(ខេត្តកំពត)៖ សំរាមនិងកាកសំណល់ជាច្រើនដែលគេតែងតែលួចយកទៅប្លុងចោលនៅតាមទីសាធារណៈ ពិសេសតាមដងផ្លូវជាតិលេខ៣៣-៣១ ស្ថិតក្នុងភូមិសាស្ត្រស្រុកកំពង់ត្រាច ខេត្តកំពត គួរតែបញ្ឈប់សកម្មភាពហើយ ព្រោះវាជាកត្តារាំងស្ទះក្នុងការអភិវឌ្ឍតំបន់ផង និងធ្វើឲ្យបាត់បង់សោភ័ណភាពផង ថែមទាំងបង្ករំខានដល់បញ្ហាសុខភាពផងដែរ។
ទាក់ទិននឹងបញ្ហាដូចខាងលើ នៅព្រឹកថ្ងៃទី២២ ខែមករា ឆ្នាំ២០១៩នេះ រដ្ឋបាលស្រុកកំពង់ត្រាច ក្រោមវត្តមាន លោក ងែត សុផល អភិបាលរង តំណាង លោក អូន ខន អភិបាល នៃគណៈអភិបាលស្រុកកំពង់ត្រាច បានដឹកនាំមន្ត្រីសាលាស្រុក និងសិស្សានុសិស្សមកពីវិទ្យាល័យចំនួន២ គឺវិទ្យាល័យព្រះបិតាជាតិ និងវិទ្យាល័យ សម្តេច ហ៊ុន សែន អង្គសុរភី ចូលរួមធ្វើអនាម័យ សម្អាតបរិស្ថាន នៅតាមទីប្រជុំជនស្រុកកំពង់ត្រាច ពិសេសតាមដងផ្លូវជាតិលេខ៣៣និង៣១ ដែលកន្លងមក ចំណុចនេះតែងតែមានការប្លុងសំរាម និងកាកសំណល់រាវរឹងគ្រប់ប្រភេទច្រកដោយប្លាស្ទិកទៅបោះចោលរប៉ាត់រប៉ាយតាមចិញ្ចើមផ្លូវជាប្រចាំនោះ។ចំពោះសកម្មភាពនេះ មហាជនបាននិងកំពុងអបអរសាទរ និងកោតសរសើរ ខណៈបានឃើញវត្តមានថ្នាក់ដឹកនាំស្រុក អជ្ញាធរមូលដ្ឋាន លោកគ្រូ អ្នកគ្រូ សិស្សានុសិស្ស បានរួមគ្នាធ្វើអនាម័យ សម្អាតបរិស្ថាន ដើម្បីកែប្រែសោភ័ណភាពតំបន់របស់យើងឲ្យមានភាពស្រស់បំព្រងឡើងវិញ។
ទោះជាយ៉ាងណា កន្លងមកគេបានកត់សម្គាល់ឃើញចំណុច ភូមិសាស្ត្រខាងលើ ត្រូវបានក្លាយជាកន្លែងស្តុកសំរាម និងកាកសំណល់ ហើយករណីបែបនេះ ភាគច្រើនកើតឡើងដោយសារបងប្អូនប្រជាពលរដ្ឋ ដែលមានលំនៅដ្ឋានក្នុងទីប្រជុំជនស្រុក ដែលជានិច្ចកាលតែងតែលួចដឹកសំរាម-កាកសំណល់យកទៅប្លុងចោលនៅពេលយប់ស្ងាត់ គ្មានអ្នកណាឃើញ។ម្លោះហើយការលួចឆ្មក់បោះចោលសំរាមនេះក៏គម្រូដ៏អាក្រក់មួយធ្វើឲ្យមានសកម្មភាពបន្តគ្នាពីម្នាក់ទៅម្នាក់ ដែលធ្វើឲ្យខាងអាជ្ញាធរពិបាកទប់ស្កាត់ផងដែរ។
ជាមួយគ្នានេះ មហាជនក្នុងខេត្តកំពតទាំងមូលសង្ឃឹមថា ទៅថ្ងៃអនាគត ប្រជាពលរដ្ឋពិតជាយល់ដឹងអ្វីដែលហៅថាបរិស្ថាន ហើយនឹងងាកមកចូលរួមសហការក្នុងសកម្មភាពនេះទាំងអស់គ្នា។
ដូច្នេះដើម្បីកែប្រែសោភ័ណភាពតំបន់របស់យើងឲ្យកាន់តែស្រស់បំព្រង គប្បីប្រជាពលរដ្ឋបញ្ឈប់សកម្មភាពបោះចោលសំរាមតាមទីសាធារណៈ ហើយនាំគ្នាចូលរួមធ្វើអនាម័យ សម្អាតបរិស្ថានទាំងអស់គ្នា។”កន្លែងស្អាត បរិស្ថានល្អ គឺផ្តើមដោយសារយើងទាំងអស់គ្នា”៕
សេង ណារិទ្ធ
