជាក់ស្តែងស្រាប់ហើយ។ លោកអភិបាលក្រុងបានបន្តថា ផ្អែកតាមខ្លឹមសារនៃកិច្ចប្រជុំ គណៈបញ្ជាការឯកភាពរដ្ឋបាលខេត្តនាពេលថ្មីៗកន្លងទៅ ការមករុះរើនៅថ្ងៃនេះជាគំរូមួយដើម្បីផ្ញើសារដល់បងប្អូនម្ចាស់សំណង់អនាធិបតេយ្យទាំងអស់ ហើយអាជ្ញាធរនឹងបន្តធ្វើនៅគ្រប់កន្លែង។ ដូច្នេះ សូមបងប្អូនមេត្តារុះរើដោយខ្លួនឯង ជៀសវាងពេលសមត្ថកិច្ចចម្រុះចុះមកចាត់ការនាំឱ្យខាតបង់។ បងប្អូនត្រូវយល់ថា នេះអាជ្ញាធរមិនទាន់ដាក់បណ្តឹងទៅតុលាការផងទេ។ បើឈានដល់ដំណាក់កាលប្តឹងផ្តល់នោះ បងប្អូនត្រូវប្រឈមនឹងការជាប់ទោសទណ្ឌគេចមិនផុតឡើយ។
ទាក់ទិននឹងចំណាត់ការខាងលើ លោក មន ទិត្យ អាយុ៤២ឆ្នាំ ពលរដ្ឋរស់នៅភូមិអណ្តូងខ្មែរ សង្កាត់អណ្តូងខ្មែរ ក្រុងកំពត ក្បែរទីតាំងរុះរើសំណង់ បានរៀបរាប់ថា ពេលឃើញអាជ្ញាធរចុះមករុះរើបែបនេះ លោកមានការសោកស្តាយណាស់ព្រោះលុយកាក់មិនងាយរកបានទេ។
តាមពិតប្រជាជនមិនសូវដឹងទេ ដូច្នេះចង់ឱ្យអាជ្ញាធរមកកំណត់ថាអាចធ្វើត្រឹមណាបាន ជៀសវាងពេល ធ្វើហើយបែរជារដ្ឋចុះមកវាយចោលវិញនាំឱ្យខាតអសារបង់ទទេនោះ។ ពលរដ្ឋដដែលបានបន្តថា ពិតណាស់ ការមកវាយ ឬរុះរើនេះគឺអាជ្ញាធរចង់ឱ្យនៅតាមបណ្តោយព្រែកស្អាត ហើយក្នុងនាមប្រជាពលរដ្ឋលោកក៏ត្រូវការសោភ័ណភាពក្រុងស្រស់ ស្អាតដែរ។ ប៉ុន្តែបើរុះរើសូមឱ្យធ្វើចំពោះអ្នករំលោភបំពានទាំងអស់គ្នា ដើម្បីឱ្យផ្នែកខាងក្រោយផ្ទះមានខឿនស្មើគ្នា។
សូមបញ្ជាក់ថា កន្លងមកសំណង់ដែលប្រជាពលរដ្ឋសង់បំពានរំលោភចូលចំណីព្រែកយ៉ាងរឹងមាំនោះ គឺខាងអាជ្ញាធរក្រុងបានចុះទៅហាមប្រាមជាញឹកញាប់ណាស់ ប៉ុន្តែនៅពេលសមត្ថកិច្ចនិងអាជ្ញាធរវិលត្រឡប់ទៅវិញ ប្រជាពលរដ្ឋមួយចំនួននៅតែលួចសង់ជាបន្តបន្ទាប់ លុះពេលអភិបាលក្រុងកំពតបើកយុទ្ធនាការ និងប្រើធម៌ក្តៅ ទើបធ្វើឱ្យពលរដ្ឋខ្លះមានការសោកស្តាយស្ទើយំលែងចេញ៕
សេង ណារិទ្ធ
