កំពត ៖ នៅព្រឹកថ្ងៃ ១២កើត ខែផល្គុន ឆ្នាំរកា នព្វស័ក ព.ស ២៥៦១ ត្រូវនឹងថ្ងៃទី២៦ខែកុម្ភៈ ឆ្នាំ២០១៨ រដ្ឋបាលខេត្តកំពត បានធ្វើសន្និបាតបូកសរុបលទ្ធផលការងារប្រចាំឆ្នាំ ២០១៧និងលើកទិសដៅការងារសម្រាប់ឆ្នាំ២០១៨ ក្រោមវត្តមានលោក ជាវ តាយ អភិបាល នៃគណៈអភិបាលខេត្តកំពត និងលោក អ៊ឹង ម៉េងហួរ ប្រធានក្រុមប្រឹក្សាខេត្ត។សន្និបាតនេះបានរៀបចំឡើងនៅក្នុងសាលប្រជុំសាលាខេត្តកំពត ដោយមានការចូលរួមយ៉ាងច្រើនកុះករ ពីសំណាក់អស់លោក លោកស្រី ជាអភិបាលរងខេត្ត លោក លោកស្រី ប្រធាន អនុប្រធានមន្ទីរអង្គភាពជុំវិញខេត្ត កងកម្លាំងប្រដាប់អាវុធគ្រប់អង្គភាព និងអាជ្ញាធរដែនដីគ្រប់លំដាប់ថ្នាក់។
ក្នុងឱកាសបើកសន្និបាត លោក ជាវ តាវ អភិបាលខេត្ត បានគូសបញ្ជាក់ថា ដោយអនុវត្តតាមកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៣ របស់រាជរដ្ឋាភិបាលកម្ពុជា ដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ជាប្រមុខដឹកនាំប្រកបដោយគតិបណ្ឌិត បានបន្តការដឹកនាំកិច្ចដំណើរការកំណែទម្រង់វិមជ្ឈការនិងវិសហមជ្ឈការ ជាពិសេសកំណែទម្រង់រដ្ឋបាលសាធារណៈ ការគ្រប់គ្រងហិរញ្ញវត្ថុសាធារណៈ ការលើកកម្ពស់ការអភិវឌ្ឍតាមបែបលទ្ធិប្រជាធិបតេយ្យនៅថ្នាក់ក្រោមជាតិ ការពង្រឹងសមត្ថភាពមន្ត្រីរាជការឲ្យប្រកាន់ខ្ជាប់ឥរិយាបទទាំងបួន គឺឆន្ទៈម្ចាស់ការ ភក្តីភាព មនសិកាវិជ្ជាជីវៈ និងវប្បធម៌សេវាសាធារណៈ ព្រមទាំងពង្រឹងការយល់ដឹងពីគុណតម្លៃ និងគុណផល លុបបំបាត់ភាពអសកម្មតាមរយៈអភិក្រមទាំង៥ គឺ ឆ្លុះកញ្ចក់ មុជទឹក ដុសក្អែល ព្យាបាល និងវះកាត់ ព្រមទាំងជំរុញលើកទឹកចិត្តដល់មន្ត្រីរាជការឲ្យមានភាពស្វាហាប់ និងលើកទឹកចិត្តបំពេញការងារក្នុងស្មារតីទទួលខុសត្រូវខ្ពស់សំដៅជំរុញការផ្តល់សេវាជូនប្រជាពលរដ្ឋ ឆ្លើយតបនឹងតម្រូវការជាក់ស្តែងរបស់ប្រជាពលរដ្ឋប្រកបដោយគណនេយ្យភាពនិងតម្លាភាព។ទន្ទឹមនេះ ក៏មានការគិតគូរអំពីប្រយោជន៍របស់មន្ត្រីរាជការប្រកបដោយសមធម៌ ដោយផ្អែកលើសកម្មភាពការងារ ជាពិសេសគឺការអនុវត្តស្របតាមនីតិវិធីការដំឡើងថ្នាក់ ឋានន្តរស័កិ្តនិងមុខតំណែង តួនាទីរបស់មន្ត្រីរាជការ ផ្តល់ការលើកទឹកចិត្ត តាមរយៈការជូនប័ណ្ណសរសើរ មេដាយ គ្រឿងឥស្សរិយយស និងផ្តល់រង្វាន់លើកទឹកចិត្ត ព្រមទាំងការផ្តល់ប្រាក់បៀវត្យប្រចាំខែបានទៀងទាត់។
អនុវត្តច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ ក្រុមប្រឹក្សាខេត្ត ក្រុមប្រឹក្សាក្រុង និងក្រុមប្រឹក្សាស្រុក ដោយបានអនុវត្តនូវតួនាទីរបស់ខ្លួនយ៉ាងខ្ជាប់ខ្ជួនក្នុងភាពជាតំណាងរបស់ប្រជាពលរដ្ឋ និងស្វ័យភាព ដើម្បីសម្រេចគោលបំណងក្នុងការបង្កើន ការជំរុញ និងការធ្វើឲ្យមានចីរភាពដល់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ដោយខិតខំបំពេញមុខងារជាកាត្វកិច្ច និងមុខងារជាជម្រើស នៅក្នុងដែនសមត្ថកិច្ចរបស់ខ្លួន ប្រកបដោយចរិយាប័ន្ន និងសមធម៌សង្គម ស្របតាមផែនការជាតិ ច្បាប់និងលិខិតបទដ្ឋានណែនាំផងដែរ៕
សេង ណារិទ្ធ
