ខេត្តបាត់ដំបង ៖ កាលពីល្ងាចថ្ងៃទី២២ ខែកញ្ញា ឆ្នាំ២០១៥ នៅសាលាខេត្តបាត់ដំបង មានធ្វើពិធីតម្លើងឋានន្តរសក្កិ បំពាក់ឋានន្តរសក្កិ ផ្លាស់ប្តូរ មុខតំណែង និងតែងតាំងមុខតំណែង ដល់នាយនគរបាល នាយនគរបាលរង ពលនគរបាល នៃស្នងការដ្ឋាននគរបាល ខេត្តបាត់ដំបង និងជួបសំណេះសំណាលជាមួយនឹងនិវត្តន៍ជនក្រោមអធិបតីភាពឧត្តមសេនីយ៍ ខេង សុមេធ អគ្គស្នងការរងនគរបាលជាតិ និងជាមេបញ្ជាការនគរបាលជាតិប្រចាំទិសភូមិភាគទី៤ និងទី៥ និងឯកឧត្តមច័ន្ទសុផលអភិបាលខេត្តបាត់ដំបង។
លោក កុយ ហៀង ស្នងការរង នៃស្នងការដ្ឋាននគរបាលខេត្តទើបឡើងកាន់ដំណែងថ្មីបានឡើងប្តេជ្ញាថាប្តេជ្ញាគោរពអនុវត្តន៍អោយបានតាមកម្មវិធីចតុកោណរបស់រាជរដ្ឋាភិបាល ប្តេជ្ញាគោរពប្រតិបត្តិអោយបានដាច់ខាតតាមវិន័យលេខ០០៦ របស់ក្រសួងមហាផ្ទៃ។ប្តេជ្ញាយកអោយអស់កម្លាំងកាយចិត្តនិងកម្លាំងប្រាជ្ញាអនុវត្តរបស់ផែនការថ្នាក់លើដោយមិនប្រកែកតវ៉ាឬទាមទារលក្ខ័នអ្វីឡើយ ប្តេជ្ញាថែរក្សាចំណងសាមគ្គីភាព និងភាតរភាពអោយល្អប្រសើរទាំងផ្ទៃក្នុងនិងអង្គភាពក៏ដូចស្ថាប័ននានា ប្តេជ្ញាខិតខំរៀនសូត្រនៅមុខវិជ្ជាជំនាញរបស់កម្លាំងនគរបាលជាតិព្រមទាំងសិក្សាស្វែងយល់អំពីបតដ្ឋានច្បាប់ទាំងឡាយដែលពាក់ព័ន្ធដល់កិច្ចការប្រតិបត្តិការ ។
ឯកឧត្តម ច័ន្ទ សុផល អភិបាលខេត្តបាត់ដំបង បានមានប្រសាសន៍ផ្តាំផ្ញើ ដល់មន្ត្រី នគរបាលទាំងអស់ ដែលទើបឡើងឋានៈថ្មីត្រូវបំរើប្រជាពលរដ្ឋនិងប្រទេសជាតិអោយបានល្អ ជាពិសេសការពារភូមិឃុំសុវត្ថភាព ។
នាយឧត្តម សេនីយ៍ ខេង សុមេធ អគ្គស្នងការរងនគរបាលជាតិ និងជាមេបញ្ជាការនគរបាលជាតិប្រចាំទិសភូមិភាគទី៤ និងទី៥ បានមានប្រសាសន៍ថា កងកំលាំងនគរបាលជាតិ ដែលបានចូលនិវត្តន៍ គឺ ជារៀមច្បង មានតម្លៃ ស្មើនឹងគុណធម៌ មិនអាចមើលរំលងបាន។ ដោយលោកចាត់ទុកថា និវត្តន៍ជនទាំងអស់ គឺបានបំរើដល់សង្គមជាតិ និងបានលើកស្ទួយសង្គម ឲ្យមានការរីកចំរើនតាំងពីដើមរៀងមក។ បើសិនជាគ្មានការលះបង់របស់បងប្រុស បង ស្រី អ៊ំ ពូ មីង ទេនោះ គឺអ្វីៗមិនអាចជ្រោមជ្រែង ឲ្យមានការរីកចំរើន រហូតមកដល់សព្វថ្ងៃនេះដែរ ដោយហេតុនេះ ការលះបង់របស់អតីតយុទ្ធជន គឺមានតម្លៃធំធេង សំរាប់សង្គមជាតិ ទាំងមូល។
លោកនាយឧត្តមសេនីយ៍ ខេង សុមេធ បានរំលឹកថា ការបំពាក់ឋានន្តរសក្កិ ដល់នគរបាលនាពេលនេះ គឺស្ថិតក្នុងស្ថានភាពប្រទេសជាតិ មានសុខសន្តិភាព សុវត្ថិភាព និងធ្វើនៅក្នុងសាលប្រជុំដ៏ទំនើប។ ប៉ុន្តែនៅសម័យអតីតនិវត្តន៍ជនទាំងអស់ គឺមានការបំពាក់ឋានន្តរសក្កិ នៅក្រោមដើមឈើ និងនៅតាមលេណដ្ឋាន តែប៉ុណ្ណោះ ព្រោះថា សម័យកាលនោះ និវត្តន៍ជន ពិតជាបានឆ្លងកាត់នូវសង្គ្រាមជាក់ស្តែង ពិតប្រាកដ។
នាយឧត្តមសេនីយ៍ បានបន្តថា តំលៃគុណធម៌ទាំងនេះ មិនត្រឹមតែមិនអាចមើលរំលងប៉ុណ្ណោះទេ តែនៅមានជម្រៅជ្រៅ ជាងមហាសមុទ្រ និងមានទំហំធំធេងជាងមហាមេឃ ដោយសារគុណូបការដ៏ថ្លៃថ្លានេះ បានប្រសូត ចេញពីការធ្វើពលីកម្ម ក្រោមការចំណាយញើសឈាម ឆន្ទៈភក្តី ស្មារតីស្មោះស្មគ្រ័ ចំពោះប្រទេសជាតិ ដែលយក អស់កំលាំងកាយចិត្ត គំនិតប្រាជ្ញា ចាក់ក្រាលលើពេលវេលាដ៏សែនយូរ ហើយឆ្លងកាត់របត់នយោបាយដល់វែងឆ្ងាយ ដើម្បីកសាងជំហរខ្លួនឯង ជាស្ពានដ៏រឹងមាំ ក្រោមការដឹកនាំដ៏ឈ្លាសវៃរបស់សម្តេចតេជោ ហ៊ុន សែន ជាប្រមុខដឹក នាំ ដើម្បីមាតុភូមិកម្ពុជា។
ក្នុងឱកាសនោះ នាយឧត្តមសេនីយ៍ ខេង សុមេធ បានឧបត្ថម្ភនូវថវិកាជូននិវត្តន៍ជន ចូលរួមចំនួន៥០នាក់ ក្នុងម្នាក់ៗ ទទួលបាន ៥០ ម៉ឺនរៀល និងមន្ត្រីនគរបាលទាំងបំពាក់ឋានន្តរសក្កិ ផ្លាស់ប្តូរមុខតំណែង និងតែងតាំងមុខតំណែង ចំនួន៤៨៩នាក់ ដែលក្នុងម្នាក់ៗទទួលបានថវិកា ចំនួន១០ម៉ឺនរៀល និងយោងតាមការស្នើសុំរបស់មន្ត្រីនគរបាល នាយឧត្តមសេនីយ៍ខេង សុមេធ សម្រេចផ្តល់ជូននូវឧបករណ៍ អេឡិចត្រូនិចរីភីធើ ១កំប្លេ សម្រាប់តម្លើងនៅក្នុងនគរបាលវរសេនាតូច ការពារព្រំដែនគោក លេខ ៣១០ ទិសសំឡូត និងផ្តល់ម៉ូតូហុងដាឌ្រីម សេ១២៥ ស៊េរី២០១៥ ចំនួន១គ្រឿង ដល់អធិការដ្ឋាននគរបាល ស្រុករតនមណ្ឌល សម្រាប់ប្រើប្រាស់ក្នុងអង្គភាព៕
