កែប ៖ នៅព្រឹកថ្ងៃ១៣កើត ខែផល្គុន ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី២៧ខែកុម្ភៈ ឆ្នាំ២០១៧ ប្រតិបតិ្តការសឹករងកែប បានធ្វើកិច្ចប្រជុំបូកសរុបការងារយោធាប្រចាំឆ្នាំ២០១៧ និងផែនការសកម្មភាពការងារយោធា ឆ្នាំ២០១៨របស់ខ្លួន ក្រោមវត្តមាន លោកឧត្តមសេនីយ៍ទោ គង់ ប៊ុនថន មេបញ្ជាការរង នាយសេនាធិការ តំណាងដ៏ខ្ពង់ខ្ពស់ ឯកឧត្តម ឧត្តមសេនីយ៍ឯក បណ្ឌិត មេបញ្ជាររងកងទ័ពជើងគោក មេបញ្ជាការយោធភូមិភាគ៣ និងលោក សោម ពិសិដ្ឋ អភិបាលរងខេត្តកែប។
ពិធីនេះក៏មានការចូលពីសំណាក់ លោកឧត្តមសេនីយ៍ត្រី ឈឹម ខ្មៅ មេបញ្ជាការ ប្រតិបតិ្តសឹករង និងថ្នាក់ដឹកនាំក្នុងអង្គភាព ព្រមទាំងនាយ នាយទាហាននៃអង្គភាពកងកម្លាំងប្រដាប់អាវុធទាំងមូល។
បន្ទាប់ពី លោកឧត្តមសេនីយ៍ត្រី ឈឹម ខ្មៅ មេបញ្ជាការតំបន់ប្រតិបតិ្តការសឹករងកែប បានអានរបាយការណ៍ ស្តីពីវឌ្ឍនភាព និងលទ្ធផល ដែលអង្គភាពអនុវត្តបានកន្លងមកនោះ។ លោក សោម ពិសិដ្ឋ ក៏បានលើកឡើងថា ក្នុងឆ្នាំ២០១៨នេះ ប្រទេសកម្ពុជាយើង នឹងរៀបចំដំណើរការបោះឆ្នោតសកល ដើម្បីជ្រើសរើសតំណាងរាស្ត្រ ដែលប្រព្រឹត្តទៅនៅថ្ងៃទី២៩ខែកក្កដា ឆ្នាំ២០១៨ ។ បណ្តាគណបក្សនយោបាយទាំងអស់នឹងចូលរូមបោះឆ្នោត ដើម្បីប្រកួតប្រជែងក្នុងតំណែងរដ្ឋសភា ដែលកើតចេញពីសម្លេងគាំទ្ររបស់ប្រជាពលរដ្ឋ និងស្តែងឲ្យឃើញច្បាស់ពីលទ្ធិប្រជាធិបតេយ្យ ដ៏ពេញលេញនៃព្រះរាជាណាចក្រកម្ពុជា រីឯអតីតពួកប្រឆាំងមួយចំនួនដែលរ់ត់ទៅសហការជាមួយពួកប្រតិកិរិយាក្រៅប្រទេស ដើម្បីបន្តសកម្មភាពឃោសនាញុះញង់ឲ្យអន្តរជាតិ ដាក់សម្ពាធនយោបាយ និងសេដ្ឋកិច្ចមកលើកម្ពុជា។លោកបានបញ្ជាក់ទៀតថា ទោះជាយ៉ាងណា យើងបន្តការពារឲ្យបានជាដាច់ខាត នូវច្បាប់រដ្ឋធម្មនុញ ការពារបាវចនា ការពាររាជរដ្ឋាភិបាលស្របច្បាប់ និងថែរក្សាសន្តិភាពឲ្យបានដាច់ខាត ព្រមទាំងអនុវត្តឲ្យបានតាមគោលនយោបាយយុទ្ធសាស្ត្រចតុកោណដំណាក់កាលទី៣របស់រាជរដ្ឋាភិបាលអាណតិ្តទី៥-៦បន្តទៀត។
មានមតិសំណេះសំណាល លោកឧត្តមសេនីយ៍ទោ គង់ ប៊ុនថន បានគូសបញ្ជាក់ថា បច្ចុប្បន្នប្រទេសយើងទទួលបានសុខ សន្តិភាព ពេញបរិបូរណ៍ ប្រជាពលរដ្ឋរស់នៅប្រកបដោយសុខមាលភាព មានជីវភាពធូរធារ មានផ្ទះសំបែងរស់នៅយ៉ាងសមរម្យ ហើយប្រាក់បៀវត្យរបស់មន្ត្រីរាជការ មន្ត្រីកងកម្លាំងក៏ត្រូងបានដំឡើងជាបន្តបន្ទាប់ផងដែរ នេះគឺដោយសារប្រទេសយើងមានកំណើនសេដ្ឋកិច្ចខ្ពស់។លោកឧត្តមសេនីយ៍ទោ បានបន្តថា ថ្វីត្បិតប្រទេសយើងមានសន្តិភាពបែបនេះក្តី តែយើងត្រូវតែបន្តគ្រប់គ្រងក្នុងដែនសមត្ថកិច្ចរបស់ខ្លួនជានិច្ច ដោយត្រៀមអន្តរាគមន៍តាមបទបញ្ជា ពិសេសការគ្រប់គ្រងខ្លួនឯងឲ្យបានល្អ ដូចជាកិច្ចការផ្ទៃក្នុងនៃជួរអង្គភាពជាដើមគឺត្រូវតែអប់រំផ្នែកចិត្តសាស្ត្រដល់នាយ នាយទាហានឲ្យបានយល់ច្បាស់នូវអានុភាពរបស់វា ព្រោះថា សង្គ្រាមចិត្តសាស្ត្រ មានកម្លាំងនិងអានុភាពខ្លាំងជាងសង្គ្រាមប្រើដោយអាវុធទៅទៀត។ខណៈនោះ លោកឧត្តមសេនីយ៍ទោ បានដាស់តឿនដល់មន្ត្រីកងកម្លាំងទាំងអស់ ត្រូវតែមានវិធានការឲ្យបានហ្មត់ចត់រាល់ឧបាយកលបដិវត្តន៍ពណ៌ដែលជាមហិច្ចតារបស់ក្រុមប្រឆាំងមួយក្តាប់តូច ដែលតែងតែចង់ផ្តួលរំលំរាជរដ្ឋាភិបាលស្របច្បាប់នៅកម្ពុជា ។ លោកថា កងកម្លាំងត្រូវចូលរួមជាមួយអាជ្ញាធរគ្រប់លំដាប់ថ្នាក់ ពង្រឹងសមត្ថភាព វិធានការច្បាប់ វិធានការកម្លាំងឲ្យបានរឹងមាំ ព្រោះអ្វីៗយើងមានគ្រប់សព្វអស់ហើយដែលអាចទប់ស្កាត់រាល់សកម្មភាពទាំងឡាយបានដោយគ្មានបារម្ភឡើយ។ដូច្នេះយើងត្រូវពង្រឹងចំណងសាមគ្គីភាពផ្ទៃក្នុងឲ្យបានល្អ ត្រូវមានគុណធម៌ សីលធម៌ សុជីវធម៌ក្នុងការរស់នៅ ជាមន្ត្រីសមត្ថកិច្ចកើតចេញពីប្រជជន និងដឹងទុក្ខធុរៈរបស់ប្រជាជនគ្រប់កាលៈទេសៈ។
ចុងបញ្ចប់កម្មវិធី គណៈអធិបតី ក៏បានពាំនាំនូវថវិកាមួយចំនួន និងប្រគល់កុំព្យូទ័រចំនួនពីរគ្រឿង ដល់អង្គភាព អង្គភាព ប្រតិបតិ្តការសឹករងកែបផងដែរ៕
សេង ណារិទ្ធ
