ខេត្តរតនគិរី ៖ តាមសេចក្តីរាយការណ៍ពីខេត្តរតនគិរីឲ្យដឹងថា៖មេឈ្មួញឈើដ៏ល្បីឈ្មោះបោះសម្លេងជាយូមកហើយនោះមានឈ្មោះហូវ ជី វ៉ៃ និងមន្ត្រីPMម្នាក់ទៀតឈ្មោះណាក់ ក្បាលធំដោយមានការកាងពីក្រោយដោយលោកឧត្តមសេនីយ៍ត្រី គឹម រស្មី មេបញ្ជាការប៉េអឹមខេត្តចាប់ផ្តើមជំនួញដឹកឈើតាមរថយន្តប្រភេទយីឌុបយកទៅលក់នៅស្រុកយួនវិញហើយ ខណៈដែលលេចលឺព័ត៌មានថាសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជាកំពុងសម្រាកព្យាបាលជម្ងឺនៅក្រៅប្រទេស។បើតាមប្រភពព័ត៌មានពីឈ្មួញឈើដូចគ្នាបានឲ្យដឹងថា៖ឈ្មោះហូវ ជីវ៉ៃ និងឈ្មោះ ណាក់ ក្បាលធំ បានប្រមូលឈើពីស្រុកតាវែង ស្រុកអណ្តូងមាស វ៉ឺនសៃ ស្រុកកូនមុំនិងស្រុកលំផាត់ ដឹកជញ្ជូនតាមរថយន្តម៉ាកកូរ៉េ២,៥តោននិងរថយន្តយីឌុបបង្គាប់ក្រោមដំឡូងមីខ្លះមិនដាក់ដំឡូងមីពីលើក៏មាន បានដឹកចេញទៅប្រទេសយួនទាំងយប់ទាំងថ្ងៃដោយរលូន ។
ចំណែកសមត្ថកិច្ចនៅតាមដងផ្លូវជាច្រើនបិទភ្នែកធ្វើមិនឃើញ មិនដឹងមិនឮ ពីជំនួញឈើខុសច្បាប់ដ៏កក្រើករបស់មេឈ្មួញឈើឈ្មោះហូវ ជីវវ៉ៃ និងឈ្មោះ ណាក់ ក្បាលធំនេះទេ។ប្រភពពីប្រជាពលរដ្ឋមួយចំនួនបានឲ្យដឹងថា៖ឈ្មោះ ហូវ ជីវ៉ៃនិងឈ្មោះ ណាក់ ក្បាលធំ នេះបានប្រមូលទិញឈើពីចំណុចអូររវ័គ ស្រុកលំផាត់ស្រុក តាវែងនិងស្រុកអណ្តូងមាសចូលឃ្លាំងឈើស្ថិតនៅម្តុំហាងកាឡាក់ស៊ី ក្រុងបានលុង រួចបន្តទៅប្រទេសយួនទៀតយ៉ាងគឃ្លើននឹងបទបញ្ជារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា។
ចំណែកលោក សៅសុខា មេប៉េអឹមលើផ្ទៃប្រទេស ដែលទទួលកិច្ចបង្ក្រាបបទល្មើសព្រៃឈើនេះក៏មិនអនុវត្តបទបញ្ជារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជាឲ្យបាន១០០ភាគរយដែរ ។
ប្រភពដដែលបន្តថា ៖ ឈ្មួញរកស៊ីដឹកឈើប្រណិតឈ្មោះ ហូវ ជាវ៉ៃ បានប្រមូលឈើគ្រប់តំបន់ក្នុងខេត្តរតនគីរីដឹកចេញទៅប្រទេសយួនបានយ៉ាងរលូន ក៏ដោយសារមានការអនុញាតិពីសាលាខេត្តរតនគិរីនិងអភិបាលខេត្តលោក ថង សាវុធផងដែរ។សូមបញ្ចាក់ដែរថា៖ដំណើរការមុខរបរជួញដូរឈើបំពានច្បាប់នេះ បានប្រព្រឹត្តទៅបានដោយរលូនដោយសារមេឈ្មួញឈើដុះស្លែ ឈ្មោះហូវ ជីវ៉ៃ រូបនេះមានលោក ថង សាវុធ អភិបាលខេត្តរតនគីរី លោកគឹម រស្មី មេប៉េអឹមខេត្ត លោកសៅ សុខាមេបញ្ជាការកងរាជអាវុធហត្ថលើផ្ទៃប្រទេសនិងលោក លីសុផាន នាយផ្នែករដ្ឋបាលព្រៃឈើស្រុកលំផាត់ជាអ្នកឃុបឃិតឲ្យដំណើរការជំនួញឈើខុសច្បាប់នេះឡើងវិញយ៉ាងគឃ្លើននឹងសុខភាពទន់ខ្សោយរបស់ប្រមុខរាជរដ្ឋាភិបាលនៅពេលនេះ ។
ពាក់ពន្ឋ័ទៅនឹងករណីខាងលើនេះដែរ អង្គភាពយើងរង់ចាំការបំភ្លឺពីលោកហូវ ជី វ៉ៃ និងមន្ត្រីPMម្នាក់ទៀតឈ្មោះណាក់ ក្បាលធំ និងលោកគឹម រស្មី មេប៉េអឹមខេត្តរតនគិរីរាល់ម៉ោង ធ្វើការ ៕
