កែប ៖ យ៉ាងហោចណាស់មនុស្ស៤នាក់បានរងរបួសធ្ងន់ ស្រាល ដេករដូករណែលនៅលើដងផ្លូវ ខណៈម៉ូតូមួយគ្រឿងជិះគ្នាបីនាក់បុកស្ត្រីម្នាក់ដើរឆ្លងផ្លូវ។
ហេតុការណ៍នេះបានកើតឡើងនៅវេលាម៉ោង៧និង៣០នាទីយប់ ថ្ងៃទី២០ខែកុម្ភៈ ឆ្នាំ២០១៨ ត្រង់ចំណុចខាងលិចមណ្ឌលសុខភាពអូរក្រសារ នៃភូមិដំណាក់ចំបក់ សង្កាត់អូរក្រសារ ក្រុង-ខេត្តកែប លើកំណាត់ផ្លូវជាតិលេខ៣៣។
សាក្សីដែលឃើញហេតុការណ៍ខាងលើបាននិយាយថា មុនពេលជួបករណីដ៏អាក្រក់នេះ គេឃើញស្ត្រីម្នាក់ដើរឆ្លងផ្លូវនៅចំណុចខាងលើ បន្តិចក្រោយមកស្រាប់តែមានម៉ូតូមួយគ្រឿងបោះពួយមកពីលិចទៅកើត ក្នុងល្បឿនមធ្យម ក៏វាក់អឺជាមួយនឹងអ្នកថ្មើជើងនោះ ហើយគេចមិនទាន់ក៏បុកមនុស្សពេញទំហឹង បណ្តាលឲ្យដួលច្រងាប់ច្រងិលទាំងអស់គ្នាតែម្តង ។ សាក្សីដដែលបានបន្តថា ក្រោយពេលកើតហេតុដោយសារឃើញស្ថានភាពរបួសធ្ងន់ធ្ងរសាច់ញាតិក៏បានបញ្ជូនស្ត្រីរងគ្រោះទៅសង្គ្រោះនៅឯមន្ទីរពេទ្យបង្អែកខេត្តកែបភ្លាមៗតែម្តង ។
ទាក់ទិននឹងករណីគ្រោះថ្នាក់ខាងលើ សមត្ថកិច្ចបានប្រាប់ឲ្យដឹងថា ក្នុងហេតុការណ៍គ្រោះថ្នាក់នេះបណ្តាលឲ្យអ្នកថ្មើជើងម្នាក់រងរបួសធ្ងន់ និងអ្នកជិះម៉ូតូបីនាក់របួសស្រាលរួមមាន៖ ទី១-ឈ្មោះ សឿន វី ភេទប្រុស អាយុ១៧ឆ្នាំ មុខរបរជាសិស្ស ជាអ្នកបើកបរ របួសស្រាល ទី២-ឈ្នោះ ខេង ដា ភេទប្រុស អាយុ១៦ឆ្នាំ ជាសិស្ស អ្នករួមដំណើរ របួសស្រាល ទី៣-ឈ្មោះ សឿន វីន ភេទប្រុស អាយុ១៧ឆ្នាំ ជាសិិស្ស អ្នករួមដំណើរ របួសស្រាល ទាំងបីនាក់រស់នៅភូមិកោះម៉ាក់ប្រាង ឃុំបឹងសាលាខាងជើង ស្រុកកំពង់ត្រាច ខេត្តកំពត ពួកគេជិះម៉ូតូម៉ាកសង់កូរ៉េ ពណ៌ក្រហម គ្មានស្លាកលេខ។ ដោយឡែកស្ត្រីរងគ្រោះជាអ្នកថ្មើជើង ឈ្មោះ ទឹម ស៊ីណា អាយុ៣៨ឆ្នាំ រស់នៅភូមិអូរក្រសារ សង្កាត់អូរក្រសារ ក្រុងកែប ខេត្តកែប។
បច្ចុប្បន្ន សមត្ថកិច្ចបាននាំយកវត្ថុតាងទៅរក្សាទុកនៅក្នុងអធិការដ្ឋាននគរបាលក្រុងកែប រង់ចាំធ្វើការដោះស្រាយគ្នាជាក្រោយ៕
សេង ណារិទ្ធ
