កែប ៖ សម័យប្រឡងសញ្ញាបត្រមធ្យមសិក្សាទុតិយភូមិ(បាក់ឌុប)ក្នុងខេត្តកែប នាព្រឹកថ្ងៃទី២១ខែសីហា ឆ្នាំ២០១៧នេះ ត្រូវបានប្រព្រឹត្តទៅយ៉ាងល្អប្រសើរ ស្ថិតក្នុងអនុវិទ្យាល័យ ហ៊ុន សែន ក្រុងកែប ក្រោមការចូលរួមកាត់ស្រោមវិញ្ញាសារ ពីសំណាក់ លោកកែន សត្ថា អភិបាលនៃគណៈអភិបាលខេត្តកែប ព្រមទាំងមានការពិនិត្យដ៏ប្រុងប្រយ័ត្ន ពីគណៈកម្មការមកពីថ្នាក់ក្រសួង និងថ្នាក់ខេត្តព្រមទាំងស្ថាប័នពាក់ព័ន្ធនានាផងដែរ។
ទាក់ទងនឹងការប្រឡងបាក់ឌុប នៅព្រឹកនេះ ប្រធានមន្ទីរអប់រំ យុវជន និងកីឡាខេត្តកែប លោកងួន ច័ន្ទសុជាតា បានឲ្យដឹងថា បេក្ខជនប្រឡងសញ្ញាបត្រមធ្យមសិក្សាទុតិយភូមិក្នុងឆ្នាំ២០១៧មានចំនួន៣២២នាក់ ក្នុងនោះមានស្រី១៦៥នាក់ ដែលមកពីវិទ្យាល័យចំនួន២គឺវិទ្យាល័យ ហ៊ុន សែន ចំការដូង និងវិទ្យាល័យ ប៊ុន រ៉ានី ហ៊ុន សែន ចរិយាវង្ស។ចំពោះមណ្ឌលប្រឡង ត្រូវបែងចែកជា២មណ្ឌលគឺផ្នែកវិទ្យាសាស្ត្រពិត និងវិទ្យាសាស្ត្រសង្គម ដោយមានចំនួន១៤បន្ទប់ ដែលស្ថិតក្នុងសាលាអនុវិទ្យាល័យ ហ៊ុន សែន ក្រុងកែប។
ចំពោះទិដ្ឋភាពរួមក្នុងថ្ងៃប្រឡងបាក់ឌុបក្នុងខេត្តកែបនាពេលនេះ ពិតជាទទួលបានអំណោយផលដ៏គាប់ប្រសើរ គឺមានភាពសុក្រឹត និងតម្លាភាព ដោយការប្រជែងលើសមត្ថភាពផ្ទាល់ខ្លួន ផ្អែកលើចំណេះដឹង និងភាពវៃឆ្លាត របស់សិស្សានុសិស្ស។ដោយឡែកក្រុមសមត្ថកិច្ចក៏ខិតខំពង្រឹងសន្តិសុខ សុវត្ថិភាព របៀបរៀបរយនៅតាមមុខមណ្ឌលប្រឡងដ៏តឹងរឹងផងដែរ។
មហាជនក៏ដូចជាប្រជាពលរដ្ឋ ក៏មានក្តីសោមនស្សនិងក្តីរីករាយ ចំពោះការរឹតបន្តឹងកុំឲ្យមានការខ្ជីខ្ជា ក្នុងការប្រឡងសញ្ញាបត្របាក់ឌុបនៅទូទាំងប្រទេស ពិសេសនៅខេត្តកែប ដោយកិច្ចការទាំងនេះនឹងបានជម្រុញដល់សិស្សានុសិស្សឲ្យខិតខំរៀនសូត្រ និងពង្រឹងលើសមត្ថភាពខ្លួនឯង ដោយគ្មានអ្នកណាជួយជ្រោមជ្រែង ហើយការបញ្ចេញសមត្ថភាព ផ្អែកលើចំណេះដឹងរបស់ខ្លួននឹងជួយបង្កើនការយល់ដឹងកាន់តែទូលំទូលាយ សម្រាប់ជួយជម្រុញដល់ការស្តា និងអភិវឌ្ឍន៍សង្គមកាន់តែលូតលាស់ថែមទៀត។/ ណារិទ្ធ
