(បន្ទាយមានជ័យ)៖ លោកបណ្ឌិត មាស ច័ន្ទរិទ្ធ ទីប្រឹក្សាសម្ដេចតេជោ ហ៊ុន សែន ប្រធានគណបក្សប្រជាជនកម្ពុជា និងជាសមាជិកក្រុមការងារ សម្រាប់សហការកសាងសមាជិក គណបក្សនៅមូលដ្ឋានខេត្តព្រៃវែង និងក្រុមការងារ នៅថ្ងៃទី៥ ខែតុលា ឆ្នាំ២០២៥ បានចុះសួរសុខទុក្ខ និងនាំអំណោយជូនដល់វីរកងទ័ពជួរមុខ និងប្រជាពលរដ្ឋនៅភូមិចក់ពួក ឃុំស្លក្រាម ស្រុកស្វាយចេក ខេត្តបន្ទាយមានជ័យ។
លោកបណ្ឌិត មាស ច័ន្ទរិទ្ធ បានថ្លែងថា ក្នុងនាមលោក បណ្ឌិត ស្បោង សារ៉ាត ប្រធានគណៈកម្មាធិការគណបក្សប្រជាជនកម្ពុជាខេត្តព្រៃវែង សូមកោតសរសើរ និងថ្លែងអំណរគុណ យ៉ាងជ្រាលជ្រៅចំពោះកងទ័ព និងប្រជាពលរដ្ឋ ដែលបានបំពេញបេសកកម្មដោយស្មោះត្រង់ និងការលះបង់ដើម្បីការពារបូរណភាពទឹកដី និងសន្តិសុខជាតិ។
លោកថា ការចុះសួរសុខទុក្ខនេះ តំណាងឱ្យការផ្សារភ្ជាប់សាមគ្គីភាព និងការគាំទ្ររវាងសមរភូមិមុខ និងសមរភូមិក្រោយ ដើម្បីបន្តការពារប្រទេសជាតិ ពីការគំរាមកំហែងគ្រប់បែបយ៉ាងសត្រូវឈ្លានពាន។
លោកបណ្ឌិតបានបញ្ជាក់ថា ការចុះសួរសុខទុក្ខនេះ គឺជាសញ្ញានៃសាមគ្គីភាព និងការគោរពដល់កងទ័ព ដែលបានបំពេញបេសកកម្មដោយស្មោះត្រង់ ដើម្បីការពារប្រទេសជាតិ និងសន្តិសុខរបស់ប្រជាជនកម្ពុជា។
សូមបញ្ជាក់ថា អំណោយរួមមានក្រមា និងថវិកាមួយចំនួន ដើម្បីលើកទឹកចិត្ត និងគាំទ្រកងទ័ព និងប្រជាពលរដ្ឋ ដែលកំពុងបំពេញបេសកកម្មការពារបូរណភាពទឹកដីជាតិផងដែរ៕
