កំពត ៖ តាមសេចក្តីរាយការណ៍ពីប្រជាពលរដ្ឋក្នុងស្រុកកំពង់ត្រាចបានបង្ហើបថា ដីបឹងប្រវត្តិសាស្ត្រដែលជាកេរមរតកបន្សល់ពីដូនតា ត្រង់ចំណុចបឹងឈូក ស្ថិតក្នុងភូមិបឹងធំខាងលិច ឃុំអង្គសុរភី ស្រុកកំពង់ត្រាច ខេត្តកំពត អំឡុងពេលបច្ចុប្បន្នត្រូវបានបុគ្គលមួយក្តាប់តូចចាក់ដីរំលោភយកធ្វើជារបស់ផ្ទាល់ខ្លួនដោយមិនចេះអៀនខ្មាស់ បើទោះជាអាជ្ញាធរក្នុងតំបន់រេរាំងយ៉ាងណាក៏គ្មានប្រសិទ្ធភាពដែរ។
សេចក្តីរាយការណ៍ដដែលបានឱ្យដឹងថា ចំណុចបឹងនេះត្រូវបានលោក សំ អេន ជួលរថយន្តដឹកដីមកចាក់នៅថ្ងៃទី០៥ខែឧសភា ឆ្នាំ២០១៨ ប៉ុន្តែឥឡូវត្រូវផ្អាកសកម្មភាព ខណៈមានអាជ្ញាធរស្រុកចុះមករេរាំង។គេបានទម្លាយទៀតថា បឹងដែលគេចាក់ដីលប់នេះ គឺជាអាងស្តុកទឹកសម្រាប់ប្រកបការងារកសិកម្មរបស់ប្រជាពលរដ្ឋទូទៅ ហើយក៏ជាផ្លូវបង្ហូរទឹកមួយយ៉ាងសំខាន់ដើម្បីបញ្ចៀសទឹកជំនន់ក្នុងរដូវវស្សា ដោយផ្លូវទឹកខាងលើបានតភ្ជាប់ឆ្ពោះទៅព្រែកកំពង់ត្រាច បន្តហូរចូលទៅសមុទ្រ។
ប្រភពដដែលបានបញ្ជាក់ផងដែរថា កន្លងមកចំណុចបឹងខាងលើ ត្រូវបានលោកសំ អេន ដាំឈូកសម្រាប់អាស្រ័យផលជាច្រើនឆ្នាំមកហើយ ប៉ុន្តែខាងអាជ្ញាធរដាក់បម្រាមមិនអនុញ្ញាតឱ្យកេងយកធ្វើជាកម្មសិទ្ធិបុគ្គលនោះឡើយ ហើយអាជ្ញាធរឬជំនាញក៏មិនបានផ្តល់ប័ណ្ណកម្មសិទ្ធិឱ្យនោះដែរ។
ទន្ទឹមនឹងមានការចាក់ដីបំពានចូលបឹងប្រវតិ្តសាស្ត្រដូចខាងលើនេះ ប្រជាពលរដ្ឋបានដែលរស់នៅក្នុងភូមិចំនួនពីររួមមាន៖ ភូមិដាសស្គរ ក្នុងឃុំបឹងសាលាខាងជើង និងភូមិកោះខ្លូត ឃុំកំពង់ត្រាចខាងកើត ស្រុកកំពង់ត្រាច បាននិងកំពុងព្រួយបារម្ភយ៉ាងខ្លាំងពីបញ្ហាជំនន់ភ្លៀង បន្ទាប់ពីមានករណីចាក់ដីលប់ផ្លូវទឹកនៅត្រង់ចំណុចបឹងឈូក នៃកំណាត់ផ្លូវជាតិលេខ៣១ ក្នុងភូមិបឹងធំខាងលិច ឃុំអង្គសុរភី ស្រុកកំពង់ត្រាចនេះ ដែលអាចបង្កទៅជាលិចលង់ដោយជំនន់ភ្លៀង ខណៈទីតាំងនេះត្រូវគេចាក់ផ្លូវទឹកឱ្យនៅប្រឡោះតូច។គេបានបញ្ជាក់អះអាងថា កន្លងមកតាំងពីអភិបាលស្រុកជំនាន់មុន រហូតដល់អភិបាលស្រុកបច្ចុប្បន្ន តែងតែចាត់ឱ្យមន្ត្រីក្រោមឱវាទទៅរេរាំង ទប់ស្កាត់មិនឱ្យមានការចាក់ដីពង្រីកយកផ្ទៃបឹងខាងលើជាច្រើនលើកច្រើនសារមកហើយ ប៉ុន្តែការឃាត់ឃាំងហាក់គ្មានប្រសិទ្ធភាពសោះ ព្រោះការចាក់លប់យកបឹងនិងប្រឡាយនៅតែមានសកម្មភាពជាបន្តបន្ទាប់ ប្រៀបបាននឹងការវែកចកទៅហើយ។
ពាក់ព័ន្ធនឹងការចាក់ដីលប់នៅចំណុចបឹងខាងលើ លោកសំ អេន បានលើកឡើងថា គាត់គ្រាន់តែចាក់ដីធ្វើផ្លូវសម្រាប់ឱ្យគ្រឿងចក្រចូលទៅជីកប្រឡាយនៅក្នុងបឹងប៉ុណ្ណោះ គឺគ្មានបំណងចាក់រំលោភយកទេ។គាត់បានអះអាងទៀតថា ដីបឹងនេះមានទំហំជិត៥.០០០ម៉ែត្រក្រឡា ដោយកន្លងមកគាត់ធ្លាប់ធ្វើពាក្យស្នើសុំទៅអាជ្ញាធរស្រុកធ្វើប័ណ្ណកម្មសិទ្ធដែរ ប៉ុន្តែអភិបាលស្រុកថ្មីលោកមិនព្រមអនុញ្ញាត ទើបនៅរាំុរ៉ៃរហូតមកដល់ពេលនេះទៅ។
ទាក់ទិននឹងករណីចាក់លុបបឹងខាងលើនេះ លោកអូន ខន អភិបាលស្រុកកំពង់ត្រាចទើបទទួលតំណែង បានប្រាប់ កម្ពុជាថ្មី នៅព្រឹកថ្ងៃទី០៦ខែឧសភា ឆ្នាំ២០១៨នេះថា ផ្ទៃបឹងខាងលើនេះ ពិតជាដីរបស់រដ្ឋគឺគ្មានពលរដ្ឋណាម្នាក់អាចបន្លំយកធ្វើជាកម្មសិទ្ធិផ្ទាល់ខ្លួននោះទេ បើទោះជាគាត់កាន់កាប់បឹងនេះប៉ុន្មានឆ្នាំក៏ដោយ ប៉ុន្តែអាចឱ្យគាត់អាស្រ័យផលនៅចំណុចបឹងនេះបាន ។
លោកបានបានបញ្ជាក់ផងដែរថា កន្លងមកអ្នកធ្លាប់កាន់កាន់ដីបឹងនេះ ឈ្មោះ សំ អេន និងប្រពន្ធឈ្មោះ សេង យិ រស់នៅក្នុងភូមិបឹងធំខាងលិច ឃុំអង្គសុរភី ស្រុកកំពង់ត្រាច ខេត្តកំពត ក៏ធ្លាប់សុំឱ្យអាជ្ញាធរនិងជំនាញធ្វើប័ណ្ណកម្មសិទ្ធិឱ្យដែរ ប៉ុន្តែគ្មានអាជ្ញាធរណាយល់ព្រមនោះឡើយ ព្រោះចំណុចនេះជាដីបឹងបួរស្ថិតក្នុងដែនសមត្ថកិច្ចរបស់អាជ្ញាធរ និងជាបឹងសម្រាប់ស្តុកទឹកប្រើប្រាស់រួមគ្នានៃពលរដ្ឋក្នុងមូលដ្ឋាន ហើយក៏ជាចំណុចផ្លូវបង្ហូរទឹកចេញដើម្បីបញ្ចៀសពីជំនន់ទឹកភ្លៀងផងដែរ ហើយចំពោះការអះអាងថាគាត់ចាក់ដីយកគ្រឿងចក្រទៅជីកប្រឡាយនោះដូចជាមិនអាចទៅរួចទេ ព្រោះការជីកប្រឡាយថ្មី ត្រូវមានគោលការណ៍ពីអាជ្ញាធរ និងការស្រាវជ្រាវពីក្រុមជំនាញទើបធ្វើទៅបាន។ដូច្នេះលោកមិនអនុញ្ញាតិឱ្យមានការចាក់ដីលុបផ្ទៃបឹងដូចរូបភាពខាងលើនេះទៀតទេ។
ជាមួយនេះ ប្រជាពលរដ្ឋសំណូមពរយ៉ាងទទូច ដល់ លោក ជាវ តាយ អភិបាល នៃគណៈអភិបាលខេត្តកំពត ដែលទើបទទួលភារកិច្ចថ្មី សូមលោកជួយចាត់វិធានការដ៏ម៉ឺងម៉ាត់ ចំពោះបុគ្គលមួយចំណិចតូច ដែលចាក់ដីលប់បឹងបំណងយកធ្វើជាកម្មសិទ្ធិដូចរៀបរាប់ខាងលើនេះផង ៕
សេង ណារិទ្ធ
