នគរបាល២ខណ្ឌ តាមបង្ក្រាបឃាត់ខ្លួនក្រុមដៃស្អិត២នាក់ នៅខណ្ឌឫស្សីកែវ ក្រោយឆក់ទូរស័ព្ទបានសម្រេចនៅខណ្ឌទួលគោក
(ភ្នំពេញ)៖ កម្លាំងអធិការដ្ឋាននគរបាល២ខណ្ឌ (ខណ្ឌឫស្សីកែវ និងខណ្ឌទួលគោក) នៃស្នងការដ្ឋាននគរបាលរាជធានីភ្នំពេញ បានដេញតាមបង្ក្រាបក្រុមដៃស្អិត (ឆក់ទូរស័ព្ទ) បានចំនួន២នាក់ និងដកហូតវត្ថុតាងជិះធ្វើសកម្មភាព មានម៉ូតូ១គ្រឿងម៉ាក Suzuki Nex ពណ៌សលាយខៀវ ពាក់ផ្លាកលេខ ភ្នំពេញ ១KO-៤៦៤៣ និងទូរស័ព្ទដៃ០១គ្រឿងផងដែរ ម៉ាក Iphone11 ពណ៌ស ដែលជារបស់ជនរងគ្រោះ។
កម្លាំងនគរបាលខណ្ឌទាំង២ ដែលបានសហការគ្នាតាមបង្ក្រាបក្រុមឆក់ទូរស័ព្ទដៃទាំង២នាក់នេះ បាននៅចំណុចតាមបណ្ថោយកំណាត់ផ្លូវជាតិលេខ ក្នុងសង្កាត់គីឡូត៍ម៉ែត្រលេខ៦ ខណ្ឌឬស្សីកែវ បន្ទាប់ពីធ្វើសកម្មភាពឆក់ទូរស័ព្ទបានសម្រេចនៅតាមបណ្ដោយផ្លូវលេខ២៩១ ក្រុមទី៦៤ ភូមិ១៣ សង្កាត់បឹងកក់ទី២ ខណ្ឌទួលគោក រាជធានីភ្នំពេញ កាលពីយប់ថ្ងៃទី១៣ ខែតុលា ឆ្នាំ២០២៤។
តាមរយៈរបាយការណ៍ សមត្ថកិច្ចបានបញ្ជាក់ថា សម្រាប់ជនសង្ស័យដែលបង្ក្រាប និងឃាត់ខ្លួនបានក្នុងករណីឆក់ទូរស័ព្ទបានសម្រេចនេះទី១-ឈ្មោះ ទ្រី ប៊ុនហាប់ ហៅហាប់ អាយុ១៨ឆ្នាំ មុខរបរមិនពិតប្រាកដ ស្នាក់នៅបន្ទប់ជួលមួយកន្លែង សង្កាត់ផ្សារកណ្ដាលទី១ ខណ្ឌដូនពេញ ហើយសម្រាប់ជនសង្ស័យទី២ ដែលជាបក្ខពួកឈ្មោះ ហ៊ុន សេង ហៅសេង អាយុ១៨ឆ្នាំ មុខរបរមិនពិតប្រាកដ ស្នាក់នៅផ្ទះជួល តាមបណ្ដោយផ្លូវបេតុងមួយកន្លែង ក្នុងសង្កាត់ទន្លេបាសាក់ ខណ្ឌចំការមន។
របាយការណ៍ដដែលរបស់សមត្ថកិច្ច បានបញ្ជាក់ទៀតថា សម្រាប់ជនរងគ្រោះក្នុងករណីនេះមានឈ្មោះ ផាន គីមហួយ ភេទស្រី អាយុ២១ឆ្នាំ ជនជាតិខ្មែរ មុខរបរនៅផ្ទះ ស្នាក់នៅផ្ទះជួលមួយកន្លែង តាមផ្លូវបេតុង ក្នុងសង្កាត់ទន្លេបាសាក់ ខណ្ឌចំការមន។
យ៉ាងណាក៏ដោយ នៅក្នុងករណីនេះ សម្រាប់ជនសង្ស័យទាំង២នាក់ និងវត្ថុតាងពាក់ព័ន្ធសកម្មភាពឆក់ទូរស័ព្ទ ត្រូវបាននឹងកំពុងស្ថិតក្រោមការស្រាវនៅឡើយ និងបន្តឃាត់ និងឃុំខ្លួនបណ្ដោះអាសន្ននៅអធិការដ្ឋាននគរបាលខណ្ឌឬស្សីកែវ ដើម្បីរៀបចំកសាងសំណុំរឿងបញ្ជូនបន្តទៅកាន់សាលាដំបូងរាជធានីភ្នំពេញ ដើម្បីចាត់ការទៅតាមនិតិវិធីច្បាប់៕
