កំពត ៖ មនុស្សបីនាក់រួមជាមួយនឹងវត្ថុតាងពាក់ព័ន្ធគ្រឿងញៀនមួយចំនួន ត្រូវបានកម្លាំងសមត្ថកិច្ចនៃស្នងការដ្ឋាននគរបាលខេត្តកំពត បង្ក្រាបបាននៅគោលដៅបីកន្លែងខុសគ្នា ក្នុងថ្ងៃតែមួយ។
យុទ្ធនាការខាងលើបានអនុវត្តឡើងតាមការបញ្ជាផ្ទាល់ពីលោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការនគរបាលខេត្ត និងសម្រួលនីតិវិធីពីលោក ឯក ឆេងហ៊ួត ព្រះរាជអាជ្ញាអមសាលាដំបូងខេត្តកំពតផងដែរ។
ពាក់ព័ន្ធនឹងការបង្ក្រាបខាងលើនេះ លោក លក ញ៉ាវ នាយការិយាល័យព្រហ្មទណ្ឌកម្រិតស្រាលខេត្ត បានឲ្យដឹងថា ការបង្ក្រាបសំបុក ចែកចាយប្រើប្រាស់គ្រឿងញៀននេះ គឺមានបីកន្លែង និងពេលវេលាខុសគ្នាក្នុងថ្ងៃតែមួយ ដោយករណីទី១-នៅវេលាម៉ោង១៤និង៣០នាទីរសៀល ថ្ងៃទី២២ខែកុម្ភៈ ឆ្នាំ២០១៨ ដោយបានចុះបង្ក្រាបទីតាំងលាក់ខ្លួនប្រើប្រាស់គ្រឿងញៀនមួយកន្លែង នៅភូមិអណ្តូងខ្មែរ សង្កាត់អណ្តូងខ្មែរ ក្រុងកំពត ឃាត់ខ្លួនជនសង្ស័យម្នាក់ឈ្មោះ នូ ឡុច ភេទប្រុស អាយុ៣៤ឆ្នាំ ដកហូតថ្នាំញៀនចំនួន២កញ្ចប់តូច។ករណីទី២-នៅវេលាម៉ោង១៦និង២០នាទីរសៀល ថ្ងៃទី២២ខែកុម្ភៈ ឆ្នាំ២០១៨ ចុះបង្ក្រាបកន្លែងជួញដូរប្រើប្រាស់គ្រឿងញៀនមួយកន្លែងទៀតនៅភូមិក្រាំង សង្កាត់ក្រាំងអំពិល ក្រុងកំពត ឃាត់ខ្លួនជនសង្ស័យបានម្នាក់ ឈ្មោះ ឈុត ហាក់ថុនា ភេទប្រុស អាយុ២៣ឆ្នាំ មានទីលំនៅភូមិស្វាយធំ សង្កាត់ក្រាំងអំពិល ក្រុងកំពត ខេត្តកំពត ដកហូតថ្នាំញៀនមួយកញ្ចប់តូច។ករណីទី៣-នៅវេលាម៉ោង១៧និង០០នាទីល្ងាច ថ្ងៃទី២២ខែកុម្ភៈ ឆ្នាំ២០១៨ កម្លាំងឈុតខ្មៅក៏បានចុះបង្ក្រាបទីតាំងចែកចាយប្រើប្រាស់គ្រឿងញៀនបានមួយកន្លែងទៀត ស្ថិតចំណុចខាងកើតចំណតរថយន្តតូតាល ក្នុងភូមិក្រាំង សង្កាត់ក្រាំងអំពិល ក្រុងកំពត ដោយឃាត់ខ្លួនជនសង្ស័យម្នាក់ទៀត ឈ្មោះ មឹង សុភាព ហៅវែង ភេទប្រុស អាយុ៣៧ឆ្នាំ មានទីលំនៅស្ថិតនៅចំណុចខាងលើ វត្ថុតាងរឹបអូសរួមមាន៖ ថ្នាំញៀន៣កញ្ចប់ ក្នុងនោះ១កញ្ចប់ធំ ២កញ្ចប់តូច ,ជញ្ជីងសម្រាប់ថ្លឹងថ្នាំញៀនមួយ ថង់សម្រាប់វេចខ្ចប់មួយចំនួនធំ ក្រដាសជាតិអាលុយមីញ៉ូមមួយដុំ ឧបករណ៍សម្រាប់ជក់មួយកំប្លេផងដែរ។
បច្ចុប្បន្នជនសង្ស័យទាំងបីនាក់ រួមជាមួយនឹងវត្ថុតាងត្រូវបានសមត្ថកិច្ចរៀបចំកសាងសំណុំរឿងដើម្បីចាត់ការតាមនីតិវិធីនៅព្រឹកថ្ងៃទី២៣ខែកុម្ភៈ ឆ្នាំ២០១៨នេះ៕
ឮសេង ណារិទ្ធ
