(កំពត)៖ នៅព្រឹកថ្ងៃទី០៧ ខែកក្កដា ឆ្នាំ២០១៨ នេះ គណបក្សប្រជាជនកម្ពុជាខេត្តកំពត បានរៀបចំពិធីដង្ហែក្បួនឃោសនាបោះឆ្នោត ដែលជួបជុំសមាជិក សមាជិកា នៅរង្វង់មូលទុរេនខេត្តកំពត ។ ក្នុងកម្មវិធីដ៏មហោឡារឹកនាថ្ងៃរៀបចំក្បួនដង្ហែឃោសនាបោះឆ្នោតរបស់គណបក្សប្រជាជនកម្ពុជាខេត្តកំពតនាព្រឹកនេះ ក្រោមវត្តមានចូលរួមជាអធិបតី លោក បណ្ឌិតប៉ែន ស៊ីម៉ន អនុប្រធានក្រុម
ការងារថ្នាក់ជាតិចុះពង្រឹងខេត្តកំពត លោក ជាវ តាយ សមាជិកកណ្តាលគណៈកម្មាធិការបក្សប្រជាជនកម្ពុជានិងជាប្រធានគណៈកម្មាធិការបក្សប្រជាជនកម្ពុជាខេត្តកំពត និងមានការអញ្ជើញចូលរួម ពីលោក លោកស្រី ជាសមាជិកក្រុមការងារថ្នាក់ជាតិចុះជួយខេត្តកំពតជាច្រើនរូបទៀត។
ជាមួយគ្នានេះដែរនៅក្នុងពិធីដង្ហែរក្បួនឃោសនាបោះឆ្នោតរបស់គណបក្សប្រជាជនកម្ពុជាខេត្តកំពតនាថ្ងៃនេះផងដែរក៏មានវត្តមានចូលរួមពីថ្នាក់ដឹកនាំបក្សមូលដ្ឋាននិងសមាជិកសមាជិការបក្សមូលដ្ឋានមកចូលរួមពីរក្រុង-ស្រុកផងដែរ គឺ៖ ស្រុកទឹកឈូ និងក្រុងកំពត សរុបសមាជិកចូលរួមប្រមាណជាង៥ពាន់នាក់ផងដែរ។
របៀបវីរៈក្នុងកម្មវិធីនាព្រឹកនេះ បន្ទាប់ ពីសមាជិកសមាជិការបក្សមកជួបជុំគ្នានៅក្នុងរង្វង់មូលទុរេនរួចមក អង្គពិធីទាំងមូលបានស្តាប់សេចក្តីថ្លែងការណ៍របស់ សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា ថ្លែងអំពីគោលនយោបាយរបស់គណបក្សប្រជាជន នៅពេលគណបក្សប្រជាជនជាប់ឆ្នោត ហើយសម្តេចនិងត្រូវបានតែងតាំងជានាយករដ្ឋមន្ត្រីអាណត្តិទី៦នេះ ជូនជនរួមជាតិយ៉ាងមានអត្ថន័យដ៏ជ្រាលជ្រៅ តាំងពីការតម្លើងប្រាក់បៀវត្សមន្ត្រីរាជការ កម្មកររោចក្រ គ្រូបង្រៀន ការគិតគូសេវាព្យាបាលដល់ស្ត្រីដែលបានសម្រាលកូននៅមូលដ្ឋាន និងមានគោលនយោបាយដែលត្រូវដោះស្រាយជូនប្រជាពលរដ្ឋនិងមន្ត្រីរាជការកងកម្លាំងប្រដាប់អាវុធជាច្រើនករណីថែមទៀតនៅក្នុងការដឹកនាំរាជរដ្ឋាភិបាលអាណត្តិទី៦(២០១៨-២០២៣) នេះ។
បន្ទាប់ពីស្តាប់សេចក្តីថ្លែងការរបស់សម្តេចប្រធានគណបក្សប្រជាជនរួចមក លោកបណ្ឌិត ប៉ែន ស៊ីម៉ន ប្រធានអង្គពិធីបានថ្លែងសម្រែកជ័យឃោស រួចហើយអង្គពិធីទាំងមូលបានចាប់ផ្តើមរៀបចំក្បួនដង្ហែរ ចេញពីរង្វង់មូលទុរេនខេត្តតាមបណ្តោយផ្លូវជាតិលេខ៣ រហូតដល់ផ្លូវចូលតាមវត្តប្រឡាយមាស ស្ថិតក្នុងឃុំកណ្តោល ស្រុកទឹកឈូ រួចចេញតាមផ្លូវបំបែកស្រុកទឹកឈូវិលចូលមកកាន់រង្វង់មូលទរេនកំពតវិញ ទើបក្បួនដង្ហែរបំបែកគ្នាវិលទៅកាន់មូលដ្ឋានរៀងៗខ្លួនវិញនិងបញ្ចប់ការដង្ហែរក្បួនឃោសនា នាព្រឹកដដែលនេះ៕
សេង ណារិទ្ធ
