(ខេត្តកំពត)៖ នៅព្រឹកថ្ងៃសៅរ៍ ១៣កើត ខែបុស្ស ឆ្នាំច សំរឹទ្ធិស័ក ពស ២៥៦២ ត្រូវនឹងថ្ងៃទី១៩ ខែមករា ឆ្នាំ២០១៩ លោក ស៊ឹម វុទ្ធា អភិបាលរងខេត្ត តំណាងដ៏ខ្ពង់ខ្ពស់ លោក ជាវ តាយ អភិបាលនៃគណៈអភិបាលខេត្តកំពត បានអញ្ជើញចូលរួមក្នុង ពិធីស្រោចស្រពព្រះសុគន្ធវារីសម្ពោធសមណស័ក្តិទីជាព្រះអនុគណ គណៈធម្មយុត្តិកនិកាយស្រុកឈូក និងជាព្រះចៅអធិការវត្តបទុមប្រាង្ស៊ីរតនា ហៅវត្តស្ទឹង ក្រោមព្រះរាជាធិបតីភាពដ៏ខ្ពង់ខ្ពស់ សម្តេចព្រះអភិសិរីសុគន្ធាមហាសង្ឃរាជាធិបតី កិត្តិឧទ្ទេសបណ្ឌិត បួរ គ្រី សម្តេចព្រះមហាសង្ឃរាជ នៃគណៈធម្មយុត្តិកនិកាយនៃព្រះរាជាណាចក្រកម្ពុជា និងជាព្រះប្រធានគណៈសង្ឃនាយក នៃគណៈធម្មយុត្តិកនិកាយ នៃព្រះរាជាណាចក្រកម្ពុជា ស្ថិតនៅភូមិឈើទាល ឃុំឈូក ស្រុកឈូក ខេត្តកំពត។
ក្នុងពិធីនាព្រឹកនេះមានការនិមន្ត និងអញ្ជើញចូលរួមពីព្រះសង្ឃ លោកប្រធានមន្ទីរ អង្គភាពជុំវិញខេត្ត នាយក នាយករងទីចាត់ការ ប្រធាន អនុប្រធានអង្គភាពចំណុះសាលាខេត្ត មន្ត្រីរាជការសាលាស្រុកឈូក សិស្សានុសិស្ស បងប្អូនប្រជាពលរដ្ឋ យ៉ាងច្រើនកុះករ។
លោក ស៊ឹម វុទ្ធា អភិបាលរងខេត្តកំពត បានមានប្រសាសន៍ថា បច្ចុប្បន្នវិស័យសាសនាបាននិងកំពុងដើរតួនាទីយ៉ាងសំខាន់ក្នុងសង្គមជាតិ ។ ជាងនេះទៅទៀត ការបង្កើតវត្តអារាមគឺជាការបង្កើតនូវថ្នាលបណ្តុះបណ្តាលធនធានមនុស្សយ៉ាងសំខាន់សម្រាប់ជ្រោងវិស័យសាសនាឱ្យកាន់តែមានការរីកចម្រើនជាបន្តបន្ទាប់ ៕
សេង ណារិទ្ធ
