ខេត្តប៉ៃលិន ៖ កាលពីថ្ងៃទី២២ ខែកញ្ញា ឆ្នាំ២០១៥ នៅសាលាខេត្តប៉ៃលិន មានរៀបពិធីចែកវិញ្ញាបនបត្រសម្គាល់ម្ចាស់អចលនវត្ថុជូន ប្រជាពលរដ្ឋភូមិអូរពឺត អូរច្រាកើត អូរច្រាកណ្តាល ក្នុងសង្កាត់ទួលល្វា និងភូមិក្បាលព្រលានក្នុងសង្កាត់អូតាវ៉ៅ ក្រុងប៉ៃលិន ខេត្តប៉ៃលិន ក្រោមអធិបតីភាព ឯកឧត្តមទេសរដ្ឋមន្ត្រី អ៊ឹម ឈុនលឹម រដ្ឋមន្ត្រីក្រសួងរៀបចំដែនដី នគររូបនីយកម្ម និងសំណង់ និងឯកឧត្តម កើត សុធា អភិបាលនៃគណអភិបាលខេត្តប៉ៃលិន ឯកឧត្តម ឡី ចាន់ឆាយ ប្រធានក្រុមប្រឹក្សាខេត្ត ។
លោក ហុក សុផល ប្រធានមន្ទីររៀបចំដែនដីនគររូនីយកម្ម និងសំណង់បានអោយដឹងថា ចាប់តាំពីបានប្រកាសតំបន់វិន្នច្ឆ័យ ដើម្បីចុះបញ្ជីដីធ្លីមានលក្ខណៈជាប្រព័ន្ធ ក្នុងសង្កាត់អូរតាវ៉ៅ និងសង្កាត់ទួលល្វា ក្នុងក្រុងប៉ៃលិន រហូតមកដល់បច្ចុប្បន្ននេះ សំរេចបានក្បាលដីសរុបចំនួន១៤៤៩ ក្បាលដី ។ ក្នុងនោះភូមិក្បាលព្រលានសំរេចបានចំនួន ៧០៤ក្បាលដី ដែលមានដីលំនៅដ្ឋានចំនួន៤៩៣ក្បាលដី ដីកសិកម្មចំនួន២១០ក្បាលដី ដីស្រះមួយក្បាលដី មានដីទំនាស់១ក្បាលដី ដីគ្មានទិន្នន័យ ៤៤ក្បាលដី។ ភូមិអូពឺត សំរេចបាន ៣៨៧ក្បាលដី ក្នុងនោះមានមានដីលំនៅដ្ឋានចំនួន៣៨៤ក្បាលដី ដីកសិកម្មចំនួន២ក្បាលដី ដីសហគមន៍មួយក្បាលដី ដីទំនាស់១ក្បាលដី ដីគ្មានទិន្នន័យ ២៣ក្បាលដី ។ ភូមិអូរច្រាកណ្តាល សំរេចបាន២០០ ក្បាលដីក្នុងនោះមានដីលំនៅដ្ឋានចំនួន ១៨៦ក្បាលដី ដីកសិកម្មចំនួន ៩ក្បាលដី ដីវត្តមួយក្បាលដី ដីសាលារៀន២ក្បាលដី ដីសាលាសង្កាត់១ក្បាលដី ដីមណ្ឌលសុខភាព១ក្បាលដី និងមានដីគ្មានទិន្នន័យ ១៦ក្បាលដី ។ ភូមិអូរច្រាកើត សំរេចបាន ១៥៨ក្បាលដី ក្នុងនោះមានដីលំនៅដ្ឋានចំនួន ១៥៨ក្បាលដី និងមានដីគ្មានទិន្នន័យ ១២ក្បាលដី។
ឯកឧត្តម កើត សុធា អភិបាល នៃគណអភិបាលខេត្តប៉ៃលិនបានមានប្រសាសន៍ថា ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានយកចិត្តទុកដាក់ជំរុញការអភិវឌ្ឍន៍ខេត្ត ពីមួយថ្ងៃ ទៅមួយថ្ងៃ ដោយបានកសាងផ្លូវ ស្ពាន សាលារៀ មន្ទីរពេទ្យ មណ្ឌលសុខភាព ទំនប់ បង្ហៀទឹក និងប្រឡាយ ដែលសមិទ្ធផលទាំងអស់នេះបានបំរើដល់សេចក្តីត្រូវការនិងជីវភាពរស់នៅរបស់ប្រជាពលរដ្ឋ ។
ទន្ទឹមនេះខេត្តក៏មាន ស្ថានីយ៍ទូរទស្សន៍ វិទ្យុ ដែលផ្តល់សេវាព័ត៌មាន និងនាទីកន្សាន្តជូនប្រជាពលរដ្ឋផងដែរ។ឯកឧត្តមបានបន្តថា ការចុះបញ្ជីដីជាលក្ខណៈប្រព័ន្ធ ក្រសួងសេដ្ឋកិច្ច និងហិរញ្ញវត្ថុនិងក្រសួងរៀបចំដែនដីនគរូបនីយកម្ម និងសំណង់តម្រូវអោយម្ចាស់ដីអ្នកកាន់កាប់ដីបង់សេវាដូចជា ដីកសិកម្ម ត្រូវបង់១រៀលក្នុងមួយម៉េត្រការ៉េ ឬ ១០០រៀលសំរាប់ដីដែលមានទំហំតូចជា១០០ម៉ែត្រការ៉េ ។ ដីលំនៅដ្ឋានជនបទ១០រៀលក្នុងមួយម៉ែត្រការ៉េ ដីប្រជុំជនស្រុក ឬដីជាយទីប្រជុំជនខេត្ត២០ រៀលក្នុងមួយម៉ែត្រការ៉េ ដីទីប្រជុំជនខេត្ត ឬដីជាយទីប្រជុំជនរាជានីភ្នំពេញ២៥០រៀល ក្នុងមួយម៉ែត្រការ៉េ។ ឯកឧត្តមទេសរដ្ឋមន្ត្រី អ៊ឹម ឈុនលឹម រដ្ឋមន្ត្រីក្រសួងរៀបចំដែនដី នគររូបនីយកម្ម និងសំណង់ បានមានប្រសាសន៍ថា ចំនួនប័ណ្ណដែលត្រូវចែកជូននាពេលនេះមាន ១៤៤៩ ប័ណ្ណ មានផ្ទៃដីទំហំ ៧៣៣,២៧ហ.ត សម្រាប់១០៧០គ្រួសារ។
ឯកឧត្តមបានបន្តថា ក្បាលដីដែលប្រជាពលរដ្ឋយើងបានចុះបញ្ជីនៅក្នុងសៀវភៅគោលបញ្ជីដីធ្លី នឹងទទួលបានកម្មសិទ្ធនេះគឺជាការបានបំពេញលក្ខខ័ណ្ឌគ្រិះដ៏រឹងមាំ ដែលធានាដោយរដ្ឋ និងការពារដោយច្បាប់ និងក៏ជាលក្ខខណ្ឌដ៏សំខាន់សំរាប់ការប្រើប្រាស់បណ្ណដីដាក់ធានាការខ្ចីប្រាក់នៅធនាគារ ដើម្បីយកដើមទុនមកប្រើប្រាស់សំរាប់ធ្វើអាជីវកម្មផ្សេងៗ ក្នុងការកែលំអរវីភាពរស់នៅ។ ដូច្នេះការចុះបញ្ជីដីធ្លី គឺជាការពង្រឹងសុវត្ថភាពនៃការកាន់កាប់ដីធ្លីដែលជំរុញការប្រើប្រាស់ដីអោយអស់សក្កដានុពល ហើយកត្តានេះពិតជានឹងបានកាត់បន្ថយភាពក្រីក្រដែលជាគោលដៅចុងក្រោយនៃគោលនយោបាយជំរុញការចុះបញ្ជីដីធ្លីរបស់រាជរដ្ឋាភិបាល។ ឯកឧត្តមបានបន្តទៀតថា មកដល់ពេលនេះលទ្ធផលសរុបទូទាំងប្រទេសនៃការចេញបណ្ណកម្មសិទ្ធជូនដល់ដៃប្រជាពលរដ្ឋបានចំនួន៤.០៥២.២៩៨ ប័ណ្ណ ក្នុងនោះមាន ការចុះបញ្ជីដីជាលក្ខណៈប្រព័ន្ធតាមរយៈកម្មវិធីអនុវិស័យរដ្ឋបាលដីធ្លី ដែលនឹងកំពុងអនុវត្តក្នុងក្របខ័ណ្ឌទូទាំងប្រទេសបានចែកប័ណ្ណដល់ដៃប្រជាពលរដ្ឋចំនួន២.៨២៨.១០៦ប័ណ្ណ ។
ការចុះបញ្ជីដីជាលក្ខណៈប្រព័ន្ធតាមរយៈ ការអនុវត្តបទបញ្ជាលេខ០១បប គោលនយោបាយចាស់សកម្មភាពថ្មីលើវិស័យដីធ្លីបានអនុវត្តនៅលើឃុំចំនួន៣៥៧ឃុំ ក្នុងខេត្តចំនួន២០ បានចែកប័ណ្ណដល់ដៃប្រជាពលរដ្ឋចំនួន៦១៧.០០១ប័ណ្ណ ។ ការចុះបញ្ជីដីមានលក្ខណៈដាច់ដោយដុំបានចែកន័ណ្ណចំនួន៦០៧.១៩១ប័ណ្ណ ។ ការចុះបញ្ជីដីរដ្ឋដែលជាកម្មវត្ថុនៃសម្បទានដីសេដ្ឋកិច្ច និងជួលរយៈពេលវែង សំរេចបាន៦៤៨ប័ណ្ណលើផ្ទៃដីចំនួន៣៦ម៉ឺនហិតា ។ ការចុះបញ្ជីដីសហគមន៍ជនជាតិដើមភាគតិច ជាកម្មសិទ្ធសមូហភាព ដែលនឹងកំពុងអនុវត្តជូនដល់សហគមន៍ជនជាតិដើមភាគតិចចំនួន២២សហគមន៍ ចេញប័ណ្ណចំនួន៨សហគមន៍ និង១៤សហគមន៍ទៀតកំពុងដំណើការ ។ ដូច្នេះ ផ្អែកតាមលទ្ធផលខាងលើនៃការចែកប័ណ្ណបាន ប្រមាណ៥៨%លើចំនួនក្បាលដីប៉ាន់ស្មាសរុបចំនួន៧លានក្បាលដី ។ ប្រៀបនឹងផែនការគឺសំរេចបានលើសផែនការដែលត្រូវសម្រេចអោយបាន៥៧%ក្នុងឆ្នាំ២០១៥ និងនៅឆ្នាំ២០២៣ អោយសំរេច១០០% ៕
