(ខេត្តកែប)៖ រដ្ឋបាលខេត្តកែបត្រូវតែមានមជ្ឈមណ្ឌលកែប្រែបន្សាបគ្រឿងញៀន ក្នុងពេលអនាគត។ នេះបើជាការលើកឡើងរបស់ប្រមុខដឹកនាំរដ្ឋបាលខេត្តកែប លោក កែន សត្ថា ក្នុងដំណើរស្វែងរកទីតាំងសម្រាប់ត្រៀមបង្កើតមជ្ឈមណ្ឌលបន្សាបគ្រឿងញៀន ត្រង់ចំណុចភូមិអន្ទង់ស ឃុំពងទឹក ស្រុកដំណាក់ចង្អើរ ខេត្តកែប កាលពីរសៀលថ្ងៃទី១៦ ខែមករា ឆ្នាំ២០១៩ ដោយមានការចូលរួមពីលោកស្រីអភិបាលស្រុក លោកប្រធាន អនុប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត លោកប្រធានការិយាល័យភូមិបាលស្រុក ព្រមទាំងអាជ្ញាធរមូលដ្ឋាន។
លោកអភិបាលខេត្តបានបញ្ជាក់ទៀតថា អំឡុងពេលនេះរដ្ឋបាលខេត្តនិងជំនាញ បាននិងកំពុងចុះពិនិត្យរកមើលទីតាំងមួយដ៏ជាក់លាក់សម្រាប់សាងសង់មជ្ឈមណ្ឌលបន្សាបគ្រឿងញៀននៅពេលខាងមុននេះ។
បន្ទាប់ពីរដ្ឋបាលខេត្តកែប មានគម្រោងបង្កើតមជ្ឈមណ្ឌលកែប្រែ បន្សាបគ្រឿងញៀននោះមក មហាជន ពិសេសប្រជាពលរដ្ឋក្នុងតំបន់មានការរីករាយនិងគាំទ្រយ៉ាងពេញទំហឹង ហើយក៏បានចាត់ទុកគម្រោងនេះ ជាសមិទ្ធផលមួយថ្មីសន្លាងដែលខេត្តកែបមិនធ្លាប់មានពីមុនមក។មហាជនក៏បានលើកឡើងផងដែរថា កន្លងមករហូតដល់បច្ចុប្បន្ន ខេត្តកែប ក៏មិនទាន់បានបង្កើតស្ថាប័នតុលាការ ហើយក៏មិនទាន់មានបង្កើតពន្ធនាគារនៅឡើយដែរ។យ៉ាងណាមិញការបង្កើតឲ្យមានមជ្ឈមណ្ឌលកែប្រែបន្សាបគ្រឿងញៀននៅក្នុងអាណាចក្រខេត្តកែប ពិតជារឿងមួយដ៏ប្រពៃ ងាយស្រួលដល់ការផ្តល់សេវាថែទាំសុខភាពដល់អ្នករងគ្រោះដោយសារគ្រឿងញៀន គ្រប់ប្រភេទ។
សូមបញ្ជាក់ថា៖ បើតាមការលើកឡើងពីសំណាក់ លោកស្រី គឹម ចន្នី អភិបាលស្រុកដំណាក់ចង្អើរ បានឲ្យដឹងថា ខណៈនេះរដ្ឋបាលដែនដី បាននិងកំពុងស្វះស្វែងរកទីតាំងមួយដ៏ជាក់លាក់ស្ថិតក្នុងដីរបស់សហគមន៍ ត្រង់ចំណុចភូមិអន្ទង់ស ឃុំពងទឹក ស្រុកដំណាក់ចង្អើរ ខេត្តកែប៕
សេង ណារិទ្ធ
