កែប ៖ នៅព្រឹកថ្ងៃពុធ៣រោច ខែពិសាខ ឆ្នាំច សំរឹទ្ធិស័ក ព.ស ២៥៦២ ត្រូវនឹងថ្ងៃទី០២ខែឧសភា ឆ្នាំ២០១៨ នៅសាលាឃុំពងទឹក ស្រុកដំណាក់ចង្អើរ បានធ្វើពិធីប្រកាសដាក់ឱ្យដំណើរការច្រកចេញចូលតែមួយសេវាអត្តសញ្ញាណកម្មជាផ្លូវការ នៅថ្នាក់ឃុំ សង្កាត់សាកល្បងក្នុងខេត្តកែប និងខេត្តកំពត ក្រោមអធិបតីភាពដ៏ខ្ពង់ខ្ពស់ ឯកឧត្តម នាយឧត្តមសេនីយ៍ សន្តិបណ្ឌិត ម៉ៅ ច័ន្ទតារា អគ្គនាយក នៃអគ្គនាយកដ្ឋានអត្តសញ្ញាណកម្ម លោក កែន សត្ថា អភិបាល នៃគណៈអភិបាលខេត្តកែប និងលោក ជឹង ផល្លា អភិបាលរងខេត្តកំពត។
តាមរបាយការណ៍របស់ លោក លី ហ៊ត មេឃុំពងទឹក តំណាងឱ្យ”ច្រកចេញចូលតែមួយសេវាអត្តសញ្ញាណកម្ម” បានឱ្យដឹងថា ក្នុងឃុំ សង្កាត់ទាំង១០ រួមមាន៖សង្កាត់កែប សង្កាត់អូរក្រសារ សង្កាត់ព្រៃធំ ឃុំពងទឹក ឃុំអង្កោល(ក្នុងខេត្តកែប)និងសង្កាត់កំពង់បាយ សង្កាត់ក្រាំងអំពិល សង្កាត់កំពង់កណ្តាល សង្កាត់អណ្តូងខ្មែរ និងសង្កាត់ត្រើយកោះ (នៃក្រុងកំពត)មានប្រជាពលរដ្ឋសរុប៦៨.០៩៣នាក់ ស្មើនឹង១៤.៤៩៦គ្រួសារ ដោយក្រុមប្រឹក្សាឃុំ សង្កាត់ទាំង១០បានប្រជុំអនុម័តដីកា”បង្កើតច្រកចេញចូលតែមួយសេវាអត្តសញ្ញាណកម្ម”បានរួចរាល់ និងបានចាប់ផ្តើមដំណើរការចុះបញ្ជីតាមប្រព័ន្ធព័ត៌មានវិទ្យាចាប់ពីពេលនេះតទៅ។
លោក កែន សត្ថា អភិបាលខេត្តកែប បានឱ្យដឹងថា ការផ្តល់សេវាអត្តសញ្ញាណកម្មត្រូវបានអនុវត្តនិងបានផ្តល់ជូនប្រជាពលរដ្ឋនៅថ្នាក់រដ្ឋបាលឃុំសង្កាត់កន្លងមក ដោយក្រុមប្រឹក្សាឃុំ សង្កាត់អ្នកទទួលខុសត្រូវផ្នែកអត្រានុកូលដ្ឋាននៅតាមឃុំ សង្កាត់របស់ខ្លួន។លោកថា ចំណែកការចុះបញ្ជីស្នាក់នៅ ប៉ុស្តិ៍នគរបាលនៅគ្រប់តំបន់ជាអ្នកទទួលខុសត្រូវ ទទួលស្នើសុំពីសំណាក់ប្រជាពលរដ្ឋ ដូចជាសៀវភៅស្នាក់នៅ សៀវភៅគ្រួសារជាដើម។ជាមួយនេះដែរការងារអត្តសញ្ញាណប័ណ្ណសញ្ជាតិខ្មែរប៉ុស្តិ៍នគរបាលឃុំ សង្កាត់មានតួនាទីយ៉ាងសំខាន់ក្នុងការប្រមូលទិន្នន័យប្រជាពលរដ្ឋដែលគ្រប់អាយុ១៥ឆ្នាំនិងការផ្តល់អត្តសញ្ញាណប័ណ្ណសញ្ជាតិខ្មែរ។ដូច្នេះការងារផ្តល់អត្តសញ្ញាណកម្មត្រូវបានអនុវត្តនៅថ្នាក់រដ្ឋបាលឃុំ សង្កាត់រួចស្រេចទៅហើយ។
ឯកឧត្តម នាយឧត្តមសេនីយ៍ សន្តិបណ្ឌិត ម៉ៅ ច័ន្ទតារា អគ្គនាយក នៃអគ្គនាយកដ្ឋានអត្តសញ្ញាណកម្ម បានបញ្ជាក់ថា បច្ចុប្បន្ននេះអាជ្ញាធរបានបង្កើតសេវារដ្ឋបាល សេវាសាធារណៈឱ្យកាន់តែខិតជិត ឱ្យកាន់តែមានប្រសិទ្ធភាព តម្លាភាព សម្រាប់បម្រើសេវាជូនប្រជាពលរដ្ឋទូទៅបានងាយស្រួល ប៉ុន្តែសេវានេះគ្រាន់ដំណើរការសាកល្បងច្រកចេញចូលតែមួយនេះបានអនុវត្តត្រឹមតែឃុំ សង្កាត់ចំនួន១០ប៉ុណ្ណោះ ដែលមានឃុំ សង្កាត់ចំនួន១០នៅខេត្តកែប និងខេត្តកំពត ហើយការបើកច្រកចេញចូលតែមួយនេះកន្លងមកយើងបានដំណើរការចាប់ពីឆ្នាំ២០០៥មកដល់ពេលនេះទើបតែដំណើរការបានជាង៥០កន្លែងទេ ដោយក្នុងពេលខាងមុខនឹងមានគម្រោងបើកជាង៣០កន្លែងបន្ថែមទៀត ហើយពេលនេះយើងដំណើរការសាកល្បងការបើកឱ្យមានសេវាច្រកចេញចូលតែមួយការងារអត្តសញ្ញាណកម្ម ដូចជាការចុះអត្រានុកូលដ្ឋាន ការចុះបញ្ជីអ្នកស្លាប់ ការចុះបញ្ជីអាពាហ៍ពិពាហ៍។ល។ នេះហើយហៅថាការងារអត្តសញ្ញាណកម្ម។ចំពោះការធ្វើអត្តសញ្ញាណប័ណ្ណសញ្ជាតិខ្មែរ ការធ្វើសៀវភៅស្នាក់នៅ សៀវភៅគ្រួសារ នេះសុទ្ធសឹងជាការងារអត្តសញ្ញាណកម្ម ដែលត្រូវដំណើរការសាកល្បងក្នុងបណ្តាឃុំ សង្កាត់ទាំង១០របស់ខេត្តកែប និងខេត្តកំពត ចាប់ពីពេលនេះតទៅ៕
សេង ណារិទ្ធ
