(តាកែវ)៖ នៅថ្ងៃទី១៩ ខែមករា ឆ្នាំ២០១៩នេះឯកឧត្តមបណ្ឌិត ហ៊ុន ម៉ាណែត តំណាងសម្ដេចនាយករដ្ឋមន្ត្រី ហ៊ុន សែន និងលោកស្រី ប៊ុន រ៉ានី ហ៊ុន សែន បានអញ្ជេីញសម្ពោធអគារសិក្សាសាលាបឋមសិក្សាអង្គថ្មី និងសមិទ្ធផលនានាក្នុងវត្តអង្គថ្មី ឃុំសំបួរ ស្រុកទ្រាំង។
សមិទ្ធផលទាំងនេះចំណាយថវិកាសាងសង់អស់ថវិការ ៦៧,៥៦៥ដុល្លារ ដោយមានការចូលរួមពីសំណាក់លោក សុខ ខាវ៉ាន់ រដ្ឋលេខាធិការក្រសួងរ៉ែ និងថាមពល លោក អ៊ូច ភា អភិបាលខេត្តតាកែវ លោក លោកស្រីក្រុមការងារថ្នាក់ជាតិចុះមូលដ្ឋានស្រុកទ្រាំង មន្ត្រីរាជការ កងកម្លាំងប្រដាប់អាវុធ ព្រះសង្ឃ តាជី យាយជី យុវជន ស.ស.យ.ក កាយរិទ្ធកម្ពុជា និងយុវជនកាកបាទក្រហម និងប្រជាពលរដ្ឋ ចំនួន២០៥៧អង្គនាក់ ក្នុងខេត្តតាកែវ។
នាឱកាសនោះដែរ ឯកឧត្តមបណ្ដិត ហ៊ុន ម៉ាណែត បានពាំនាំនូវពាក្យផ្តាំផ្ញេីសួរសុខទុក្ខពីសំណាក់ សម្ដេចនាយករដ្ឋមន្ត្រី ហ៊ុន សែន និងសម្ដេចកិត្តិព្រឹទ្ធបណ្តិត ប៊ុន រ៉ានី ហ៊ុន សែន ដល់បងប្អូនប្រជាពលរដ្ឋក្នុងខេត្តតាកែវ ជាពិសេសស្រុកទ្រាំង ព្រមទាំងបានជម្រាបជូនបងប្អូនពីការខិតខំរបស់សម្ដេចនាយករដ្ឋមន្ត្រី ក៏ដូចជាថ្នាក់ដឹកនាំរាជរដ្ឋាភិបាលក្នុងការនាំមកនូវសុខសន្តិភាព និងការអភិវឌ្ឍប្រទេសជាតិឲ្យកាន់តែរីកចម្រេីន តាមរយ:ការកៀគរជំនួយក៏ដូចជាវិនិយោគិន មកបណ្តាក់ទុនវិនិយោគនៅកម្ពុជា។
ឯកឧត្តមបណ្តិតបន្តថា បេីទោះជារាជរដ្ឋាភិបាលខិតខំយ៉ាងណាក៏ដោយ ក៏ទាមទាឲ្យមានការចូលរួមពីសំណាក់បងប្អូនប្រជាពលរដ្ឋ ដូច្នេះសូមបងប្អូនរួបរួមសាមគ្គីគ្នាថែរក្សាសុខសន្តិភាព ដែលមានឱ្យបានស្ថិតស្ថេរគង់វង្ស និងរួមគ្នាអភិវឌ្ឍន៍ប្រទេសយេីងឲ្យកាន់តែរីកចម្រេីនរុងរឿងបន្ថែមទៀត៕
