ខេត្តស្ទឹងត្រែង ៖ការប្រមូលទិញ ឈើខុសច្បាប់ របស់មេឈ្មួញ សារ៉េត បានប្រើប្រាស់ឈ្មោះ ឧកញ៉ា គិត ម៉េង ដែលមានសិទ្ធិ កាប់បំផ្លាញព្រៃឈើ ដោយជ្រកក្រោមលេស ស្តារបាតអាង ទំនប់វារីអគ្គិសនីដើម្បីប្រយោជន៍ បុគ្គលខ្លួនឯង មិនក្រែងញញើត ពីច្បាប់ទម្លាប់អ្វីទាងអស់ ។ រឿងដែល លោកសារ៉េត កំពុងសម្រុកដឹកឈើ ចូលទីតាំងស្តុករបស់ខ្លួន ទាំងថ្ងៃទាំងយប់ ធ្វើជាចំហរគ្មានអ្វីលាក់បាំងនោះទេ ហើយរឿងដែលគ្មាន នរណាហ៊ានប៉ះពាល់ ក៏ព្រោះតែមន្ត្រីធំៗ និងសមត្ថកិច្ចពាក់ព័ន្ធ ក្នុងខេត្តស្ទឹងត្រែង សុទ្ធតែទទួលបានរបប ពីលោក សារ៉េត ។
មេឈ្មួញដុះស្លែឈ្មោះ សារ៉េត ដែលជាមេការ របស់ឧកញ៉ា គិត ម៉េង កំពុងបំពានច្បាប់ដ៏ធ្ងន់ធ្ងរ តាមរយះសកម្មភាព ប្រមូលទិញ និងដឹកជញ្ជូនឈើ ដែលមិនមានប្រភពច្បាស់លាស់ ជាពិសេសការប្រមូលទិញឈើ ដែលកាប់បំផ្លាញ នៅក្នុងតំបន់ ឧទ្យានជាតិវីរៈជ័យ និងមួយចំនួនទៀត ប្រមូលទិញពី តំបន់វរការពារ ព្រំដែនគោកលេខ១០១ ព្រំប្រទល់កម្ពុជា-ឡាវ ដោយជ្រកក្រោមអាជ្ញាប័ណ្ណ ស្តារបាតអាងវារីអគ្គិសនី ដ៏ចម្រូងចម្រាស់ ក្នុងស្រុកសេសាន។
មន្ត្រីបានឲ្យដឹងថា លោក សារ៉េត តែងប្រមូលទិញ ប្រភេទឈើសុក្រំ ដែលមានមុខកាត់ ៣០សង់ទីម៉ែត្រ ប្រវែង ២ទៅ៣ ម៉ែត្រ ដឹកជញ្ជូនយកមកស្តុកទុក នៅចំណុចគល់ស្ពានស្រែពក ស្ថិតក្នុងស្រុកសេសាន ខេត្តស្ទឹងត្រែង បន្លំជាមួយឈើស្របច្បាប់ របស់ឧកញ៉ា គិត ម៉េង។ លោក សារ៉េត បានឃុបឃិតជាមួយ អាជ្ញាធរខេត្តស្ទឹងត្រែង នាយខណ្ឌរដ្ឋបាលព្រៃឈើ រួមទាំងសមត្ថកិច្ច ជាច្រើនស្ថាប័នទៀត ទើបមន្ត្រីរូចតាច មិនហ៊ានប៉ះពាល់ ការដឹកជញ្ជូនឈើ ដ៏អនាធិបតេយ្យ៕
