ប៉ៃលិន ៖ មន្ទីរសុខាភិបាលខេត្តប៉ៃលិន សហការជាមួយអង្គការដៃគូរ ប្រារព្ធទិវាជាតិប្រយុទ្ធនឹងជំងឺគ្រុណចាញ់ថ្ងៃទី២៥ ខែមេសា ដើម្បីលើកកម្ពស់ការយល់ដឹងរបស់ប្រជាពលរដ្ឋអំពីវិធីការពារ ការស្វែងរករោគវិនិច្ឆ័យ និងព្យាបាលទាន់ពេលវេលាចំពោះអ្នកដែលសង្ស័យថាកើតជំងឺគ្រុញចាញ់ឬអ្នកកើតជំងឺគ្រុណចាញ់ ។
ពិធីនេះត្រូវបានប្រារព្ធធ្វើឡើងកាលពីព្រឹកថ្ងៃទី២២ខែមេសាឆ្នាំ២០១៥ នៅក្នុងបរិវេណ មន្ទីរសុខាភិបាលខេត្តប៉ៃលិន ក្រោមអធិបតីភាពលោក ម៉ី មគ្គ អភិបាលរងខេត្តប៉ៃលិន លោក សេង រ៉ន ប្រធានមន្ទីរសុខាភិបាលខេត្តប៉ៃលិន ដោយមានការចូលរួមពីអង្គការដៃការគូរ ប្រជាពលរដ្ឋ សិស្សានុសិស្ស ជាច្រើនរយនាក់ផងដែរ ។
លោក សេង រ៉ន ប្រធានមន្ទីរសុខាភិបាលខេត្តប៉ៃលិនបានមានប្រសាសន៍ថានៅខេត្តប៉ៃលិនមានសេវាព្យាបាលជំងឺគ្រុណចាញ់ចំនួន៧កន្លែងគឺនៅមន្ទីរពេទ្យបង្អែកខេត្តមួយកន្លែង និងនៅតាមមណ្ឌលសុខភាពចំនួន ៦កន្លែងនៅទូទាំងខេត្តប៉ៃលិន ។ ចំណែកនៅតាមសហគមន៍មានអ្នកស្ម័គ្រចិត្តព្យាបាលជំងឺគ្រុណចាញ់ចំនួន២២៦នាក់ និងមានក្រុមចល័តព្យាបាលជំងឺ គ្រុណចាញ់ចំនួន៤៥នាក់ដែលមាននៅគ្រប់ភូមិទូទាំងខេត្ត ។
លោកបានបន្តថា ក្នុងរយៈពេលជាង ១០ ឆ្នាំកន្លងទៅ យើងសម្រេចបានជោគជ័យលើការ កាត់បន្ថយអត្រាឈឺ និងស្លាប់ដោយសារជំងឺគ្រុណចាញ់ ។ ករណីជំងឺគ្រុណចាញ់បានថយចុះពី ៧៣៧៣ករណីនៅឆ្នាំ២០០៥ មកត្រឹម៤៩៨ករណីនៅឆ្នាំ២០១៤ ។
លោកបានបញ្ជាក់ថា ចាប់តាំងពីឆ្នាំ ២០០៩ មកដល់បច្ចុប្បន្ន គឺគ្មានករណីប្រជាពលរដ្ឋ ស្លាប់ដោយសារជំងឺគ្រុណចាញ់ទេ ក្នុងខេត្តប៉ៃលិន ។
លោកវេជ្ជបណ្ឌិត តុល ប៊ុនអូន តំណាងមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ បាណកសាស្ត្រ បានមានប្រសាសន៍ថាចំនួនអ្នកស្លាប់ដោយសារជំងឺគ្រុណចាញ់នៅកម្ពុជាក្នុងឆ្នាំ២០០០ដល់២០១៣ បានថយចុះចំនួន៩៨ភាគរយ ក្នុងខណៈចំនួនអ្នកស្លាប់ ដោយសារជំងឺគ្រុណចាញ់បានថយនចុះត្រឹមតែ៤៧ភាគរយក្នុងរយៈពេលដូចគ្នា។
លោកបានបញ្ជាក់ថា ក្នុងឆ្នាំ២០១៤ ចំនួនអ្នកស្លាប់ដោយសារជំងឺគ្រុនចាញ់មានការ កើនឡើងរហូតដល់ ៥៨ ភាគរយ (អ្នកស្លាប់មានចំនួន១៨នាក់) បើប្រៀបធៀប និងឆ្នាំ២០១៣ (អ្នកស្លាប់ចំនួន១២នាក់) ។
លោក ម៉ី មគ្គ អភិបាលរងខេត្តប៉ៃលិនបានមានប្រសាសន៍ថា ខេត្តប៉ៃលិនជាខេត្តមួយ ដែលមានជំងឺគ្រុនចាញ់កើតឡើងច្រើន ។ ប៉ុន្តែដោយមានការយកចិត្តទុកដាក់ពីរាជរដ្ឋាភិបាល និងមានការសហការពីអង្គការដៃគូរ ដែលគាំទ្រផ្នែកសុខាភិបាលបានធ្វើការផ្សព្វផ្សាយពីវិធីការ ពារ និងការព្យាបាល ជំងឺគ្រុណចាញ់ដល់ប្រជាពលរដ្ឋនៅតាមមូលដ្ឋានធ្វើឲ្យពួកគាត់អាចជៀសផុតពីការកើតជំងឺគ្រុណចាញ់តទៅទៀត ។
លោកបានអំពាវនាវដល់ប្រជាពលរដ្ឋទាំងអស់ត្រូវចេះការពារខ្លួន ដើម្បីឲ្យកើតជំងឺគ្រុនចាញ់ដោយដេកក្នុងមុងជ្រលកថ្នាំជានិច្ចជាពិសេសក្មេងៗ ។ ប្រសិនមានការសង្ស័យថា កើតជំងឺគ្រុnចាញ់ត្រូវប្រញាប់មកមន្ទីរពេទ្យ ឬមណ្ឌលសុខភាពភ្លាមដើម្បីធ្វើតេស្តរកមេរោគ ក្នុងករណីដែលមានកើតជំងឺគ្រុណចាញ់ត្រូវលេបថ្នាំទៅតាមការណែនាំរបស់គ្រូពេទ្យដើម្បីជៀសវាងមានគ្រោះថ្នាក់ដល់ជីវិត ៕
សំ គូលីន
