កែប ៖ ការធ្វើព្យុះហយាត្រាដង្ហែក្បួនមុនពេលបោះឆ្នោតជ្រើសតាំង តំណាងរាស្ត្រនីតិកាលទី៦ឆ្នាំ២០១៨នេះ ក្រុមការងារទាំងអស់នឹងត្រូវប្រើមធ្យោបាយប្រភេទម៉ូតូឱ្យបានគ្រប់ៗគ្នាដើម្បីឱ្យការដង្ហែក្បួនកាន់តែមានភាពងាយស្រួលទៅដល់គោលដៅគ្រប់មូលដ្ឋាន។
ការលើកឡើងបែបនេះ ជាប្រសាសន៍ របស់ ឯកឧត្តម កិតិ្តសេដ្ឋាបណ្ឌិត ចម ប្រសិទ្ធ សមាជិក គណៈកម្មាធិការកណ្តាល ប្រធានក្រុមការងារថ្នាក់កណ្តាលចុះជួយខេត្តកែប ថ្លែងក្នុងកិច្ចប្រជុំ ក្រុមការងារគ្រប់ថ្នាក់ ឆ្ពោះទៅការបោះឆ្នោតជ្រើសតាំងតំណាងរាស្ត្រនីតិកាលទី៦ ឆ្នាំ២០១៨ នៅមន្ទីរគណបក្សប្រជាជនកម្ពុជាខេត្តកែប កាលពីព្រឹកថ្ងៃអាទិត្យ ៦កើត ខែជេស្ឋ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី២០ខែឧសភា ឆ្នាំ២០១៨។
ឯកឧត្តមកិតិ្តសេដ្ឋាបណ្ឌិត ចម ប្រសិទ្ធ បានបញ្ជាក់ទៀតថា ក្រុមការងារនៅតាមឃុំ សង្កាត់ត្រូវត្រៀមលក្ខណៈសម្រាប់ការធ្វើព្យុះហយាត្រា ដែលនឹងត្រូវអនុវត្តន៍ជាទ្រង់ទ្រាយធំ ដើម្បីដង្ហែក្បួននៅតាមដងផ្លូវសាធារណៈឆ្ពោះទៅកាន់គ្រប់ភូមិសាស្ត្រនៃតំបន់ខេត្តកែបទាំងមូល។លោកថា សកម្មភាពនេះនឹងប្រព្រឹត្តទៅរយៈពេល២១ថ្ងៃ ដោយតម្រូវឱ្យយើងត្រូវរួមគ្នាគិត រួមគ្នាធ្វើនិងដោះស្រាយឱ្យបានហ្មត់ចត់បំផុត។ពិសេសក្នុងការធ្វើព្យុះហយាត្រានេះ បើកាន់តែមានភាពងាយស្រួលជាងមុនគឺការដង្ហែក្បួនប្រើប្រាស់ជាមធ្យោបាយម៉ូតូ ព្រោះវាចំណាយតិចប៉ុន្តែមានប្រសិទ្ធភាពខ្ពស់ជាងមធ្យោបាយរថយន្ត។ម៉ូតូអាចធ្វើឱ្យការដង្ហែឆ្ពោះទៅដល់គោលដៅគ្រប់មូលដ្ឋាន។
ជាមួយនេះ ឯកឧត្តមកិតិ្តសេដ្ឋាបណ្ឌិត ចម ប្រសិទ្ធ ក៏បានជំរុញដល់កងកម្លាំងប្រដាប់អាវុធចុះពង្រឹង រក្សាសន្តិសុខ សុវត្ថិភាពឱ្យបានល្អ ដើម្បីរក្សាសណ្តាប់ធ្នាប់ការដង្ហែព្យុះហយាត្រាប្រកបដោយសុវត្ថិភាព។លោកបានបញ្ជាក់ថា ការបោះឆ្នោតជ្រើសតាំងតំណាងរាស្ត្រនីតិកាលទី៦នេះ បើទោះជាគ្មានវត្តមានគណបក្សប្រឆាំង ក៏ការបោះឆ្នោតមានភាពសុក្រឹត្យ តម្លាភាព ព្រោះក្នុងនោះក៏មានការចូលរួមពីគណបក្សនយោបាយជាច្រើនទៀតផងដែរ។
សូមជម្រាបថា៖ បើតាមរបាយការណ៍របស់ លោក កែន សត្ថា ប្រធានគណៈកម្មាធិការគណបក្សប្រជាជនខេត្តកែប បានឱ្យដឹងថា សភាពការណ៍សន្តិសុខ សណ្តាប់ធ្នាប់ និងសុវត្ថិភាពសង្គមទូទាំងខេត្តកែប មានភាពល្អប្រសើរ យើងរក្សាការពារបានល្អជូនប្រជាពលរដ្ឋ និងភ្ញៀវទេសចរជាតិ-អន្តរជាតិ ដែលមកសម្រាក លំហែ កម្សាន្តក្នុងខេត្ត ទាំងលើដីគោក បណ្តាកោះ និងលម្ហសមុទ្រ។ការអនុវត្តគោលនយោបាយភូមិ ឃុំមានសុវត្ថិភាព បាននិងកំពុងជំរុញខ្លាំងក្លាលើលក្ខណៈសម្បតិ្តទាំង៩យ៉ាង ធ្វើឱ្យប្រជាពលរដ្ឋមានការសប្បាយរីករាយ និងចូលរួមយ៉ាងសកម្ម ហើយជាទូទៅឃើញថា បទល្មើសមានការថយចុះគួរឱ្យកត់សម្គាល់ បង្កលក្ខណៈងាយស្រួលនិងសុវត្ថិភាព ជូនប្រជាពលរដ្ឋក្នុងការប្រកបអាជីវកម្ម សេវាកម្ម ការងារបង្កបង្កើនផល លើកស្ទួយសេដ្ឋកិច្ច និងជីវភាពគ្រួសារមានការរីចម្រើនជាបន្តបន្ទាប់៕
សេង ណារិទ្ធ
