កែប ៖ អគារគណបក្សប្រជាជនកម្ពុជា ក្រុងកែប ត្រូវបានរៀបចំពិធីបញ្ចុះបឋមសិលាសាងសង់នៅព្រឹកថ្ងៃសៅរ៍១៤កើត ខែពិសាខ ឆ្នាំច សំរឹទ្ធិស័ក ព.ស ២៥៦១ ត្រូវនឹងថ្ងៃទី២៨ខែមេសា ឆ្នាំ២០១៨ ក្រោមវត្តមាន លោក កែន សត្ថា សមាជិកគណៈកម្មាធិកាកណ្តាល គណបក្សប្រជាជនកម្ពុជា និងជាប្រធានគណៈកម្មាធិការគណបក្សប្រជាជនកម្ពុជាខេត្តកែប អមដំណើរដោយអស់លោកជាថ្នាក់ដឹកនាំក្នុងជួរគណបក្សប្រជាជនជាច្រើនរូប។
លោកស្រី ទិត សុខា ប្រធានគណៈកម្មាធិការគណបក្សប្រជាជនកម្ពុជាក្រុងកែប បានឱ្យដឹងថា អគារទីស្នាក់ការគណបក្សនេះ គ្រោងសាងសង់ក្នុងទំហំ បណ្តោយ១៩ម៉ែត្រ ទទឹង៩ម៉ែត្រ កម្ពស់ខឿន៩០សង់ទីម៉ែត្រ ដំបូលធ្វើអំពីដែក ប្រក់ក្បឿងថៃ ខាងក្នុងមានសាលប្រជុំ០១ បន្ទប់ប្រចាំការចំនួន០១ បន្ទប់ទឹកស្តង់ដាចំនួន០២ ដោយគ្រឿងបង្គុំនៃអគារសង់ពីបេតុងអាមេ ជញ្ជាំងរៀបឥដ្ឋ(២០)ហើយសំណង់នេះនឹងគ្រោងចំណាយថវិកាអស់ប្រមាណ ៥៥.១២៦ ដុល្លារ អាមេរិក។
មានមតិសំណេះសំណាលក្នុងឱកាសនោះ លោក កែន សត្ថា ប្រធានគណៈកម្មាធិការគណបក្សខេត្ត បានលើកឡើងថា នេះជាការចាប់ផ្តើមសាងសង់នូវអគារគណបក្សប្រជាជនកម្ពុជាក្រុងកែប ដែលកន្លងមកតំបន់នេះមិនទាន់មានស្នាក់ការសម្រាប់បម្រើការងារនៅឡើយ។ទន្ទឹមនឹងពិធីបញ្ចុះបឋមសិលាសាងសង់នូវអគារនេះ លោកក៏សូមថ្លែងអំណរគុណដល់សមាជិក សមាជិកា និងបងប្អូនប្រជាពលរដ្ឋទាំងអស់ដែលរស់នៅគ្រប់ភូមិសាស្ត្រនៃខេត្តកែប ដែលជានិច្ចកាលតែងតែស្រលាញ់គាំទ្រមកលើគណបក្សប្រជាជនកម្ពុជា ហើយបោះឆ្នោតជូនគណបក្សប្រជាជន គ្រប់អាណតិ្តកន្លងមក ដែលធ្វើឱ្យកើនសម្លេងឈ្នះភ្លូកទឹកភ្លូកដី រហូតជាប់លេខ១ជាបន្តបន្ទាប់នោះ។លោកបានបន្តថា នេះជាការស្រលាញ់ចូលចិត្តរបស់សមាជិក សមាជិកា ដែលបានជឿជាក់មកលើថ្នាក់ដឹកនាំក៏ដូចជាក្រុមការងាររបស់គណបក្សប្រជាជន ពិសេសជឿជាក់លើការដឹកនាំដ៏ត្រឹមត្រូវ និងឈ្លាសវៃ របស់ សម្តេចតេជោ ហ៊ុន សែន ប្រធានគណបក្សប្រជាជនកម្ពុជា និងជាឥស្សរជន ជាវីរបុរសស្នេហាជាតិ ស្នេហាមាតុភូមិ ដែលធ្លាប់តស៊ូរំដោះប្រជាជនឱ្យចាកផុតពីគ្រោះអវចីយ ហើយដឹកនាំកសាងប្រទេសពីសង្គ្រាមរាុំរ៉ៃរហូតដល់មានសុខសន្តិភាពពេញលេញ ព្រមទាំងមានការអភិវឌ្ឍន៍ រីកចម្រើនលើគ្រប់វិស័យ មកដល់បច្ចុប្បន្ននេះ។ដោយសារតែការស្រលាញ់ គាំទ្រ ពីសំណាក់សមាជិក សមាជិកា និងប្រជាពលរដ្ឋក្នុងតំបន់របស់យើង សម្តេច ហ៊ុន សែន ក៏បានផ្តល់នូវចំណងដៃជាច្រើនសម្រាប់បងប្អូនប្រជាពលរដ្ឋនៅក្នុងខេត្តកែប ពិសេសក្នុងពិធីសម្ពោធសមិទ្ធផលក្នុងសាលាវិទ្យាល័យ ប៊ុន រ៉ានី ហ៊ុន សែន ចរិយាវង្ស នៃទឹកដីក្រុងកែប នាឱកាសបុណ្យសមុទ្រលើកទី៦កន្លងមកនេះ។
លោកអភិបាលខេត្ត បានបញ្ជាក់ទៀតថា ក្នុងឱកាសសម្ពោធវិទ្យាល័យ សម្តេចក៏បានផ្តល់ជូននូវអគារសិក្សានិងបណ្ណាល័យជាច្រើនបន្ទប់ និងបន្ថែមរហូតដល់ទៅបី-បួនជាន់ សម្រាប់តម្រូវការរបស់សិស្សានុសិស្ស និងផ្តល់ជូនអគារស្នាក់នៅសម្រាប់ លោកគ្រូ អ្នកគ្រូ ដែលមានទីលំនៅឆ្ងាយៗឱ្យស្នាក់នៅផងដែរ ។
ដោយឡែក ហេដ្ឋារចនាសម្ព័ន្ធនានា ដូចជាផ្លូវចូលសាលារៀន តារាងបាល់ទាត់ បាល់បោះគឺត្រូវបានរៀបចំសុទ្ធតែបំពាក់ដោយឧបករណ៍-សម្ភារៈទំនើបៗទៀតផង។ចំណែកសាលាវិទ្យាល័យ ហ៊ុនសែន ចំការដូង សម្តេច ក៏បានផ្តល់នូវអគារ(សាកលវិទ្យាល័យ)ថ្មីកម្ពស់៤ជាន់មាន៤០បន្ទប់ និងអគារកម្ពស់២ជាន់មាន២០បន្ទប់បន្ថែមទៀតសម្រាប់សម្រាប់ផ្តល់ជូនលោកគ្រូ អ្នកគ្រូស្នាក់នៅ ហើយសមិទ្ធផលទាំងអម្បាលមាន សម្រាប់ទុកជាចំណងដៃដល់បងប្អូនប្រជាពលរដ្ឋក្នុងស្រុកដំណាក់ចង្អើរ ខេត្តកែបរបស់យើង និងបន្តដល់កូនចៅជំនាន់ក្រោយផងដែរ៕
សេង ណារិទ្ធ
