ប៉ៃលិន ៖ ការចុះត្រួតពិនិត្យប្រព័ន្ធលូនេះ បានធ្វើឡើងរយៈពេល ២ថ្ងៃ គឺនៅថ្ងៃទី ១ និងថ្ងៃទី ២ ខែតុលា ឆ្នាំ២០១៥ ហើយនៅថ្ងៃទី ២ នោះ ឯកឧត្តម កើត សុធា អភិបាលខេត្តប៉ៃលិន បានដាក់បទបញ្ជាឱ្យលោក ឌឹន គឹម ប្រធានមន្ទីរសាធារណការ និងដឹកជញ្ជូនសហការជាមួយមន្ត្រីជំនាញពាក់ព័ន្ធដាក់គ្រឿងចក្រស្តារកាយកាកសំណល់ ក្នុងប្រព័ន្ធលូដើម្បីរំដោះទឹកភ្លៀងដែលបានជន់លិចលង់ចំណតរថយន្តថ្មីក្រុងប៉ៃលិនឱ្យបានល្អប្រសើរឡើងវិញ ។
ឯកឧត្តម កើត សុធា អភិបាលខេត្ត ខណៈពេលដែលចុះពិនិត្យមើលប្រព័ន្ធលូរំដោះ ទឹកភ្លៀងដែលលិចលង់នៅ ចំណតរថយន្តថ្មីក្រុងប៉ៃលិននេះមានប្រសាសន៍ថា ការស្តារកាកសំណល់ចេញពីប្រព័ន្ធលូមិនត្រឹមតែរំដោះទឹកកុំឱ្យ លិចលង់នៅចំណតរថយន្តថ្មីក្រុងប៉ៃលិនប៉ុណ្ណោះទេ តែបានធ្វើឱ្យឈប់មានការលិចលង់ដល់ផ្ទះប្រជាពលរដ្ឋមួយចំនួន នៅជិតចំណតរថយន្តថ្មីក្នុងក្រុងប៉ៃលិននេះថែមទៀត ។
ដោយឡែកលោក ឌឹន គឹម ប្រធានមន្ទីរសាធារណការ និងដឹកជញ្ជូនបានឱ្យដឹងដែរថា បន្ទាប់ពីបានទទួលបញ្ជាពី ឯកឧត្តម អភិបាលខេត្តរួចមក លោកក៏បានដាក់កម្លាំងកម្មករ និងគ្រឿងចក្រធ្វើសកម្មភាពស្តារកាយប្រព័ន្ធលូ ដើម្បីរំដោះទឹកកុំឱ្យមានការលិចលង់នៅចំណុចចំណតរថយន្តថ្មីក្រុងប៉ៃលិន ដែលស្ថិតនៅក្នុងភូមិតាពុកលើ តាមបណ្តោយផ្លូវជាតិលេខ ៥៧ មុខចំណតរថយន្តថ្មី ដែលលូមានប្រវែងបណ្តោយ ១២ ម៉ែត្រ ពោរពេញទៅដោយ កាកសំណល់កកស្ទះ ។ បន្ទាប់ពីសកម្មភាពចុះពិនិត្យ និងកាយប្រព័ន្ធលូនៅចំណុចខាងលើ ឯកឧត្តម អភិបាលខេត្ត និងមន្ត្រីមន្ទីរពាក់ព័ន្ធនេះ បងប្អូនប្រជាពលរដ្ឋដែលរស់នៅទីនោះ បានថ្លែងអំណរគុណដល់ ឯកឧត្តម កើត សុធា អភិបាលខេត្តប៉ៃលិន និងលោកប្រធាន ឌឹន គឹម ប្រធានមន្ទីរសាធារណការ និងដឹកជញ្ជូនខេត្ត ព្រមទាំងមន្ត្រីរាជការ មួយចំនួនទៀត ដែលបានធ្វើឱ្យប្រសើរឡើងនូវបរិស្ថាន ដើម្បីសុខភាពបងប្អូនប្រជាពលរដ្ឋទូទៅ ។/
