បន្ទាយមានជ័យ: កាំកុងត្រូលក្រុងប៉ោយប៉ែតកាន់តែមានភាពល្បីល្បាញជាបន្តបន្ទាប់ទាក់ទងទៅនិងអំពើពុករលួយ។ កាលពីថ្ងៃទី០៧ ខែធ្នូរ ឆ្នាំ២០១៨ វេលាម៉ោង៩:៣០ នាទីព្រឹកមន្ត្រីកាំកុងត្រូលក្រុងប៉ោយប៉ែតមានគ្នាចំនួន៣នាក់បានធ្វើការឃាត់គ្រឿងក្នុងជ្រូកដែលគ្មានការវិចខ្ចប់និងគ្មានអនាម័យនៅទីលានត្រួតពិនិត្យបាន១៥០០គីឡូក្រាម ស្ថិតនៅភូមិប៉ោយប៉ែត ក្រុងប៉ោយប៉ែត សង្កាត់ប៉ោយប៉ែត ចំនែកកម្មករអូសរទេះបានរត់គេចខ្លួនបាត់ស្រមោលភ្លាមៗ បន្ទាប់មកមន្រី្តជំនាញបានយកទៅស្នាក់ការកាំកុងត្រូលដើម្បីធ្វើការត្រួតពិនិត្យ។
នៅថ្ងៃខែឆ្នាំដដែលលោក សាន វិជ្ជាសារ៉ាវុធ ប្រធានសាខាកាំកុងត្រូលខេត្តបន្ទាយមានជ័យបានឲ្យសារព័ត៌មានយើងដឹងតាមទូរស័ព្ទថា គ្រឿងក្នុងជ្រូក១៥០០គីឡូក្រាមដែលចាប់បាននោះគឺលទ្ធផលក្រោយត្រួតពិនិត្យបានអោយដឹងថា ពុំមានសារធាតុគីមីនោះទេ ដោយគ្រាន់តែក្រុមឈ្មួញមិនបានវិចខ្ចប់អោយបានល្អនិងគ្មានអនាម័យតែប៉ុណ្ណោះ។ លោកបន្តថា ខាងមន្ត្រីជំនាញរបស់លោកបានរងចាំម្ចាស់ចូលខ្លួនទៅដោះស្រាយតែពុំឃើញមានអ្នកណាម្នាក់ចូូលខ្លួនទៅដោះស្រាយនោះទេ។
នៅថ្ងៃដដែលបើយោងតាមប្រភពមួយបានអោយដឹងថា គ្រឿងក្នុងជ្រូក១៥០០គីឡូក្រាមក្រោយពីធ្វើការត្រួតពិនិត្យនិងរងចាំម្ចាស់អស់រយះពេលពេញ១ថ្ងៃមិនឃើញចូលខ្លួនដោះស្រាយមន្ត្រីកាំកុងត្រួលមានគ្នា៣នាក់ក៏បានដឹកជញ្ជួនគ្រឿងក្នុងជ្រូកយកទៅអោយក្រពើសុី ដែលមានទីតាំងស្ថិតនៅក្នុងភូមិចាន់គីរី សង្កាត់ប៉ោយប៉ែត ក្រុងប៉ោយប៉ែត បន្ទាយមានជ័យ។ ក៏ប៉ុន្តែអ្វីដែលហួសចិត្តនោះ ស្រាប់តែមានប្រភពលេចលឺមកថា មានមន្ត្រីកាំកុងត្រូលម្នាក់ក្នុងចំណោម៣នាក់បានឈ្លៀតឱកាសយកលុយពីម្ចាស់ចិញ្ចឹមក្រពើ១២០០០០រៀល(មួយលានពីរសែនរៀល)ជាថ្នូរទៅនិងគ្រឿងក្នុងជ្រូក។
ពាក់ព័ន្ធការចោទប្រកាន់ដូចខាងលើលោក សាន វិជ្ជាសារ៉ាវុធ បានអោយសារព័ត៌មានយើងដឹងថា ចំពោះមន្ត្រីក្រោមឱវាទរបស់លោកដែលលឺថាបានយកគ្រឿងក្នុងជ្រូកទៅអោយម្ចាស់ចិញ្ចឹមក្រពើហើយយកលុយ១២០០០០រៀល(មួយលានពីរសែនរៀល)នោះ គឺលោកមិនបានដឹងនោះទេ៕
