រាជធានីភ្នំពេញ ៖ ចាងហ្វាងកាសែត រស្មីតេជោ លោក ដូត សដែត ត្រូវបានសមត្ថកិច្ចនគរបាលនៃអធិការដ្ឋានខណ្ឌព្រែក ព្នៅឆ្មក់ចុះមកចាប់ឃាត់ខ្លួន នៅចំណុចផ្លូវឌឿងហែម ខាងត្បូងសណ្ឋាគារ ជា លី ស្ថិតក្នុងសង្កាត់ផ្សារ ដេប៉ូទី៣ ខណ្ឌទួលគោក រាជធានីភ្នំពេញ រួមជាមួយ ឈ្មោះ ស្រូយ ម្នាក់ទៀត កាលពីព្រឹកថ្ងៃទី១៧-០៨- ២០១៧ ដោយវ៉ៃខ្នោះរុញបញ្ចូលឡានហៃឡែនដ័រ បើកចេញយ៉ាងប្រញាប់ប្រញាល់បំផុត។
យោងតាម ប្រភពព័ត៌មានពីអ្នកកាសែតដែលបានឃើញហេតុការណ៍បានឲ្យដឹងថា នៅព្រឹកនោះ គឺលោកដូត សាដែត បានទូរស័ព្ទសំភាសន៍ លោកអធិការនគរបាលព្រែកព្នៅ ប៉ុន្តែគេមិនបានដឹងថា ពាក់ព័ន្ធរឿងអីនោះទេ តែ ក្រោយមកលោកសាដែតបានប្រើឈ្មោះស្រូយឲ្យទៅ យកលុយ១០០$ពីអធិការខណ្ឌព្រែកព្នៅ ។ ស្រាប់តែមួយស្របក់ក្រោយមក ឡានប៉ូលិសដឹកឈ្មោះស្រូយ មកដល់គោលដៅ ចំពេលលោកដែត និងមិត្តភ័ក្ត៣-៤នាក់កំពុងផឹកស៊ី ប៉ូលិសព្រហ្មទណ្ឌមាឌឌាំងៗ ពីរនាក់ចុះពីឡាន រួចហៅលោកដែតឲ្យក្រោកឈរ ដើរចេញពីតុផឹក ឆ្ពោះមកឡាន រួចប៉ូលិសវ៉ៃខ្នោះបញ្ចូលឡានដឹកចេញភ្លាម ។
ទាក់ទិននឹងករណីនេះភ្នាក់ងារសារព័ត៌មាន យើងមិន ទាន់អាចសុំការបំភ្លឺពីអធិការនគរបាលខណ្ឌព្រែកព្នៅ បាននៅឡើយទេព្រោះគ្មានលេខទូរស័ព្ទ ។ តែករណី នេះមន្ត្រីប៉ូលិសបានបញ្ជាក់ប្រាប់តាមទូរស័ព្ទឲ្យដឹងថា ពិតជាមានការចាប់អ្នកកាសែតពីរនាក់មែន៕
