កែប ៖ ទិវាអន្តរជាតិប្រយុទ្ធប្រឆាំងគ្រឿងញៀន ២៦មិថុនា២០១៧ ត្រូវបានប្រារព្វឡើង នៅព្រឹកថ្ងៃទី១៩ខែកក្កដា ឆ្នាំ២០១៧ នេះ ក្នុងសាលប្រជុំធំសាលាខេត្តកែប ដោយមានការអញ្ជើញចូលរួមពីសំណាក់ លោកកែន សត្ថា អភិបាលនៃគណៈអភិបាលខេត្តកែប លោកសំ សារីន ប្រធានក្រុមប្រឹក្សាខេត្ត ព្រមទាំងលោក លោកស្រីជាអភិបាលរង ប្រធាន អនុប្រធាន គ្រប់មន្ទីរ អង្គភាពពាក់ព័ន្ធនានាទូទាំងខេត្ត។
ក្នុងឱកាសនោះលោក កែន សត្ថា អភិបាលខេត្តកែប បានអានសារលិខិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានន័យទាំងស្រុងថា ថ្ងៃនេះព្រះរាជាណាចក្រកម្ពុជា ក៏ដូចជាបណ្តាប្រទេសដទៃទៀតលើសកលលោក បានរៀបចំប្រារព្វទិវាអន្តរជាតិប្រយុទ្ធប្រឆាំងគ្រឿងញៀន ក្រោមប្រធានបទ “ត្រូវស្តាប់កូនចៅ និងយុវជន គឺជាជំហានដំបូងដើម្បីជួយពួកគេឲ្យលូតលាស់ប្រកបដោយសុខភាព និងសុវត្ថិភាព” ក្នុងគោលបំណងពញ្ញាក់ស្មារតី និងដាស់តឿន មាតាបិតា និងអាណាព្យាបាលឲ្យយកចិត្តទុកដាក់ ថែទាំ និងស្វែងយល់ពីទំនាក់ទំនង និងតម្រូវការរបស់កូនចៅ ដើម្បីដោះស្រាយនិងជួយណែនាំឲ្យពួកគេអាចជៀសផុតពីបញ្ហាអវិជ្ជមានផ្សេងៗនៅក្នុងសង្គម ពិសេសបញ្ហាគ្រឿងញៀន ដែលអាចកើតមានឡើងក្នុងដំណាក់កាលនៃការវិវឌ្ឍន៍លូតលាស់របស់ពួកគេ។ក្នុងន័យនេះដើម្បីញាំុងឲ្យការប្រារព្វពិធីអបអរសាទរទិវាអន្តរជាតិប្រយុទ្ធប្រឆាំងគ្រឿងញៀននៅកម្ពុជាក្នុងឆ្នាំ២០១៧នេះ កាន់តែមានអត្ថន័យ និងឆ្លើយតបទូលំទូលាយទៅនឹងខ្លឹមសារប្រធានបទរបស់អង្គការសហប្រជាជាតិនៅកម្ពុជា ដោយនៅតែបន្តកំណត់យកពាក្យស្លោក”ចូលរួមទាំងអស់គ្នា ដើម្បីជីវិត និងសហគមន៍យើងគ្មានគ្រឿងញៀន” ក្នុងគោលបំណងបន្តបំផុសនិងជម្រុញឲ្យគ្រប់សមាសភាពនៃសង្គមចាប់អារម្មណ៍ចូលរួម និងគាំទ្រសកម្មថែមទៀត ក្នុងការងារប្រយុទ្ធប្រឆាំងគ្រឿងញៀន។
តាមរយៈការអនុវត្តគោលនយោបាយភូមិឃុំមានសុវត្ថិភាព ផែនការយុទ្ធសាស្ត្រពហុវិស័យរបស់អាជ្ញាធរជាតិប្រយុទ្ធប្រឆាំងគ្រឿងញៀន បទបញ្ជាលេខ ០១ ស្តីពីវិធានការពង្រឹងការងារត្រួតពិនិត្យគ្រឿងញៀន ពិសេសផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី១ ដែលរាជរដ្ឋាភិបាលបានដាក់ចេញកាលពីដើមឆ្នាំ២០១៧កន្លងទៅនេះ។
ជាមួយនឹងអត្ថន័យខាងលើ លោកអភិបាលខេត្ត ក៏បានបញ្ជាក់ថា បញ្ងាគ្រឿងញៀន គឺជាបញ្ហាមួយដ៏ស្មុគស្មាញបង្កឲ្យមានអសន្តិសុខក្នុងសង្គម ហើយរហូតមកដល់ពេលនេះនៅតែបន្តកើតមានឡើងស្ទើគ្រប់ទិសទីក្នុងពិភពលោក ព្រមទាំងបាននិងកំពុងរងនូវផលប៉ះពាល់យ៉ាងច្រើនទៅលើសុខភាព និងជីវភាពរស់នៅរបស់ប្រជាពលរដ្ឋ ក៏ដូចជាលើផ្នែកសន្តិសុខ សណ្តាប់ធ្នាប់សាធារណៈ និងការអភិវឌ្ឍសង្គម។ដូច្នេះក្នុងនាមជាថ្នាក់ដឹកនាំខេត្ត លោកសូមផ្តែរផ្តាំដល់បងប្អូនប្រជាពលរដ្ឋ ពិសេសយុវជន យុវតី សូមជៀសឲ្យឆ្ងាយពីគ្រឿងញៀន ៕
ណារិទ្ធ
