(ខេត្តកែប)៖ បុរសដែលគេស្គាល់ថាជាម្ចាស់រីសតមួយកន្លែងនៅភូមិសាស្ត្រក្រុងកែប បានស្លាប់យ៉ាងតក់ក្រហល់ និងគួរឱ្យសោកស្តាយបំផុត។ ករណីខាងលើនេះ សមត្ថកិច្ចមូលដ្ឋានបានអះអាងថា ជនរងគ្រោះស្លាប់ដោយសារជំងឺគាំងបេះដូង ។
ហេតុការណ៍ភ្ញាក់ផ្អើលនេះ បានកើតឡើងនៅវេលាម៉ោង៨និង៣០នាទីព្រឹក ថ្ងៃទី១៩ខែមករា ឆ្នាំ២០១៩ ស្ថិតចំណុចរីសតរបស់ជនរងគ្រោះ ក្នុងភូមិកែវក្រសាំង សង្កាត់កែប ក្រុង-ខេត្តកែប(ខាងក្រោយមន្ទីរព័ត៌មានខេត្តប្រមាណ៥០០ម៉ែត្រ)។
បុរសរងគ្រោះ ត្រូវបានគេស្គាល់ ឈ្មោះ ឈឹម ខែត ភេទប្រុស អាយុ៣៤ឆ្នាំ មុខរបរកសិករ រស់នៅរីសតខាងលើ ប៉ុន្តែជនរងគ្រោះមានស្រុកកំណើតនៅខេត្តតាកែវ។
តាមប្រភពព័ត៌មានពីសមត្ថកិច្ចមូលដ្ឋានបានឱ្យដឹងថា កន្លងមកបុរសរងគ្រោះតែងតែត្អូញត្អែរពីករណីជំងឺម្យ៉ាងចេះតែធ្វើទុក្ខក្នុងខ្លួន ប៉ុន្តែគ្មាននរណាចាប់អារម្មណ៍ឡើយ ដោយនឹកស្មានថាជាជំងឺធម្មតា។លុះព្រឹកថ្ងៃកើតហេតុបុរសរងគ្រោះត្អូញថាឈឺនិងចុកដើមទ្រូង រួចសុំចូលសំងំគេងក្នុងបន្ទប់មួយភ្លែត។ប្រភពបានបន្តថា ដោយសារបុរសរងគ្រោះចូលក្នុងបន្ទប់ដេកសំងំមិនព្រមក្រោកទើបសាច់ញាតិចូលទៅដាស់ក៏ស្រាប់តែជនរងគ្រោះឈប់ដកដង្ហើមទៅហើយ។ភ្លាមៗនោះ បងប្អូន មិត្តភក្តិមិនអស់ចិត្តក៏ដឹកជនរងគ្រោះទៅមន្ទីរពេទ្យ ប៉ុន្តែខាងមន្ទីរពេទ្យប្រាប់ថា បុរសរងគ្រោះបានស្លាប់បាត់ទៅហើយ ទើបដឹកសពវិលមករីសតខាងលើវិញ។
ក្រោយពីមានករណីនេះកើតឡើង សមត្ថកិច្ចជំនាញសហការជាមួយពេទ្យ ក៏បានចុះមកពិនិត្យ ធ្វើកោសល្យវិច័យ ទើបដឹងថាបុរសរងគ្រោះខាងលើស្លាប់ដោយសារជំងឺគាំងបេះដូង។
បច្ចុប្បន្នសពជនរងគ្រោះ ត្រូវបានរថយន្តសាមុយរបស់មន្ទីរពេទ្យបង្អែកខេត្តកែប រៀបចំដឹកទៅកាន់ស្រុកកំណើតដើម្បីប្រគល់ជូនក្រុមគ្រួសារចាត់ចែងធ្វើបុណ្យតាមប្រពៃណី៕
សេង ណារិទ្ធ
