កំពត-កែប ៖ បន្ទាប់ពីអាកាសធាតុអំណោយផល គឺពុំមានភ្លៀងធ្លាក់បង្កបញ្ហានោះ នៅថ្ងៃទី២៦ខែសីហា ឆ្នាំ២០១៨នេះ ក្រុមការងារជំនាញក្នុងខេត្តកំពត បានខិតខំជួសជុលផ្លូវជាតិលេខ៣៣យ៉ាងមមាញឹក ចាប់ពីទីប្រជុំជនផ្សារជុំគ្រៀល រហូតដល់ភូមិសាស្ត្រឃុំត្រពាំងសង្កែ នៃស្រុកទឹកឈូ ខេត្តកំពត។
ជាទូទៅចំណុចដងផ្លូវខាងលើដែលមានចំងាយប្រមាណ៩គីឡូម៉ែត្រ តភ្ជាប់ពីភូមិតាអេង បន្តរហូតដល់ចំណុចចំការសាវម៉ាវ នៃភូមិសាស្ត្រឃុំត្រពាំងសង្កែ ស្ថានភាពផ្លូវបានរងការខូចខាតស្ទើទាំងស្រុងខណៈមានរថយន្តខ្នាតធំផ្ទុកធ្ងន់ៗបើកសង្កត់ពីលើគ្មានអាសូរ ហើយគាប់ជួននៅពេលថ្មីៗនេះខេត្តកំពតក៏បានរងនូវគ្រោះធម្មជាតិ គឺភ្លៀងធ្លាក់ជាប់ៗគ្នាមិនឈប់ ទើបបណ្តាលឱ្យដងផ្លូវនេះមិនអាចទប់ទល់នឹងទម្ងន់យ៉ាងធ្ងន់របស់រថយន្តនោះបានឡើយ។
ទោះជាមានការជួសជុលផ្លូវបែបនេះក៏ដោយ នៅតែមានមជ្ឈដ្ឋានជាច្រើនបានលើកឡើងរិះគន់ទៅលើផ្នែកម៉ៅការស្ថាបនាផ្លូវកន្លងមកដោយគ្មានបទដ្ឋានបច្ចេកទេសច្បាស់លាស់ ពោលគឺកេងបន្លំគុណភាពធ្វើឲ្យដងផ្លូវងាយឆាប់ខូចខាត និយាយឲ្យចំ គឺការធ្វើផ្លូវរមែងអនុវត្តតាមគោលការណ៍ ចាក់ស្តើងសីុក្រាស់ ចាក់ក្រាស់សីុស្តើង ទើបផ្លូវគ្មានគុណភាពបែបនេះ។ជាក់ស្តែងផ្លូវជាតិចំណុចខេត្តកំពតមួយចំនួន ដូចជាផ្លូវជាតិលេខ៣ ផ្លូវជាតិលេខ៣៣ជាដើម ត្រូវរងការខូចខាតស្ទើតែទាំងស្រុងតែម្តង។មជ្ឈដ្ឋានដដែលបានបញ្ជាក់ថា ក្នុងការស្ថាបនាផ្លូវមួយខ្សែរាប់រយគីឡូម៉ែត្រគឺមានក្រុមហ៊ុនម៉ៅការជាច្រើនបានដេញថ្លៃធ្វើផ្លូវ ដោយក្រុមហ៊ុនខ្លះដេញបាន១០គីឡូម៉ែត្រ ខ្លះតិចឬលើសពីនេះ ហើយនាំគ្នាអនុវត្តការងារទៅតាមជំនាញ។ប៉ុន្តែក្នុងចំណោមផ្លូវរងការខូចខាតខ្លាំង គេបានសង្កេតឃើញផ្លូវតភ្ជាប់ពីទីប្រជុំជនក្រុងកំពត ឆ្ពោះទៅកាន់បណ្តាស្រុកមួយចំនួននៃខេត្តកំពត ដូចជាផ្លូវជាតិលេខ៣ពីផ្លូវរថភ្លើងខេត្តទៅដល់ចំណុចភូមិសាស្ត្រស្រុកដងទង់ និងផ្លូវជាតិលេខ៣៣ពីភូមិតាអេង មកដល់ចំការសាម៉ាវ នៃភូមិសាស្ត្រឃុំត្រពាំងសង្កែ ស្រុកទឹកឈូ។គេបានអះអាងថា ផ្លូវខាងលើនេះពិតជាឆាប់រងការខូចខាតមិនដឹងមកពីកត្តាធម្មជាតិ ការស្ថាបនាខ្វះបច្ចេកទេស ឬការកេងបន្លំគុណភាពនោះទេ។
មជ្ឈដ្ឋានបានលើកឡើងទៀតថា ដងផ្លូវមួយនេះគេតែងតែជួសជុលមិនចេះស្បើយ ហើយក៏ក្លាយជាផ្លូវធ្វើជាប់រហូតផងដែរ។
ដោយឡែកចំពោះ កំណាត់ផ្លូវជាតិលេខ៣៣ចំណុច ចន្លោះគីឡូម៉ែត្រ ២៤+៥០០ រហូតដល់គីឡូម៉ែត្រ ២៥+២០០ ត្រូវបានក្រុមការងារជំនាញ ចាប់ផ្តើមជួសជុលយ៉ាងសស្រាក់សស្រាំ ដើម្បីសម្រួលការលំបាកដល់អ្នកដំណើតាមមធ្យោបាយនានា។
គួរបញ្ជាក់បន្ថែមថា ផ្លូវជាតិលេខ៣៣ពីខេត្តកំពតមកដល់ស្រុកកំពង់ត្រាច មានប្រវែង៣៦គីឡូម៉ែត្រ ត្រូវរងការខូចខាតជាច្រើនអន្លើ ក្នុងចំណោមនោះ ដងផ្លូវជាតិលេខ៣៣ដែលឆ្លងកាត់ភូមិសាស្ត្រខេត្តកែប គឺរងការខូចខាតមួយផ្នែកប៉ុណ្ណោះ ដោយឡែកចំពោះចំណុចផ្លូវចាប់ពីទីប្រជុំជនឃុំជុំគ្រៀលរហូតដល់ចំណុចភូមិកំពង់កែស ឃុំត្រពាំងសង្កែដែលមានចម្ងាយប្រមាណជិត៩គ.ម នោះ បានរងការខូចខាតយ៉ាងដំណំ៕
សេង ណារិទ្ធ
