នៅព្រឹកថ្ងៃទី ២៧ មេសា ២០១៨ លោក រុន សារ៉េត ចាងហ្វាងកាសែតឆ្ទៈខ្មែរ បានអោយអ្នកយកព័ត៌មាន មាតុភូមិ ដឹងថា បន្ទាប់ពីលោកបានឃើញសារពត៌មានភ្នំពញប៉ុស្តិ ចុះផ្សាយពី ការត្រៀមបង្កើតគណបក្សនយោបាយថ្មីមួយ របស់លោក គង់ មុនីកា កូនប្រុសពៅរបស់លោក គង់ គាំ អតីតសមាជិកCNRP ដែលអស់សិទ្ធិធ្វើនយោបាយរយៈពេល៥ឆ្នាំ តាមអំណាចសាលដីកាតុលាការ។
លោក គង់ មុនីកា បានប្រកាសថា លោកនឹងបង្កើតគណបក្សឆន្ទៈខ្មែរ ដើម្បីចូលរួមប្រកួតប្រជែងការបោះឆ្នោតជ្រើសរើសតំណាងរាស្ត្រនាចុងខែកក្កដា២០១៨ ខាងមុខនេះ ព្រោះ គណបក្សCNRP ដែលជាគណបក្សប្រឆាំងដ៏ធំត្រូវបាន រលាយបាត់ និងគ្មានលទ្ធភាពអាចចូលរួមការបោះឆ្នោតបានឡើយ ។
ទាក់ទិននឹងការប្រកាសបង្កើតគណបក្សឆន្ទៈខ្មែរ របស់លោក គង់ មុនីកា នេះ ធ្វើអោយលោក រុន សារ៉េត ភ្ញាក់ផ្អើល និងងឿងឆ្ងល់ជាខ្លាំងថាហេតុអ្វីបានជាលោក គង់ មុនីកា បង្កើតគណបក្សដោយលួចយកឈ្មោះកាសែតឆន្ទៈខ្មែរ របស់លោក ដែលទទួលស្គាល់ដោយច្បាប់គឺមានាជ្ញាប័ណ្ណ បង់ពន្ធជូនរដ្ឋត្រឹមត្រូវចេញដោយក្រសួងព័ត៌មាន តាំងពីអំឡុងទសវត្សរ៍ជាង៩០មកម្ល៉េះ ។
លោកសារ៉េត បានបញ្ជាក់ ថា លោកនឹងរៀបចំសំុំឯកសារដាក់ពាក្យបណ្តឹង ប្តឹងទៅកហរសួងមហាផ្ទៃ និងក្រសួងព័ត៌មានផងដែរ ដើម្បីជំទាស់ទៅនឹងការរំលោភលើសិទិ្ធកម្មសិទ្ធិបញ្ញា ពីសំណាក់លោក គង់ មុនីកា អំពីការបង្កើតគណបក្សឆន្ទៈខ្មែរ ។
ជុំវិញការចោទប្រកាន់ របស់លោក រុន សារ៉េត អំពីករណីនេះ ការិយាល័យសារព័ត៌មានយើងមិនអាចសុំការបកស្រាយបំភ្លឺពីលោក គង់ មុនីកា បាននៅឡើយទេ ព្រោះពុំមានលេខទូរស័ព្ទទាក់ទង បើមានប្រតិកម្មសារព័ត៌មានយើងនឹង ធ្វើការបំភ្លឺជូននៅពេលក្រោយ ៕
