កំពត ៖ ផ្ទះសំបែងប្រជាពលរដ្ឋ ស្ថិតក្នុងភូមិសាស្ត្រ ស្រុកអង្គរជ័យ ខេត្តកំពត ចំនួន៥គ្រួសារ ត្រូវរងការខូចខាតជាច្រើនអន្លើដោយសារខ្យល់កន្ទ្រាក់ ខណៈមានភ្លៀងធ្លាក់មួយមេកាលពីរៀល ថ្ងៃទី២៨ខែមេសា ឆ្នាំ២០១៨នេះ។
បើយោងតាមសេចក្តីរាយការណ៍ពីអាជ្ញាធរក្នុងតំបន់ខាងលើបានឱ្យដឹងថា លំនៅឋានដែលរងគ្រោះដោយសារខ្យល់កន្ទ្រាក់ មានចំនួន៥គ្រួសារ ស្ថិតក្នុងភូមិបោះខ្ទុមនិងភូមិត្នោត ឃុំដំបូកខ្ពស់ ស្រុកអង្គរជ័យ ខេត្តកំពត។សេចក្តីរាយការណ៍បានឱ្យដឹងទៀតថា ក្រោយពីមានគ្រោះមហន្តរាយ ផ្តើមដោយសារគ្រោះធម្មជាតិនេះ អាជ្ញាធរក្នុងតំបន់ក៏ដូចជាក្រុមការងារក្នុងមូលដ្ឋាន បានចុះអន្តរាគមន៍ភ្លាមៗ ដោយបានស្រង់ស្ថិតិ ដើម្បីផ្តល់ជំនួយសង្គ្រោះបន្ទាន់ផងដែរ ។
អាជ្ញាធរបានបញ្ជាក់ផងដែរថា គ្រួសារដែលត្រូវរងគ្រោះដោយសារគ្រោះធម្មជាតិខាងលើ រួមមាន៖ ទី១-ឈ្មោះ ណុប វទ្ធី ភេទប្រុស អាយុ៣៧ឆ្នាំ ខូចខាតសម្ភារៈ បើុងដំបូលសីុហ្វីរ៉ូ អស់២០០សន្លឹក បាក់សសរអស់៤ដើម។
២-ឈ្មោះ ញ៉េប ចាន់ដន ភេទស្រី អាយុ៥៥ឆ្នាំ ខូចខាតសំយាបអស់មួយចំហៀង។ ៣-ឈ្មោះ ឈឹម ប៊ុនហេង ភេទប្រុស អាយុ៣៤ឆ្នាំ ខូចខាត ប៉ើងដំបូលក្បឿងអស់មួយចំនួន។ ៤-ឈ្មោះ អ៊ឹម សេកភេទប្រុស អាយុ៦០ឆ្នាំ ខូចខាតរោងម៉ាស៊ីនមួយខ្នង អស់ស៊ីហ្វីរ៉ូ ចំនួន៦០ស្លឹក។ផ្ទះទាំងបួននេះ ស្ថិតក្នុងភូមិបោះខ្ទុម ឃុំដំបូកខ្ពស់ ស្រុកអង្គរជ័យ។ និងទី៥-ឈ្មោះ ញេប សំណាង ភេទប្រុស អាយុ៣១ឆ្នាំ បើុង-របើកក្បឿងអស់មួយចំហៀង។លំនៅឋាននេះស្ថិតក្នុងភូមិត្នោត ឃុំដំបូកខ្ពស់ ស្រុកអង្គរជ័យ ខេត្តកំពត។
ជាមួយនឹងហេតុការណ៍ខ្យល់កន្ទ្រាក់ដូចខាងលើនេះ អាជ្ញាធរ គ្រប់ជាន់ថ្នាក់ ពិសេសក្រុមករងារកាកបាទក្រហមកម្ពុជា បាននិងកំពុងចុះជួយអន្តរាគមន៍យ៉ាងសស្រាក់សស្រាំ និងដោយយកចិត្តទុកដាក់បំផុត ៕
សេង ណារិទ្ធ
