ខេត្តរតនគិរីៈ ប៉ូលិសប្រឆាំងបទល្មើសសេដ្ឋកិច្ចបង្ក្រាបគោយន្តដឹកឈើពេញដែលឈ្មួញឃុបឃិតជាមួយមេប៉ុស្តិ៍សង្កេការច្រករបៀងអូរសេដ្ឋីបម្រុងនាំទៅលក់នៅប្រទេសវៀតណាម ហើយសកម្មភាពជំនួញឈើប្រណិតនិងឈើក្រហមតាមច្រករបៀងខាងលើនេះគឺប្រព្រឹត្តឡើងរាប់ឆ្នាំមកហើយ។
មន្ត្រី្កកងកម្លាំងនគរបាលប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលមួយរូបបានអោយដឹងថា ឈ្មួញកំពុងតែសម្រុកដឹកឈើទៅលក់នៅប្រទេសវៀតណាមតាមច្រកពាមអូរសេដ្ឋីនោះ កម្លាំងរបស់លោកបានដាក់ស្ទាក់ចាំមើល ហើយក៏ឈានចូលទៅចាប់បានគោយន្តកែច្នៃមួយគ្រឿងធំដែលផ្ទុកឈើប្រភេទលេខ១ មានសុក្រំ និងខ្វាវ ។
ហេតុការណ៍ដែលប៉ូលិសបង្ក្រាបបានឈើនោះ កាលពីវេលាម៉ោង៩យប់ ថ្ងៃទី០៥ ខែឧសភា ស្ថិតនៅភូមិពែង ឃុំញ៉ាង ស្រុកអណ្តូងមាស ដែលឈ្មួញបម្រុងនាំទៅលក់នៅប្រទេសវៀតណាម តាមច្រករបៀងពាមអូរសេដ្ឋី ដោយមានការឃុបឃិតជាមួយមេប៉ុស្តិ៍សង្កេតការឈ្មោះ វរសេនីយ៍ និន ណា (ហៅប៉ិច) ចំណុះអោយនគបាលការពារព្រំដែនគោក៦២៣ ដែលគ្រប់គ្រងដោយលោកវរសេនីយ៍ ងួន សុវណ្ណ។
ចំណែកប៉ុស្តិ៍សង្កេតការរបស់កងទ័ពគ្រប់គ្រងដោយឈ្មោះ អូន វ៉ៃ ញាប់ ចំណុះអោយមូលដ្ឋានកងទ័ពវរៈ១០២ ដែលគ្រប់គ្រងដោយលោកវរៈសេនីយ៍លី វណ្ណារ៉ា។ ហើយមេប៉ុស្តិ៍សង្កេតការទាំង២រូបនោះមានទេពកោសល្យក្នុងការឃុបឃិតជាមួយជនជាតិវៀវណាមលួចជួញដូរឈើប្រណិតនិងឈើក្រហមអាណាធិបតេយ្យរាប់ឆ្នាំមកហើយ ដើម្បីយកលុយទៅបំពេញមហិច្ឆិតាមេរបស់ខ្លួនព្រោះម្នាក់ៗនៅក្រាញ់ ឫសឹងតែដុះស្លែទៅហើយ រហូតមកដល់ពេលនេះ។
ជុំវិញការចោទប្រកាន់ជំនួនឈើប្រណិតដែលបានប្រព្រឹត្តរាប់ឆ្នាំមកហើយតាមច្រករបៀងពាមអូរសេដ្ឋីនោះ មេប៉ុស្តិ៍សង្កេតការលោក និន ណា (ហៅប៉ិច) និងលោកអូន វ៉ៃញាប់ មិនអាចសុំការបំភ្លឺណាមួយបានទេនៅរសៀលថ្ងៃទី០៦ ខែឧសភា ឆ្នាំ២០១៥នេះ៕
សន ចានឌី
