កែប ៖ ខួបលើកទី១០៧ ទិវាអន្តរជាតិនារី ០៨មីនា ឆ្នាំ២០១៨ ក្រោមប្រធានបទ”ស្ត្រីរួមគ្នារក្សាសន្តិភាពដើម្បីអភិវឌ្ឍន៍ជាតិ”ត្រូវបានប្រារព្វឡើងនៅក្នុងសាលប្រជុំធំសាលាខេត្តកែប កាលពីរសៀលថ្ងៃ១រោច ខែផល្គុន ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី០២ខែមីនា ឆ្នាំ២០១៨ ក្រោមអធិបតីភាព លោកកែន សត្ថា អភិបាល នៃគណៈអភិបាលខេត្តកែប លោកសំ សារីន ប្រធានក្រុមប្រឹក្សាខេត្ត លោក ងួន ប៊ៀន តំណាងរាស្ត្រមណ្ឌលខេត្តកែប ។ពិធីនេះបានរៀបចំឡើងដោយមន្ទីរកិច្ចការនារីខេត្តកែប។
ខណៈនោះ លោកស្រី អ៊ូ សុគន្ធី ប្រធានមន្ទីរកិច្ចការនារីខេត្តកែប បានឲ្យដឹងថា ជារៀងរាល់ឆ្នាំប្រទេសកម្ពុជា ក៏ជាប្រទេសនានាលើសកលលោក តែងតែប្រារព្វពិធីអបអរសាទរទិវាអន្តរជាតិនារី ០៨មីនា ក្នុងគោលបំណងរំលឹកពីការតស៊ូរបស់ស្ត្រី ក្នុងការទាមទារសិទ្ធិ សេរីភាព និងការអនុវត្តសិទ្ធិស្ត្រីស្មើភាពរវាងបុរសនិងស្ត្រី ដោយពិនិត្យមើលផងដែរ លើសមិទ្ធផលសម្រេចបាន បញ្ហាប្រឈមនៅសេសសល់ ដើម្បីរៀបចំផែនការសម្រាប់អនុវត្តជាបន្តទៅមុខទៀត ឆ្ពោះទៅលើកកម្ពស់សមភាពយេនឌ័រ និងផ្តល់ភាពអង់អាចដល់ស្ត្រី។លោកស្រីបានគូសបញ្ជាក់ទៀតថា ក្នុងពិធីអបអរសាទរខួបលើកទី១០៧ ទិវាអន្តរជាតិនារី ០៨មីនា ឆ្នាំ២០១៨នេះ ក្រសួងកិច្ចការនារីបានលើកយកប្រធានបទមួយគឺ”ស្ត្រីរួមគ្នារក្សាសន្តិភាពដើម្បីអភិវឌ្ឍន៍ជាតិ” ក្នុងគោលបំណងបន្តរំលេចពីតម្លៃនៃសន្តិភាព និងការលើកកម្ពស់ វប្បធម៌អហិង្សា ដែលរាជរដ្ឋាភិបាលបាននិងកំពុងគាំទ្រ ជំរុញឲ្យមានការចូលរួមពីគ្រប់ស្ថាប័ន រួមទាំងបុរស ទាំងស្ត្រី ដើម្បីវឌ្ឍនភាពសង្គម ឆ្ពោះទៅលើកកម្ពស់សិទ្ធិ ស្ថានភាពជីវភាព ឋានៈ តួនាទី របស់ស្ត្រីក៏ដូចជាសុខុមលភាពសង្គមដោយធ្វើការទប់ស្កាត់ និងកាត់បន្ថយអំពើហិង្សាព្រមទាំងដោះស្រាយជម្លោះដោយសន្តិវិធី។
មានមតិសំណេះសំណាលនាពេលនេះ លោក កែន សត្ថា អភិបាលខេត្តបានគូសបញ្ជាក់ថា ក្នុងនាមរដ្ឋបាលខេត្តកែប លោកសូមគាំទ្រលើប្រធានបទ «៨ស្ត្រីរួមគ្នារក្សាសន្តិភាពដើម្បីអភិវឌ្ឍន៍ជាតិ” ក្នុងគោលបំណងរំលេចពីតម្លៃសន្តិភាព និងការលើកកម្ពស់វប្បធម៌ អហិង្សា ដែលរាជរដ្ឋាភិបាលនៃព្រះរាជាណាចក្រកម្ពុជាបានកំណត់ ។
លោកអភិបាលខេត្តបានបន្តថា សុខសន្តិភាពមានតម្លៃណាស់សម្រាប់មនុស្សជាតិ ដែលជាបំណងប្រាថ្នារបស់បុគ្គលគ្រប់រូប គ្រប់វ័យ ព្រោះបើមានសុខសន្តិភាព ទើបមានការអភិវឌ្ឍន៍លើគ្រប់វិស័យនិងគ្រប់ទីកន្លែង ព្រមទាំងធ្វើឲ្យប្រជាជនរស់នៅក្នុងភាពសុខដុមរមនា ពិសេសស្ត្រីរស់នៅជួបជុំគ្រួសារ មានឱកាសអភិវឌ្ឍសមត្ថភាពនិងសិក្សារៀនសូត្រក្រេបយកចំណេះ ជំនាញ ដើម្បីរួមចំណែកកសាងនិងអភិវឌ្ឍប្រទេសជាតិ ។
លោកថា ចាប់តាំងពីសង្គ្រាមលោកលើកទី១ ស្ត្រីនៅជុំវិញពិភពលោក បានធ្វើការតស៊ូមតិឲ្យមានការប្រើប្រាស់កិច្ចសន្យានិងសន្តិភាព ជំនួសឲ្យអំពើហិង្សាក្នុងការដោះស្រាយជម្លោះ។ស្ត្រីបានជំរុញឲ្យមានការយកចិត្តទុកដាក់ ចំពោះផលវិបាកជាច្រើនកើតចេញពីអំពើហិង្សានិងជម្លោះប្រដាប់អាវុធរួមទាំងការរីករាលដាលនៃអំពើហិង្សាផ្លូវភេទផងដែរ ដែលស្ត្រី និងក្មេងស្រីគឺជាជនរងគ្រោះ។
លោកអភិបាលខេត្តបានបញ្ជាក់ផងដែរថា ការអនុវត្តគោលនយោបាយនិងកម្មវិធីសមភាពយេនឌ័រធ្វើឲ្យស្ត្រី ក៏ដូចជាសង្គមជាតិទទួលនូវសមិទ្ធផលជាច្រើនលើគ្រប់វិស័យដូចសព្វថ្ងៃនេះ និយាយដោយឡែករយៈពេល២០ឆ្នាំកន្លងមកស្ថានភាពស្ត្រីនៅខេត្តកែប មានការរីកចម្រើនជាបន្តបន្ទាប់ ។ ស្ត្រីទទួលបាននូវអត្ថប្រយោជន៍ពីសុខសន្តិភាព ស្ថិរភាពនយោបាយ កំណើនសេដ្ឋកិច្ចដ៏រឹងមាំ ព្រមទាំងការកាត់បន្ថយភាពក្រីក្រ និងការកែលម្អសេវាសាធារណៈផងដែរ។
បន្ទាប់ពីសំណេះសំណាល គណៈអធិបតីក៏បាន ក៏បានចែកនូវវត្ថុអនុស្សាវរីយ៍ដល់មន្ត្រីរាជការដែលចូលរួមក្នុងពិធីនេះផងដែរ ៕
សេង ណារិទ្ធ
