កែប ៖ ដោយសារតែភាពស្រស់ស្អាត ព្រមជាមួយនឹងការថែរក្សាបរិស្ថានធម្មជាតិប្រកបដោយនិរន្តរភាពខ្ពស់របស់ទីក្រុងទេសចរណ៍ឆ្នេរកែប បាននិងកំពុងធ្វើឲ្យខេត្តដ៏តូចច្រឡឺងនេះ កាន់តែមានភាពទាក់ទាញ និងល្បីល្បាញពីមួយឆ្នាំទៅមួយឆ្នាំ ។ យ៉ាងណាមិញ ពានរង្វាន់ ជ័យលាភីទីក្រុងស្អាត “ផ្ការំដួលបីទង”លើកទី២ដែលត្រូវរដ្ឋបាលខេត្តកែបធ្វើពិធីដង្ហែនៅរសៀលថ្ងៃទី០២ខែមីនា ឆ្នាំ២០១៨នេះ គឺជាពានរង្វាន់ថ្មីមួយទៀត ដែលរាជរដ្ឋាភិបាលទើបតែប្រគល់ដល់ខេត្តកែប កាលពីថ្ងៃទី២៨ខែកុម្ភៈ ឆ្នាំ២០១៨កន្លងមកនេះ។
ជាមួយនឹងខេត្តកែបបានទទួលពានរង្វាន់ទីក្រុងស្អាតជាបន្តបន្ទាប់នេះ មហាជនតែងបានលើកការស្ញើចសរសើរថា នេះមិនមែនជារឿងធម្មតានោះទេ ដែលខេត្តកែបទទួលបានពានរង្វាន់បែបនេះ ហើយនេះក៏អាចឆ្លុះបញ្ចាំងឲ្យឃើញពីការអភិវឌ្ឍប្រកបដោយការរីកចម្រើនគ្រប់វិស័យ មានភាពរហ័សរហួន និងកិច្ចសហការ រួមគ្នាគិត រួមគ្នាធ្វើតាមជំនាញ ទើបធ្វើឲ្យខេត្តកែប កាន់តែមានសម្រស់ស្រស់បំព្រងគ្រប់រដូវកាលប្រកបដោយភាពទាក់ទាញ ពិសេសសក្តានុពលលើវិស័យទេសចរណ៍តែម្តង។
កន្លងមកគេបានកត់សម្គាល់ឃើញថា ក្នុងតំបន់ខេត្តកែបទាំងមូល ក្រៅពីមានជីវៈចម្រុះដ៏សំបូរបែបនៅក្នុងសមុទ្រនោះ នឹងមានភូមិសាស្ត្រជាច្រើនទៀតត្រូវបានគ្របដណ្តប់ដោយព្រៃភ្នំនិងហ៊ុមព័ទ្ធទៅដោយដើមរុក្ខជាតិតូច ធំ រំលេចដោយភាពបៃតងនិងខៀវស្រងាត់ ស្តែងចេញពីធម្មជាតិពិតៗ ដោយបានជួយលើកសម្រស់ខេត្តកែបឲ្យកាន់តែមានភាពលេចធ្លោថែមទៀត។
ជាមួយគ្នានេះ ពានរង្វាន់ ជ័យលាភីទីក្រុងស្អាតលើកទី២ សម្រាប់ឆ្នាំ២០១៨-២០២១ ក្រោមប្រធានបទ”ទីក្រុងស្អាតដើម្បីទាំងអស់គ្នា” គឺជាជ័យលាភីថ្មីមួយទៀតសម្រាប់ជាមោទនភាពរបស់ខេត្តកែប ព្រោះកន្លងមកក៏ដូចជាបច្ចុប្បន្ន អាជ្ញាធរខេត្ត តែងផ្តោតការយកចិត្តទុកដាក់បំផុតលើផ្នែកបរិស្ថានជាចម្បង ហើយការអភិវឌ្ឍតំបន់ក៏ជាកត្តាសំខាន់ ជំរុញធ្វើឲ្យមានភាពទាក់ទាញផងដែរ។សូចនាករដែលខេត្តកែបមានដូចជា ដីស្អាត ទឹកស្អាត ខ្យល់ស្អាត មហាជនពិតជាទទួលស្គាល់យ៉ាងពិតប្រាកដ ប៉ុន្តែទោះជាយ៉ាងណា អាជ្ញាធរខេត្តនៅតែបន្តកែលម្អ គ្រប់ទីកន្លែងដើម្បីឲ្យស័ក្តិសមជាខេត្តមានឆ្នេរបៃតង ស្របតាមប្រធានបទ “អនាគត គឺបច្ចុប្បន្ន”។
ដូច្នេះដើម្បីរក្សាភាពល្បីល្បាញ ក៏ដូចជាការថែរក្សាពានរង្វាន់ ជ័យលាភីទីក្រុងស្អាតឲ្យបានស្ថិតស្ថេរ យើងត្រូវរួមសហការគ្នា ការពារសុវត្ថិភាព និងបរិស្ថានឲ្យបានល្អ ដើម្បីប្រឡងប្រជែងយកជ័យលាភីទីក្រុងស្អាត នាឆ្នាំខាងមុខបន្តបន្ទាប់ទៀត៕ សេង ណារិទ្ធ
