លោក ហង្ស ចក្រា អាយុ ៦៩ឆ្នាំ អតីតចាងហ្វាងកាសែតខែ្មរម្ចាស់ស្រុកបានទទួលអនិច្ចកម្មនៅរសៀលថ្ងៃទី១៤ខែកក្កដា ឆ្នាំ២០២៣នេះដោយរោគាពាធ។
លោកត្រូវបានបញ្ជូនទៅសង្គ្រោះបន្ទាន់ នៅមន្ទីរពេទ្យរុស្សី ដោយសារជំងឺលើសឈាម កាលពីយប់ថ្ងៃ៦ កក្កដា ២០២៣នេះក្រោយពីដឹកនាំកាសែតប្រឆាំងនឹងរដ្ឋាភិបាលអស់ជាច្រើនឆ្នាំ លោក ហង្ស ចក្រា អតីតចាងហ្វាងកាសែតខ្មែរម្ចាស់ស្រុក ត្រូវបានសម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជា ចេញអនុក្រឹត្យតែងតាំងជាទីប្រឹក្សាអមក្រសួងរៀបចំដែនដី នគរូបនីយកម្ម និងសំណង់កាលពីថ្ងៃទី១៨ ខែឧសភា ឆ្នាំ២០២៣ ។សូមរម្លឹកថាលោក ហង្ស ចក្រា ដែលល្បីឈ្មោះខាងសរសេរអត្ថបទប្រឆាំងខួបប្រាំងខួបវស្សាកាលពីជាង១០ឆ្នាំមុន ត្រូវបានសមត្ថកិច្ចនគរបាលខេត្តបាត់ដំបងចាប់ខ្លួន និងបញ្ជូនមកភ្នំពេញដាក់ពន្ធនាគារ កាលពីថ្ងៃទី២៦ មិថុនា ឆ្នាំ២០០៩ បន្ទាប់ពីសាលាដំបូងរាជធានីភ្នំពេញកាត់ទោសកំបាំងមុខដាក់ពន្ធនាគាររយៈពេល១២ខែ និងផាកពិន័យជាប្រាក់ចំនួន៩លានរៀលសមត្ថកិច្ចបានចាប់ខ្លួនលោកតាមដីការដែលបានចោទប្រកាន់អ្នកកាសែតជើងចាស់រូបនេះថាបានផ្សាយព័ត៌មានមិនពិត ញុះញង់ចំពោះអាជ្ញាធរជាតិ និងប៉ះពាល់ស្ថិរភាពនយោបាយ បន្ទាប់ពីកាសែតមាននិន្នាការប្រឆាំងរបស់លោកបានផ្សាយអត្ថបទព័ត៌មានថាមន្រ្តីមួយចំនួននៅជុំវិញសម្ដេចវិបុលបញ្ញា សុខ អាន ដែលកាលណោះនៅជារដ្ឋមន្រ្តីទីស្ដីការគណៈរដ្ឋមន្រ្តី ជាមន្រ្តីពុករលួយនៅក្នុងពន្ធនាគារព្រៃស លោក ហង្ស ចក្រា ក៏បានសរសេរលិខិតទទួលស្គាល់កំហុសចំពោះការចុះផ្សាយ និងបានសូមទោស សម្ដេចវិបុលបញ្ញា សុខ អាន ផងដែរ។ រហូតដល់ខែមេសា ឆ្នាំ២០១០ លោក ហង្ស ចក្រា ក៏ត្រូវបានដោះលែងឱ្យមានសេរីភាពវិញ រួមជាមួយអ្នកទោសចំនួន២៣នាក់ផ្សេងទៀត តាមព្រះរាជក្រឹត្យលើកលែងទោស និងបន្ធូរបន្ថយទោសរបស់ព្រះមហាក្សត្រ ព្រះបាទសម្ដេចព្រះបរមនាថ នរោត្តម សីហមុនី៕
