ខេត្តបន្ទាយមានជ័យ៖ បើយោងតាមរបាយ ការណ៍មន្ត្រីគយ និងរដ្ឋាករខេត្តក្នុងពីធីប្រកាសចូលកាន់តំណែងប្រធានសាខាគយនិងរដ្ឋាករខេត្តបន្ទាយមានជ័យ ថា៖ ក្នុងឆ្នាំ២០១៨ នេះ មន្ត្រីគយនិងរដ្ឋករខេត្តបន្ទាយមានជ័យប្រមូលពន្ធបានប្រមាណជាង៣០លានដុល្លារ ក្នុង១ខែ ។
នៅក្នុងពិធីប្រកាសចូលកាន់តំណែងប្រធានសាខាគយនិងរដ្ឋាករខេត្តបន្ទាយមានជ័យ នៅរសៀលថ្ងៃទី២១ ខែមករា ឆ្នាំ២០១៩ នេះ បានប្រារព្ធពិធីផ្លាសផ្តូ នៅសាលប្រជុំសាលាខេត្តបន្ទាយមានជ័យ លោក ឆែ សុធា ប្រធានសាខាគយនិងរដ្ឋាករខេត្តបន្ទាយមានជ័យដែលត្រូវចូលនិវត្តន៍បានអោយដឹងថា៖ ខេត្តបន្ទាយមានជ័យក្នុងឆ្នាំ២០១៨ នេះ មន្ត្រីសាខាគយនិងរដ្ឋាករខេត្តបន្ទាយមានជ័យបាន ប្រមូលពន្ធក្នុងរយៈពេល១ថ្ងៃ បានជាង១លានដុល្លារ ក្នុង១ខែ ប្រមូលបានជាង៣០លានដុលា្លរ នេះបើតាមការលើកឡើងរបស់លោក។
លោក នូ ស៊ីថា ប្រធានសាខាគយនិងរដ្ឋាករខេត្តត្បូងឃ្មុំ ត្រូវបានផ្ទេរភារកិច្ចជាប្រធានសាខាគយរដ្ឋាករខេត្តបន្ទាយមានជ័យ ជំនួសលោក ឆែ សុធា ដែលត្រូវបានចូលនិវត្តន៍ និងតែងតាំងលោក ងួន កុសល់ ប្រធានការិយាល័យគយនិងរដ្ឋាករផែស្ងួត អ៊ុយញ៉ុងភ្នំពេញ ត្រូវបានផ្ទេរភារកិច្ចជាប្រធានការិយាល័យគយនិងរដ្ឋាករច្រកទ្វារអន្តរជាតិប៉ោយប៉ែត ជំនួសលោក ហ៊ុយ សុជាតិ ដែលត្រូវទទួលភារកិច្ចជាប្រធានការិយាល័យរដ្ឋ បាលនិងគ្រប់គ្រងនៃសាខាគយនិងរដ្ឋាករខេត្តមណ្ឌលគីរី។
លោក នូ ស៊ីថា ប្រធានសាខាគយរដ្ឋាករខេត្តបន្ទាយមានជ័យមកកាន់តំណែងថ្មី បានប្តេជ្ញាចិត្ត ក្រោយពេលប្រកាសចូលកាន់ភារកិច្ចជាប្រធានសាខាគយនិងរដ្ឋាករខេត្តបន្ទាយមាន ជ័យ ហើយ និងសហការជាមួយអាជ្ញាធរ សមត្ថកិច្ចពាក់ព័ន្ធ និងសហការផ្ទៃក្នុងដើម្បីធ្វើការប្រមូលពន្ធជូនរដ្ឋ ដែលជាកាតព្វកិច្ចមន្ត្រីគយនិងរដ្ឋាករ។
លោក ផា អេងវេង អគ្គនាយករងនៃអគ្គ នាយកដ្ឋានគយនិងរដ្ឋាករកម្ពុជាបានមានប្រសាសន៍ផ្តាំផ្ញើ ដល់មន្ត្រីគយនិងរដ្ឋាករដែលទើបតែមកទទួលភារកិច្ចថ្មី នៅក្នុងទឹកដីខេត្តបន្ទាយមានជ័យ ត្រូវសហការគ្នាជាមួយអាជ្ញាធរ មន្ត្រីពាក់ព័ន្ធ និងត្រូវចេះសម្រប សម្រួល គ្រប់គ្រងផ្ទៃក្នុងអោយបានល្អ កុំនិយមបក្ខពួក ត្រូវគិតពីប្រយោជន៍រួម ខិតខំបំពេញភារកិច្ចល្អ តាមគោលការណ៍របស់រាជរដ្ឋាភិបាល៕
