កោះកុង ៖ តាមសាចក្ដីរាយការណ៌ពីប្រជាពលរដ្ឋនឹងមន្ដ្រីមួយចំនួននៅក្នុងឃុំកោះស្ដេច ស្រុកគិរីសាគរ និងឃុំប៉ាក់ខ្លង ស្រុកមណ្ឌលសីមា ខេត្តកោះកុង បានបង្ហើបឲ្យដឹងថាបច្ចុប្បន្ននេះរបរនេសាទជាលក្ខណៈគ្រួសាររបស់ពួកគាត់ប្រឈមនឹងការលំបាកយ៉ាងខ្លាំងព្រោះទូកនេសាទធំៗរបស់យួននិងសៀមរាប់រយគ្រឿងចូលមកធ្វើសកម្មភាពនេសាទក្នុងដែនសមុទ្រខេត្តកោះកុង យ៉ាងមហន្តរាយ។
ចំណែកលោក ឡាង គិរី នាយខណ្ឌរដ្ឋបាលជលផលខេត្តកោះកុង និងសមត្ថកិច្ចពាក់ព័ន្ធដទៃទៀតកំពុងសប្បាយប្រមូលលុយពីការឃុបឃិតបើកដៃឲ្យទូកនេសាទរបស់យួននិងសៀមចូលមកបំផ្លាញធនធានមច្ឆជាតិក្នុងផ្ទៃសមុទ្រខ្មែរនៅខេត្តកោះកុង យ៉ាងគគ្រឹកគគ្រេង។ ចំណែកលោកស្រី មិថុនា ភូថង អភិបាលខេត្តកោះកុង កំពុងរក្សាភាពស្ងៀមស្ងាត់ ហេតុនេះហើយទើបប្រជាពលរដ្ឋអំពាវនាវសូមឯកឧត្តម វេង សាខុន រដ្ឋមន្ត្រីក្រសួងកសិកម្ម និងលោក អេង ជាសាន អគ្គនាយករដ្ឋបាលជលផល ចាត់វិធានការទប់ស្កាត់បញ្ហាខាងលើនេះផង។
ប្រភពពីមន្ត្រីអាជ្ញាធរក្នុងឃុំកោះស្ដេច ស្រុកគិរីសាគរ និងឃុំប៉ាក់ខ្លង ស្រុកមណ្ឌលសីមា បានឲ្យដឹងថា សមត្ថកិច្ចពាក់ព័ន្ធជាច្រើនស្ថាប័នកំពុងឃុបឃិតគ្នាប្រមូលលុយពីការបើកដៃឲ្យទូកយួន ទូកសៀម ធំៗរាប់រយគ្រឿងចូលមកធ្វើសកម្មភាពនេសាទក្នុងដែនសមុទ្រខ្មែរ។ ក្នុងនោះមន្ត្រីដែលមានសមត្ថកិច្ចទទួលបន្ទុកបង្ក្រាបបទល្មើសលើផ្ទៃសមុទ្រ គឺជាអ្នកឃុបឃិតឲ្យទូកយួន ទូកសៀម ចូលមកបំផ្លាញធនធានមច្ឆជាតិក្នុងសមុទ្រខ្មែរ ហើយពួកគេទទួលបានលុយច្រើនសន្ធឹកសន្ធាប់យកទៅចែកគ្នាធ្វើមានធ្វើបាន។
ប្រភពបានឲ្យដឹងថា លោក ពុំ សុថា មានឋានៈជាអធិការទូកសមុទ្រមានកប៉ាល់ប្រដេញ២គ្រឿងរហស្សនាម01និង02 គ្រប់គ្រងដោយលោក ស៊ិន ផលគុណ និងលោក ងួន ម៉េង ដែលមានស្នាក់ការនៅខេត្តព្រះសីហនុ គឺជាអ្នកឃុបឃិតបើកដៃឲ្យទូកនេសាទយួននិងទូកនេសាទសៀមចូលមកធ្វើសកម្មភាពនេសាទក្នុងដែនសមុទ្រខេត្តកោះកុង។
ប្រភពពីមន្ត្រីអាជ្ញាធរឃុំកោះស្ដេច ឃុំប៉ាក់ខ្លង បានឲ្យដឹងទៀតថា លោកឧត្តមនាវីទោ ឯក សំអាន ជានាយរងបញ្ជាការដ្ឋានលំហសមុទ្រប្រចាំការលើនាវាល្បាតឈរជើងនៅកោះស្ដេច ក៏មានជាប់ពាក់ព័ន្ថនឹងបទល្មើសដែរ។ លោកឧត្តមសេនីយ៍ អាន ស្រៀង អនុប្រធាននាយកដ្ឋាននគរបាលព្រំដែនទឹកទទួលទិសភូមិភាគដែនសមុទ្រខេត្តកោះកុង មាននាវាល្បាតប្រចាំការនៅអង្គភាពវរសេនាតូចលេខ២៦៩ ឃុំប៉ាក់ខ្លង ក៏មានជាប់ពាក់ព័ន្ធនឹងបទល្មើសនេសាទ។
ជាមួយគ្នានេះលោកឧត្តមសេនីយ៍ត្រី យឹម សម្បត្តិ មេបញ្ជាការរងតំបន់ប្រតិបត្តិការសឹករងខេត្តកោះកុង និងជាប្រធានស្នាក់ការបង្ក្រាបបទល្មើសនានាលើផ្ទៃសមុទ្រក៏មានជាប់ពាក់ព័ន្ធនឹងបទល្មើសនេសាទផងដែរ។ ប្រភពបានឲ្យដឹងទៀតថា មន្ត្រីសមត្ថកិច្ចដូចរៀបរាប់ឈ្មោះខាងលើនេះហើយ ដែលជាអ្នកឃុបឃិតឲ្យទូកនេសាទសៀម ទូកនេសាទយួន រាប់រយគ្រឿងចូលមកនេសាទដោយប្រើប្រាស់ខុសច្បាប់ក្នុងដែនសមុទ្រនៃខេត្តកោះកុង ដោយគ្មានញញើតអ្វីទាំងអស់ពីព្រះអំណាចនេះហើយ..?៕
