កំពត ៖ នៅរសៀលថ្ងៃសុក្រ៩កើតខែផល្គុន ឆ្នាំរកា នព្វស័ក ព.ស២៥៦១ត្រូវនឹងថ្ងៃទី២៣ខែកុម្ភៈ ឆ្នាំ២០១៨ លោកស្រី លាង ហៃ ជាវ តាយ ភរិយា លោក ជាវ តាយ អភិបាលនៃគណៈអភិបាលខេត្ត រួមនិងសមាជិកគណៈកម្មាធិការសាខាកាកបាទក្រហមកម្ពុជាខេត្តកំពតនិងសហការីព្រមទាំងយុវជនកាកបាទក្រហម បានអញ្ជើញចុះជួបសំណេះសំណាលសួរសុខទុក្ខ និងនាំយកអំណោយមនុស្សធម៌ ផ្ដល់ជូនស្ត្រី ដែលទើបនឹងសម្រាលបុត្ររួច ចំនួន៥៣នាក់ នៅមន្ទីរពេទ្យបង្អែកខេត្តកំពត ។
នាឱកាសនោះលោកស្រី លាង ហៃ ជាវ តាយ បានបញ្ជាក់លើកឡើងពីគោលបំណង នៃការយកចិត្តទុកដាក់លើកកម្ពស់ចំពោះសុខភាពមាតា ទារក និងកុមារ និងដើម្បីផ្សារភ្ជាប់នៃការអបអរសាទរទិវាជាតិសុខភាពមាតា ទារក និងកុមារ ។ ពិសេសដើម្បីរួមចំណែកគាំទ្រ “ឥស្សរជនឆ្នើមថ្នាក់ជាតិ នៃផែនការសកម្មភាពរួម អគ្គលេខាធិការអង្គការសហប្រជាជាតិ ដើម្បីសុខភាពស្ត្រី និងកុមារ” កាកបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន តែងតែមានការយកចិត្តទុកដាក់គិតគូរខ្ពស់ចំពោះសុខភាពបងប្អូនជាស្ដ្រី និងកុមារ។
លោកស្រី លាង ហៃ ជាវ តាយ ក៏បានពាំនាំនូវការផ្ដាំផ្ញើសួរសុខទុក្ខចំពោះបងប្អូនស្ត្រីដែលទើបសម្រាលបុត្រពីសំណាក់ សម្ដេចកិត្តិព្រឹទ្ធបណ្ឌិតប៊ុន រ៉ានី ហ៊ុនសែនប្រធានកាកបាទក្រហមកម្ពុជា ដែលជានិច្ចកាលសម្ដេចកិត្តិព្រឹទ្ធបណ្ឌិត តែងតែមានការយកចិត្តទុកដាក់គិតគូរខ្ពស់ចំពោះស្ត្រីនិងកុមារ ពិសេសសុខភាពស្ត្រី និងទារកទើបសម្រាលបុត្រហើយ ។ សម្ដេចកិត្តិព្រឹទ្ធបណ្ឌិតតែងតែធ្វើការអំពាវនាវសូមឲ្យស្ត្រីយើងទាំងអស់អញ្ជើញទៅពិនិត្យសុខភាពក្រោយពេលសម្រាលទាំងមាតា ទាំងទារក និងទទួលថ្នាំបង្ការជំងឺ១១មុខ តាមការណែនាំ និងតាមកាលកំណត់របស់គ្រូពេទ្យ ។ និងសូមបំបៅទារកដោយទឹកដោះម្ដាយតែមួយមុខគត់ ចាប់ពីពេលទារកទើប្រសូត្រភ្លាម រហូតដល់ទារកមានអាយុ៦ខែនិងសូមប្រញាប់យកទារកទៅមន្ទីរពេទ្យភា្លម នៅពេលឃើញសញ្ញាគ្រោះថ្នាក់ណាមួយ នៃជំងឺរលាកផ្លូវដង្ហើម ជំងឺរាគ ឬជំងឺឆ្លងដទៃទៀត។
អំណោយមនុស្សធម៌ដែលបានផ្ដល់ជូនបងប្អូនស្ត្រីនាឱកាសនោះក្នុងម្នាក់ៗទទួលបាន៖
ត្រីខ១០កំប៉ុង ទឹកដោះគោឆៅ១ឡូ មី១កេះ និងឃីតមួយកញ្ចប់ រួមមាន មុង ភួយ សារុង កន្សែងម្សៅ សាប៊ូ ស្រោមដៃជើងនិងមួក សំលៀកបំពាក់ទារក និងថវិកា៥ម៉ឺនរៀលផងដែរ ៕
សេង ណារិទ្ធ
