យោងតាមសេចក្តីរាយការពីខេត្តកំពត និងកែប បានអោយដឹងថាលោក យូ ប៊ុនស្រៀង ប៉ូលីសបង្ក្រាបបទល្មើសសេដ្ឋកិច្ចនៃក្រសួងមហាផ្ទៃប្រចាំការនៅខេត្តកំពតនិងខេត្តកែបកំពុងតែប្រព្រឹត្តអំពើពុករលួយក្នុងការឃុបឃិតគ្នាជាមួយមេឈ្មួញដឹកទំនិញគេចពន្ធចូលមកពីប្រទេសវៀតណាម ។ ប្រភពដដែលបានអោយដឹងបន្ថែមថា លោក យូ ប៊ុនស្រៀង ដែលទើបតែបានមកឈរជើងនៅក្នុងខេត្តកំពតនិងខេត្តកែបទើបតែបានរយៈពេលមួយខែប៉ុណ្ណោះ។ ប៉ុន្តែ លោក យូ ប៊ុនស្រៀង ហ៊ានបើកដៃអោយក្រុមឈ្នួញដឹកទំនិញគេចពន្ធតាមតែអំពើចិត្ត និងមិនខ្លាចរអានឹងច្បាប់ទាល់តែសោះ។
ទង្វើររបស់លោក យូ ប៊ុនស្រៀង បានធ្វើអោយក្រុមឈ្មួញរកស៊ីស្របច្បាប់បានការរិះគន់យ៉ាងខ្លាំង និងបានលើកឡើងថា “មិនគួរណាលោក យូប៊ុនស្រៀងហ៊ានធ្វើយ៉ាងនេះសោះ ឫលោកខំប្រមូលលុយស្រង់ដើមវិញ បានជាអនុញ្ញាតិអោយទំនិញគេចពន្ធដឹកជញ្ជូនយ៉ាងអណាធិបតេយ្យ គ្មានការទប់ស្កាត់យ៉ាងដូច្នេះ”។
តាមប្រភពពីឈ្មួញដឹកទំនិញ បានអោយថាប៉ូលីសបង្ក្រាបបទល្មើសសេដ្ឋកិច្ចនៃក្រសួងមហាផ្ទៃមកប្រចាំការនៅខេត្តកំពតនិងខេត្តកែបឈ្មោះលោក យូ ប៊ុនស្រៀង ក្រុមឈ្មួញកំពុងតែនិយាយរិះគន់ថាបង់លុយអោយលោកប៉ូលីសយូ ប៊ុនស្រៀងមិនក្រោម ៥០០ដុល្លា (ប្រាំរយដូល្លារ)ទេក្នុងមួយខែៗសំរាប់ឈ្មួញម្នាក់ៗ។ ប្រភពដដែលបន្តថាលោក យូ ប៊ុនស្រៀង ប្រើអំណាចរបស់ខ្លួនទាលុយពីឈ្មួញដឹកទំនិញគ្រប់ប្រភេទដែលបានដឹកទំនិញឆ្លងកាត់ទឹកដីដែលរូបលោកបានកាន់កាប់ (ខេត្តកំពត និងកែប)។
ទស្សនៈអ្នកបានដឹងហេតុការណ៏ លើកឡើងថា ក្រសួងមហាផ្ទៃចាត់តាំង លោក យូប៊ុនស្រៀង ប៉ូលីសបង្ក្រាបបទល្មើសសេដ្ឋកិច្ចមកប្រចាំការ និងធ្វើការទប់ស្កាត់បទល្មើសសេដ្ឋកិច្ច នានាដែលអាចកើតមានឡើងនៅខេត្តកែប និងកំពត។ ប៉ុន្តែគួរអោយសោកស្តាយ លោក យូប៊ុនស្រៀង មិនបានគោរពបទបញ្ជារថ្នាក់លើ ដែលក្រសួងបានចាត់តាំងនោះទេ គឺកំពុងតែជាន់ឈ្លី បទបញ្ជារបេសកកម្មថ្នាក់លើយ៉ាងគឃ្លើន និងសាបព្រួសអំពើពុករលួយ ខណៈរាជរដ្ឋាភិបាលកំពុងប្រយុទ្ធប្រឆាំងដាច់ខាត និងលប់បំបាត់អំពើពុករលួយ។ ទស្សនៈដដែលបន្តថា សកម្មភាពអនុវត្តផ្ទុយពីបទបញ្ជារថ្នាក់លើរបស់លោក យូ ប៊ុនស្រៀង អាចទំនងជាខិតខំរកប្រាក់ស្រង់ដើមដែលលោកបានសូកប៉ាន់មកធ្វើការងារនៅក្នុងខេត្តទាំងពីរនេះ (ខេត្តកំពត និងខេត្តកែប)។
ទាក់ទិននឹងការចោទប្រកាន់ខាងលើ រ មិនអាចសុំការបំភ្លឺពី លោក យូ ប៊ុនស្រៀង ប៉ូលីសបង្ក្រាបបទល្មើសសេដ្ឋកិច្ចរបស់ក្រសួងមហាផ្ទៃ ប្រចាំទឹកដីខេត្តកំពត និងខេត្តកែប បានទេនៅថ្ងៃនេះ៕
