ខេត្តបន្ទាយមានជ័យ៖ សម្តេចក្រឡាហោម ស ខេង រដ្ឋមន្ត្រីក្រសួងមហាផ្ទៃបានដាក់បញ្ជា កាលពីថ្ងៃទី១៦កញ្ញា២០១៥ឲ្យខេត្តជាប់ជាយដែនទាំងខាងកើតនិងខាងលិចនៃប្រទេសត្រូវលប់បំបាត់ច្រករបៀងខុសច្បាប់ ទប់ស្កាត់ទំនិញគេចពន្ធ និងបទល្មើសឆ្លងដែន ពលករចំណាកស្រុកខុសច្បាប់។
ជាក់ស្តែង ច្រកដែលកម្លាំងសមត្ថកិច្ចឃុបឃិតជាមួយឈ្មួញនាំចូលទំនិញទាំងយប់និងថ្ងៃនោះ មានដូចជាតំបន់ដែលគ្រប់គ្រង ដោយលោកវរៈសេនីយ៍ឯក ឃួន ជឿន មេបញ្ជាការរងកងពលតូចថ្មើរជើងលេខ៥១ និងជាមេបញ្ជាការវរៈសេនាតូចលេខ ៥១៥ បានលួចបើកច្រករបៀងដោយខុសច្បាប់មិនតិចជាង១០កន្លែង ដែលគ្រប់គ្រងលួចនាំទំនិញគេចពន្ធចូលទាំងយប់និងថ្ងៃធ្វើឲ្យបាត់បង់ចំណូលរដ្ឋ និងកើតមានបទល្មើសឆ្លងដែនទៀតផង។ក្រោយពេលលួចបើកច្រករបៀងខុសច្បាប់នោះលោកវរៈសេនីយ៍ឯក ឃួន ជឿន បានលួចបង្ហើបថា គាត់ចំណាយថវិកាច្រើនគួរសមដល់ស្ថាប័នពាក់ព័ន្ធ ដើម្បីបិតបាំងការលួចបើកច្រករបៀងដោយខុសច្បាប់នោះ។
លោក គោស៊ុំ សារឿត អភិបាលខេត្តធ្លាប់បានប្រាប់ថា ខេត្តបន្ទាយមានជ័យមានច្រករបៀងខុសច្បាប់ប្រមាណជាង៦០កន្លែង ដោយមានការណែនាំពីសម្តេចក្រឡាហោម ស ខេង រដ្ឋមន្ត្រីក្រសួងមហាផ្ទៃដាក់វិធានការលុបបំបាត់ឲ្យអស់នូវច្រករបៀងដោយខុសច្បាប់ ដើម្បីចូលរួមទប់ស្កាត់ទំនិញគេចពន្ធ និងបទល្មើសឆ្លងដែន ពលករចំណាកស្រុកជាដើម ៕
