ខេត្តប៉ៃលិន ៖ បុរសម្នាក់អះអាងថា មេជាងម៉ៅការសំណង់គ្រោងឆ្អឹងដំបូលព្រះវិហារវត្តបេងសុវណ្ណារាម បានចោទប្រកាន់ ថា ចៅអធិការវត្តនេះថា មិនព្រមទូទាត់សងជំពាក់ថ្លៃការសាងសង់គ្រោងឆ្អឹងដំបូលព្រះវិហារតាមកិច្ចសន្យា ខណៈ ជំពាក់លុយគាត់រហូតដល់ ១១.៣០០ដុល្លារ លុះពេលបុណ្យទានម្តងៗ ទទួលបានបច្ច័យជាច្រើន បែរជាសងត្រឹមតែ ប្រាំម៉ឺន ទៅដប់ម៉ឺនរៀលប៉ុណ្ណោះ ទើបរឿងនេះគាត់ប្តឹងទៅតុលាការខេត្តប៉ៃលិន ឱ្យជួយរកយុត្តិធម៌ ។
បើតាមសម្តីលោក ឈុំ ភឿន ជាមេជាងម៉ៅការសំណង់ រស់នៅភូមិអូរច្រាកណ្តាល សង្កាត់ទួលល្វា ក្រុងប៉ៃលិន បានរៀបរាប់ឱ្យដឹងថា លោកបានចូលទៅម៉ៅការសាងសង់គ្រោងឆ្អឹងដំបូលព្រះវិហារវត្តបេងសុវណ្ណា រាម កាលពីឆ្នាំ២០១០ ហើយក៏ធ្វើរួចរាល់នៅក្នុងឆ្នាំដដែលនេះ ដោយទទួលម៉ៅការត្រឹមតែគ្រោងឆ្អឹងដែក និងក្បឿងប៉ុណ្ណោះ សរុបចំនួន ១៧.០០០ដុល្លារ ។ លោកបន្តទៀតថា ក្រោយមកចៅអធិការវត្តនេះបានសងថ្លៃ ជំពាក់បន្តបន្ទាប់ដោយនៅសល់ ១១.៣០០ដុល្លារទៀត ។
គួររំលឹកផងដែរថា យោងតាមកិច្ចសន្យាចុះថ្ងៃទី ២១ ខែមិថុនា ឆ្នាំ២០១០កន្លងទៅរបស់ព្រះចៅអធិការ វត្តនេះ និងលោកតាអាចារ្យ គណៈកម្មការវត្ត ដោយមានស្នាមមេដៃមេភូមិ និងហត្ថលេខាត្រារបស់មេឃុំស្ទឹងកាច់ ទទួលស្គាល់លើកិច្ចសន្យាដែលវត្តនេះជំពាក់ប្រាក់លោកខ្វះជាង ១ម៉ឺនដុល្លារ ហើយព្រះចៅអធិការសន្យាដូចតទៅ ៖ ទី១-បុណ្យផ្កា, ទី២-បុណ្យចូលឆ្នាំថ្មីប្រពៃណីជាតិ, ទី៣-បុណ្យភ្ជុំបិណ្ឌ, ទី៤-បុណ្យកឋិនទាន ដោយបច្ច័យចំណូល បុណ្យនីមួយៗ សន្យាសងជាងម៉ៅការផ្សេងចំនួន ៣០ភាគរយ ទុកសម្រាប់វត្ត ១០ភាគរយ និងនៅ ៦០ភាគរយ សងជូន ទៅឈ្មោះ ឈុំ ភឿន រហូតដល់អស់ ។ ប៉ុន្តែទោះបីជាយ៉ាងងណាក៏ដោយចៅអធិការវត្តមិនបានធ្វើតាមកិច្ច សន្យានោះឡើយ ដោយបន្ទាប់ពីបុណ្យទានម្តងៗសងត្រឹមតែ ៥ម៉ឺន ទៅ ១០ម៉ឺនរៀលប៉ុណ្ណោះ ធ្វើឱ្យលោកកើតទុក្ខ មិនសុខចិត្តទើបដាក់ពាក្យប្តឹងទៅតុលាការខេត្តប៉ៃលិនឱ្យចាត់ការរឿងនេះទៅតាមច្បាប់ ។
លោក សំ សាវឿន ប្រធានមន្ទីរធម្មការ និងសាសនា ខេត្តប៉ៃលិនបានឱ្យដឹងតាមទូរស័ព្ទថា ការជំពាក់ប្រាក់ ជាងនោះ ខាងលោកក៏ដឹងដែរ ប៉ុន្តែក្រោយមករឿងនេះត្រូវគេបញ្ជូនទៅតុលាការខេត្តហួសពីដៃរបស់លោកហើយ មិនអាចធ្វើការសម្របសម្រួលបានទេ ។ ជុំវិញបញ្ហានេះ ភ្នាក់ងារសារព័ត៌មានមិនអាចទាក់ទងលោក កង ថេង មេឃុំស្ទឹងកាច់ដើម្បីសុំការបំភ្លឺបៅនទេ ដោយសារទូរស័ព្ទចូលហើយអត់មានអ្នកទទួល ។
ចំណែកព្រះតេជគុណ ឃុត ចាន់ហ៊ាង ចៅអធិការវត្តបេងសុវណ្ណារាម ដែលទើបតែនឹងចូលគង់នៅវត្តនេះ បានឱ្យដឹងថា ខាងវត្តបានសងទៅមេការសំណង់លោក ឈុំ ភឿន ជាបណ្តើរៗតាំងពីដើមមកដោយនៅសល់ត្រឹមតែ ៧.០៨០ដុល្លារប៉ុណ្ណោះ ។ ព្រះតេជគុណបញ្ជាក់ទៀតថា បើមេជាងឱ្យខាងវត្តសងរហូតដល់ ៦០ភាគរយ គឺមិនអាច ធ្វើទៅរួចបានទេ ព្រោះបច្ច័យដែលទទួលបានមកពីបុណ្យទានម្តងៗ យកទៅសងថ្លៃជំពាក់ជាងដទៃទៀត និងយក ទៅកសាងវត្តបន្ថែម ដូច្នេះសងតាមលទ្ធភាពដែលវត្តអាចធ្វើទៅបានតែប៉ុណ្ណោះ ៕
