ខេត្តបន្ទាយមានជ័យ ៖ នៅព្រឹកថ្ងៃទី១៧ ខែសីហា ឆ្នាំ២០១៧នេះ ម្សិលមិញនេះ នៅសណ្ឋាគាលីហេងឆាយ មានរៀបចំពិធីបូកសរុបលទ្ធផលការងារឆមាសទី១និងទិសដៅបន្តឆមាសទី២ឆ្នាំ២០១៧របស់ការិយាល័យទំនាក់ទំនងព្រំដែនកម្ពុជា-ថៃ ។ ក្រោមអធិបតីភាពលោកឧត្តមសេនីយ៍ទោ ពេជ្រ វណ្ណា នាយករងទីចាត់ការ ការងារព្រំដែនអគ្គបញ្ជាការដ្ឋាននិងជាប្រធានការិយាល័យ ទំនាក់ទំនងព្រំដែនកម្ពុជា-ថៃ។ដោយមានការចូលរួមពីលោកប្រធានច្រកតាមបន្ទាត់ព្រំដែនកម្ពុជា-ថៃទាំង២៤ផងដែរ ។
ក្នុងឱកាសនោះដែរ លោកឧត្តមសេនីយ៍ទោ ពេជ្រ វណ្ណា បានមានប្រសាសន៍ថា ៖ នៅតាមបន្ទាត់ព្រំដែនកម្ពុជា-ថៃ ក្រុមការងារចម្រុះតាមបណ្តាលច្រកទ្វារព្រំដែនបានបំពេញការងារ សម្របឆ្លងដែនជូនមន្ត្រីរាជការ ពលរដ្ឋទៅប្រទេសថៃចំនួន៨,៩៤១លើក,សម្របឆ្លងដែនជូនមន្ត្រីរាជការ ពលរដ្ឋមកប្រទេសកម្ពុជាចំនួន៩១១លើក,ចូលរួមប្រជុំជាមួយស្ថាប័នពាក់ព័ន្ធនិងពិធីផ្សេងៗចំនួន២៨១លើក, រួមសហការប្រតិបត្តិការណ៍ជាមួយភាគីថៃចំនួន៨៩លើក,សហការល្បាតព្រំដែនក្នុងភូមិសាស្ត្រចំនួន១១៦លើក ។
ដោយឡែក សភាពការណ៍សន្តិសុខក្នុងឆ្នាំ២០១៦-២០១៧ ពលរដ្ឋកម្ពុជាចូលលួចកាប់ឈើខុសច្បាប់ ត្រូវបានសមត្ថកិច្ចថៃចាប់ចំនួន២៨លើក,ការបង្ក្រាបគ្រឿងញៀន ត្រូវបានសមត្ថកិច្ចថៃចាប់ចំនួន៨លើក,ពលរដ្ឋខ្មែរធ្វើអត្តឃាតខ្លួនឯងចំនួន៥លើកស្លាប់៨នាក់,ចាប់ជនសង្ស័យ៥នាក់ ពលរដ្ឋកម្ពុជាជួបគ្រោះថ្នាក់ចរាចរណ៍ចំនួន៣៦លើក ស្លាប់២៤នាក់ រងរបួស២៥នាក់ ពលរដ្ឋបានស្លាប់ដោយសារជំងឺក្នុងទឹកដីថៃចំនួន៧៩នាក់ ។
លោកឧត្តមសេនីយ៍ទោ ពេជ្រ វណ្ណា បញ្ជាក់ថា៖ប្រជាពលរដ្ឋខ្មែរដែលធ្វើចំណាកស្រុកទៅប្រទេសថៃ ទាំងស្របច្បាប់និងមិនស្របច្បាប់តែងជួបគ្រោះថ្នាក់ជាយថាហេតុញឹកញ៉ាប់ ខ្លះត្រូវបានចាប់ខ្លួនដាក់ពន្ធនាគារ ខ្លះបញ្ជូនឲ្យត្រឡប់មកវិញហើយខ្លះទៀតត្រូវបានសមត្ថកិច្ចបាញ់សម្លាប់។
ជាមួយគ្នានេះដែរ លោកឧត្តមសេនីយ៍ទោ ពេជ្រ វណ្ណា នាយករងទីចាត់ការ ការងារព្រំដែនអគ្គបញ្ជាការដ្ឋាននិងជាប្រធានការិយាល័យ ទំនាក់ទំនងព្រំដែនកម្ពុជា-ថៃបានបញ្ចាក់ប្រាប់ឲ្យមន្ត្រីនៃការិយាល័យទំនាក់ទំនងព្រំដែនកម្ពុជា-ថៃ ទាំងអស់ថា៖ត្រូវបន្តខិតខំបន្ថែមទៀតក្នុងការរឹតចំណងទំនាក់ទំនងល្អជាមួយប្រទេសជិតខាងជាប់ព្រំដែន ដើម្បីបង្កើនភាពងាយស្រួលក្នុងការជួយអន្តរាគមន៍ដល់ប្រជាពលខ្មែរដែលមានបញ្ហាក្នុងទឹកដីប្រទេសគេជាពិសេសនោះគ្រប់មន្ត្រីដែលឈរជើងតាមច្រកព្រំដែនត្រូវគ្រប់គ្រងឲ្យបាននូវរាល់ការចេញចូលរបស់ប្រជាពលរដ្ឋខ្មែរទៅក្នុងទឹកដីថៃនិងពលរដ្ឋថៃចូលមកកម្ពុជា៕
