(ខេត្តកំពត)៖ ជនសង្ស័យដែលកំពុងជួញដូរ និងប្រើប្រាស់គ្រឿងញៀន២នាក់ត្រូវបានសមត្ថកិច្ចជំនាញនៃស្នងការដ្ឋាននគរបាលខេត្តកំពត សហការជាមួយកម្លាំងអធិការដ្ឋាននគរបាលស្រុកទឹកឈូ ចេញប្រតិបតិ្តការបង្ក្រាបបានភ្លាមៗ។ជាមួយនេះ សមត្ថកិច្ចក៏បានដកហូតនូវវត្ថុតាងថ្នាំញៀនចំនួន៣កញ្ចប់ ក្នុងនោះមាន១កញ្ចប់ធំផងដែរ។
ការបង្ក្រាបឈានទៅឃាត់ខ្លួនជនពាក់ព័ន្ធគ្រឿងញៀនខាងលើ កាលពីវេលាម៉ោង១៥និង០៥នាទី រសៀល ថ្ងៃទី២១ ខែកុម្ភៈ ឆ្នាំ២០១៩ ត្រង់ចំណុចភូមិកែបថ្មី ឃុំបឹងទូក ស្រុកទឹកឈូ ខេត្តកំពត។
សមត្ថកិច្ចបានប្រាប់ឲ្យដឹងថា ជនសង្ស័យទាំង២នាក់រួមមាន៖ ១/-ឈ្មោះ អឿន សម្បតិ្ត ភេទប្រុស អាយុ២៨ឆ្នាំ មានទីលំនៅភូមិទួលគោក សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ។ ២/-ឈ្មោះ កេត សំណាង (ហៅ ម៉ូម) ភេទប្រុស អាយុ៣៥ឆ្នាំ រស់នៅភូមិត្រពាំងរពៅ ឃុំព្រែកត្នោត ស្រុកទឹកឈូ ខេត្តកំពត។
បច្ចុប្បន្ន ជនសង្ស័យ រួមជាមួយវត្ថុតាង សមត្ថកិច្ចបាននិងកំពុងកសាងសំណុំរឿងអនុវត្តតាមនីតិវិធីច្បាប់៕
សេង ណារិទ្ធ
