ខេត្តរតនគិរីៈ ៖ រយៈពេលប៉ុន្មានឆ្នាំមុននិងរហូតមកដល់សព្វថ្ងៃនេះនាយកដែនជម្រកសត្វព្រៃលំផាត់បើកដៃអោយឧកញ៉ាថៃ លួចកាប់បំផ្លាញឈើប្រណិត និងឈើគ្រប់ប្រភេទយកទៅកែច្នៃក្នុងក្រុមហ៊ុនប៉ាស៊ីហ្វិច ខណៈដែលក្រុមហ៊ុននេះបញ្ចប់ការឈូសឆាយក្នុងដីសម្បទានរបស់ខ្លួន។
មានសេចក្តីរាយការណ៍មកពីសហគមន៍ស្រុកលំផាត់បានឲ្យដឹងថា រយៈពេលប៉ុន្មានឆ្នាំ និងរហូតមកដល់សព្វថ្ងៃនេះគេសង្កេតឃើញឧកញ៉ាថៃ បានដាក់ម៉ាស៊ីនរ៉ៃយ៉ាងហោចណាសពី១៥ទៅ២០ខ្សែដើម្បីជ្រៀកឈើប្រណិតនិងឈើដទៃទៀតនៅក្នុងទឹកដីសម្បទានរបស់ក្រុមហ៊ុនប៉ាស៊ីហ្វីចដែលក្រុមហ៊ុនមួយនេះបញ្ចប់ការឈូសឆាយសំរាប់ការដាំដុះដំណាំកៅស៊ូ។ ហើយឧកញ៉ារូបនោះបានឃុបឃិតគ្នាយ៉ាង ស៊ីសង្វាក់ជាមួយនាយកដែនជម្រកសត្វព្រៃលំផាត់កាប់នឹងដឹកជញ្ជូនឈើគ្រប់ប្រភេទយកទៅកែច្នៃនៅក្នុងទឹកដីសម្បទានក្នុងក្រុមហ៊ុននោះរួចធ្វើការនាំចេញទៅកាន់ទីផ្សារប្រទេសវៀតណាមខ្លះទៀតនៅក្នុងស្រុកដូចជាផ្សារស្វាយអន្ទរ អ្នកលឿង ស្វាយរៀង តាវែង និងស្រុកកំណើតរបស់ឧកញ៉ានៅផ្សារអូរាំងឪជាដើម ។ ចំណែកឯការផ្ទុកនឹងដឹកជញ្ជូនតាមរថយន្តយីឌុបខ្នាតយក្សសុទ្ធតែលើសទំងន់តោនហើយបំផ្លាញផ្លូវសាធារណៈចាប់ពីពេលចេញដំណើររហូតដល់គោលដៅ ហើយច្បាប់នាំឈើប្រណិតឫឈើដទៃទៀតរបស់ឧកញ៉ាថៃចំនួន៣រថយន្តប៉ុន្តែលោកលួចដាក់ទៅដល់១០រថយន្តឯណោះ។ ឥទ្ធិពលនៃការកាប់បំផ្លាញឈើប្រណិតនៅដែនជម្រកសត្វព្រៃលំផាត់និងជំនួញឈើគ្រប់ប្រភេទបានធ្វើឲ្យឧកញ៉ាថៃសង់វិឡាដ៏ស្កឹមស្កៃនៅក្បែរសាលាស្រុកអូរាំងឪក្នុងទឹកដីខេត្តកំពង់ចាមនិងខេត្តត្បូងឃ្មុំ ក្នុងពេលបច្ចុប្បន្ននេះនិងធ្វើឲ្យរូបលោកមានទ្រព្យសម្បត្តិយ៉ាងច្រើននិងក្លាយជាមហាសេដ្ឋីទាំងមិនដឹងខ្លួន។
គួរបញ្ជាក់ថា ជុំវិញការកាប់ឈើប្រណិតឫឈើដ៏ទៃទៀតនៅដែនជម្រកសត្វព្រៃលំផាត់ការដឹកជញ្ជូនច្បាប់ទម្លាប់ផ្សេងទៀតនោះតើមានច្បាប់ត្រឹមត្រូវយ៉ាងណានៅព្រឹកថ្ងៃទី១៥ ខែកញ្ញា ឆ្នាំ២០១៥ ឧកញ៉ារូបនោះមិនអាចសំភាសពន្យល់ណាមួយបានទេ។ ចំណែកលោកអ៊ូ សុធី នាយកដែនជម្រកសត្វព្រៃលំផាត់ដែលតំណាងអោយក្រសួងបរិស្ថានមិនអាចសុំការបំភ្លឺណាមួយបានទេដោយលេខទូស័ព្ទរបស់លោកប្រគល់ទៅអោយអ្នកដ៏ទៃកាន់ទៅវិញ ។
បញ្ជាក់ថាដីដែនជម្រកសត្វព្រៃលំផាត់មានចំនួនជាង២០ម៉ឺនហិកតា ដូច្នេះហើយក្រុមឈ្មួញទុចរិកទាំងនោះមានឪកាសកាប់បំផ្លាញឈើទាំងនោះណាស់៕
ជីវា
