បាត់ដំបង៖ឯកឧត្តមរដ្ឋលេខាធិការក្រសួងសារធារណការណ៍និង ដឹកជញ្ជូន លោក ច័ន្ទ សុផល អភិបាលខេត្តនិងលោក ខាន់ ម៉ាណេរ ប្រធានមន្ទីរសារធារណការ និងដឹកជញ្ជូនខេត្តបាត់ដំបង បានដឹកនាំកម្លាំងក្រុមការងារចុះសួរសុខទុក្ខប្រជាពលរដ្ឋ ផ្ទុកមេរោគអេដស៏ និងពិនិត្យផ្លូវក្នុងឃុំរកាស្រុកសង្កែ នារសៀលថ្ងៃទី៥ ខែឧសភា ឆ្នាំ២០១៥ ។
ឯកឧត្តម លឹម ស៊ីដេនីន រដ្ឋលេខាធិការក្រសួងសារធារណការណ៍ និងដឹកជញ្ជូនបានមានប្រសាសន៍ទៅកាន់ប្រជាពលរដ្ឋចំនួន២៨០នាក់ ដែលមានផ្ទុកមេរោគអេដស៏ថា ជម្ងឺអេដស៏បានកើតឡើងនៅប្រទេសកម្ពុជា សម័យអ៊ុនតាក់ UN ហើយក៏បានសាបរលាបទៅវិញជាបណ្តើរៗ ម្យ៉ាងទៀត អ្នកផ្ទុកមេរោគអេដស៏ខ្លះក៏បានរស់រាន្តមានជីវិតដល់សព្វថ្ងៃនេះ តែផ្ទុយទៅវិញ ជាអកុសលមេរោគអេដស៏នេះ បានធ្លាក់មកដល់ឃុំរកាជាថ្មី ធ្វើអោយមានការភ្ញាក់ផ្អើលជាខ្លាំង ។ ទោះជាយ៉ាងណា បងប្អូនដែលកើតមេរោគអេដស៍នេះកុំអស់សង្ឍឹម ដោយបច្ចុប្បន្ន មានថ្នាំពន្យាពេលសង្គ្រោះអោយបងប្អូនរស់បានយូរ ចំណែកសេចក្តីស្លាប់ខ្លះ វាកើតលឿងជាងអ្នកមានជម្ងឺទៅទៀត ជាពិសេសអ្នកស្លាប់ដោយគ្រោះថ្នាក់ចរាចរណ៍ ។
នៅក្នុងឱកាសសួរសុខទុក្ខ ក្រុមការងារបាននាំអំណោយជូនប្រជាពលរដ្ឋ២៨០នាក់ ក្នុងម្នាក់ទទួលបានទឹកដោះគោ១កេះនិងទឹកស៊ីអ៊ីវ ១ យួរ ផងដែរ ។
បន្ទាប់ពីសួរសុខទុកប្រជាពលរដ្ឋរួច ក្រុមការងារបានពិនិត្យផ្លូវចំនួន២ខ្សែ ដែលកំពុងស្ថាបនាក្នុងនោះ ផ្លូវលេខ១៥៤H1មានទទឹង ៦ ម៉ែត្រ ប្រវែង៤៩០០ម៉ែត្រ គម្រោងក្រាលកៅស៊ូតភ្ជាប់ពីផ្លូវ១៥១bb2 និងផ្លូវលេខ១៥៤H2 មានទទឹង៩ម៉ែត្រប្រវែង១១៦០០ម៉ែត្រ គម្រោងក្រាលគ្រួសក្រហមតភ្ជាប់ពីផ្លូវវត្តអូរមុនី ដល់ចំណុចដំបូកមានបុណ្យ ដើម្បីងាយស្រួលដល់ថ្នាក់ដឹកនាំផ្សេងៗ ឬអង្គការនានាធ្វើដំណើរទៅសួរសុខទុក្ខប្រជាពលរដ្ឋ ដែលមានជម្ងឺទាំងនោះ និងបមរើការដឹកកសិផលបានឆាប់រហ័សទាន់ចិត្ត ៕
