កែប ៖ យុវជនម្នាក់បានរងរបួសធ្ងន់ខណៈពេលជិះម៉ូតូនៅពីក្រោយរថយន្ត ហើយត្រូវរថយន្តនៅខាងមុខនោះបួងចង្កូតបត់ក្រោយ បណ្តាលឲ្យប៉ះទង្គិចគ្នាយ៉ាងដំណំធ្វើឲ្យយុវជនជាអ្នកបើកបរម៉ូតូរងបួសយ៉ាងធ្ងន់ធ្ងរ។
ហេតុការណ៍នេះបានកើតឡើងនៅវេលាម៉ោង ០៨និង៤៥នាទីព្រឹក ថ្ងៃទី០១ខែមីនា ឆ្នាំ២០១៨ស្ថិតចំណុចមុខផ្ទះសំណាក់តាពៅ ក្នុងភូមិដំណាក់ចំបក់ សង្កាត់អូរក្រសារ ក្រុង-ខេត្តកែប លើកំណាត់ផ្លូវជាតិលេខ៣៣។
សាក្សីដែលឃើញហេតុការណ៍ខាងលើ បាននិយាយថា មុនពេលជួបគ្រោះថ្នាក់ដ៏អាក្រក់នេះ គេឃើញយុវជនរងគ្រោះជិះម៉ូតូម្នាក់ឯងម៉ាកសេ១២៥ក្នុងទិសដៅពីកើតទៅលិចក្នុងល្បឿនបង្គួរ លុះមកដល់ចំណុចកើតហេតុ ស្រាប់តែមានរថយន្តម៉ាកកាមរីបាឡែនដែលបើកបរនៅខាងមុខ ហើយបានបួងចង្កួចបត់ត្រឡប់ក្រោយទាំងបង្ខំ គាប់ជួនម៉ូតូយុវជនដែលបើកបរក្នុងទិសដៅស្របជាមួយរថយន្តគេចមិនផុត ទើបបុកជាមួយរថយន្តនោះយ៉ាងពេញទំហឹង បណ្តាលឲ្យមនុស្សនិងម៉ូតូប៉ើងដូចស្លឹកកណ្តប ចំណែកអ្នកបើកបរម៉ូតូបានទទួលរងគ្រោះយ៉ាងដំណំបាក់ភ្លៅខាងស្តាំ ចំណែកម៉ូតូត្រូវរងការខូចខាតមើលលែងយល់ផងដែរ។
សាក្សីបានបញ្ជាក់ថា ក្រោយពីកើតហេតុភ្លាមៗម្ចាស់រថយន្តក៏មានបំណងរកមធ្យោបាយដឹកជនរងគ្រោះទៅមន្ទីរពេទ្យដែរ ប៉ុន្តែដោយសារឃើញសភាពជនរងគ្រោះធ្ងន់ធ្ងរពេក ទើបគេចខ្លួនបាត់ហើយទុករថយន្តចោលនៅកន្លែងកើតហេតុតែម្តង ។
ទាក់ទិននឹងករណីគ្រោះថ្នាក់ខាងលើ សមត្ថកិច្ចបាននិយាយថា គឺបង្កឡើងដោយសារអ្នកបើកបររថយន្តបាឡែន ខ្វះការប្រុងប្រយ័ត្ន ពេលបត់ក្រោយ មិនបានពិនិត្យឲ្យបានច្បាស់លាស់ ទើបងាយបង្កជាគ្រោះថ្នាក់ធ្ងន់ធ្ងរបែបនេះ។
ប៉ូលិសបានបញ្ជាក់ទៀតថា ជនរងគ្រោះមានឈ្មោះ ឈាង ធៀម ភេទប្រុស អាយុ២០ឆ្នាំ មុខរបរជាសិស្ស រស់នៅភូមិអូរក្រសារ សង្កាត់អូរក្រសារ ក្រុង-ខេត្តកែប ជនរងគ្រោះជិះម៉ូតូ ម៉ាកC125ពណ៌ខ្មៅ សេរីឆ្នាំ២០១៥ ពាក់ស្លាកលេខ ព្រះសីហនុ 1E-6849។ដោយឡែករថយន្តបង្កហេតុប្រភេទ កាមរីបាឡែន ពណ៌ទឹកប្រាក់ ពាក់ស្លាកលេខ ភ្នំពេញ 2AH-7498 អ្នកបើកបរគេចខ្លួនបាត់ស្រមោល។
ក្រោយពីវាស់វែង មធ្យោបាយពាក់ព័ន្ធ ត្រូវបានសមត្ថកិច្ចនាំយកទៅរក្សាទុកសម្រាប់ធ្វើការដោះស្រាយគ្នានៅពេលក្រោយ ។ ចំណែកយុវជនរងគ្រោះ ត្រូវបានរថយន្តសាមុយរបស់ស្នងការដ្ឋាននគរបាលខេត្តកែប ដឹកទៅសង្គ្រោះនៅឯមន្ទីរពេទ្យខេត្តកំពត៕
សេង ណារិទ្ធ
