កែប ៖ ប្រជាពលរដ្ឋក្នុងភូមិសាស្ត្រខេត្តកែប ដែលរងគ្រោះដោយសារអំណាចខ្យល់កន្ទ្រាក់ទាំង១២គ្រួសារ ត្រូវបានទទួលអំណោយសង្គ្រោះរបស់សាខាកាកបាទក្រហមខេត្តកែប នៅព្រឹកថ្ងៃទី១៨ខែកក្កដា ឆ្នាំ២០១៧នេះ។
តាមរយៈការចុះសួរសុខទុក្ខនៅព្រឹកនេះ គេឃើញវត្តមានលោក កែន សត្ថា អភិបាលខេត្តកែប និងជាប្រធានគណៈកម្មាធិការសាខាកាកបាទក្រហមខេត្ត ព្រមជាមួយនឹងសហការី បានពាំនាំនូវអំណោយជាថវិកា សម្ភារៈ និងគ្រឿងឧបភោគ បរិភោគមួយចំនួនធំ របស់សម្តេចកិតិ្តព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា តាមរយៈសាខាកាកបាទក្រហមកម្ពុជាខេត្តកែប មកផ្តល់ជូនប្រជាពលរដ្ឋដែលកំពុងរងគ្រោះដោយសារខ្យល់ព្យុះ កន្ទ្រាក់ខូចខាតផ្ទះសំបែង ស្ថិតក្នុងភូមិសាស្ត្រក្រុងកែបនិងស្រុកដំណាក់ចង្អើរ ដែលមានសរុបចំនួន១២គ្រួសារ។អំណោយទាំងនោះ រួមមាន៖ អង្ករ តង់ខ្នាតធំ៥គុណ៦ មី និងថវិកាមួយចំនួន សម្រាប់ផ្តល់ជូនពួកគាត់ខណៈជួបគ្រោះធម្មជាតិ ខ្យល់កន្ទ្រាក់ដួលរលំ របើកដំបូលផ្ទះ កាលពីវេលាម៉ោង១២និង៤០នាទីថ្ងៃត្រង់ ថ្ងៃទី១៧ខែកក្កដា ឆ្នាំ២០១៧ម្សិលមិញ ត្រង់ចំណុចភូមិសាស្ត្រសង្កាត់អូរក្រសារ ក្រុងកែប និងក្នុងភូមិសាស្ត្រឃុំពងទឹក ស្រុកដំណាក់ចង្អើរ។
ក្នុងដំណើរចុះសួរសុខទុក្ខនេះ លោកកែន សត្ថា ប្រធានគណៈកម្មាធិការសាខាកាបាទក្រហមខេត្តកែប ក៏បានលើកឡើងថា ក្នុងអំឡុងពេលប៉ុន្មានថ្ងៃនេះមានភ្លៀង ខ្យល់ជាប់ៗគ្នាមិនឈប់ឡើយ ហើយថែមទាំងមានខ្យល់ព្យុះ កន្ទ្រាក់ស្ទើគ្រប់ទិសទី បណ្តាលឲ្យមានបាក់ ឬបើុងដំបូលនិងខូចខាតលំនៅដ្ឋានរបស់បងប្អូនប្រជាពលរដ្ឋជាច្រើនកន្លែងក្នុងតំបន់មួយចំនួន របស់ខេត្តយើងផងដែរ។លោកបានបញ្ជាក់យ៉ាងដូច្នោះថា អំណោយសង្គ្រោះនេះទោះជាមានកំរិតស្តួចស្តើង ប៉ុន្តែក៏អាចយកមកប្រើប្រាស់ក្នុងគ្រាមានអាសន្ននិងក៏អាចបន្ធូរបន្ថយភាពកង្វះខាតបានមួយគ្រាដែរ។
ជាមួយនេះលោកក៏សូមផ្តាំផ្ញើរដល់ប្រជាពលរដ្ឋក្នុងតំបន់ ពិសេសភូមិសាស្ត្រដែលងាយនឹងប្រឈមបញ្ហាដូចខាងលើ សូមមានការប្រុងប្រយ័ត្នឲ្យបានខ្ពស់ ខ្លាចមានគ្រោះថ្នាក់ដោយប្រការណាមួយ ផ្តើមមកពីគ្រោះធម្មជាតិនេះ។
គួររំឭកថា កាលពីថ្ងៃទី១៧ខែកក្កដា ឆ្នាំ២០១៧វេលាម៉ោង១២និង៤០នាទីថ្ងៃត្រង់ ខណៈមានភ្លៀងលាយឡំជាមួយខ្យល់ព្យុះយ៉ាងកក្រើកនោះ បណ្តាលឲ្យលំនៅដ្ឋានរបស់ប្រជាពលរដ្ឋជាច្រើនខ្នងស្ថិតក្នុងតំបន់ខេត្តកែប ត្រូវការខូចខាតជាច្រើនអន្លើដោយសារកំលាំងខ្យល់កន្ទ្រាក់ ខ្លះបាក់រលំទាំងស្រុង និងមួយចំនួនបើុងដំបូលធ្លាក់រប៉ាត់រប៉ាយ ពេញទីវាល ប៉ុន្តែករណីនេះពុំបណ្តាលឲ្យមានរងគ្រោះថ្នាក់ដល់មនុស្ស សត្វឡើយ។/ណារិទ្ធ
