ព្រះសីហនុ៖ ឯកឧត្តម គួច ចំរើន សមាជិកគណកម្មាធិការកណ្តាលគណបក្សប្រជាជនកម្ពុជា និងជាប្រធានគណកម្មាធិការគណបក្សប្រជាជនកម្ពុជាខេត្តព្រះសីហនុ និងឯកឧត្តម សំរិទ្ធ ភុំ អនុប្រធានគណកម្មាធិការគណបក្សប្រជាជនកម្ពុជាខេត្តព្រះសីហនុ និងជាប្រធានគណៈប្រចាំការគណកម្មាធិការគណបក្សប្រជាជនកម្ពុជាខេត្តព្រះសីហនុ នៅព្រឹកថ្ងៃទី៣០ ខែកក្កដា ឆ្នាំ២០២២ បានអញ្ជើញជាអធិបតីក្នុងពិធីប្រកាសទទួលស្គាល់គណកម្មាធិការសាខាគណបក្សប្រជាជនកម្ពុជា ភ្នាក់ងារដឹកជញ្ជូនទេសចរណ៍ជលយានខេត្តព្រះសីហនុ ដោយបានតែងតាំងលោកឧកញ៉ា ទៀ វិចិត្រ ជាប្រធានសាខាគណបក្ស ភ្នាក់ងារដឹកជញ្ជូនទេសចរណ៏ជលយានខេត្តព្រះសីហនុ ចំណុះកម្មាធិការគណបក្សប្រជាជនកម្ពុជាខេត្តព្រះសីហនុ អមដោយអនុប្រធានសាខាចំនួន០៤រូប ចែកចេញជា០៦អនុសាខា ដែលមានសមាជិក សមាជិកា សរុបចំនួនជាងមួយរយនាក់។

លោកឧកញ៉ា ទៀ វិចិត្រ បានគោរពថ្លែងអំណរគុណដល់ឯកឧត្តម គួច ចំរើន និងថ្នាក់ដឹកនាំគណបក្សប្រជាជនកម្ពុជាខេត្តព្រះសីហនុ ដែលគាំទ្រដល់សកម្មភាពសមាគមភ្នាក់ងារដឹកជញ្ជូនទេសចរណ៏ជលយានខេត្តព្រះសីហនុ និងប្រកាសទទួលស្គាល់ឲ្យចូលរួមក្នុងជីវភាពនយោបាយគណបក្សប្រជាជនកម្ពុជា ក្រោមការដឹកនាំដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា ជាមួយនឹងការប្តេជ្ញាចិត្តថា សាខាគណបក្សប្រជាជនកម្ពុជា ភ្នាក់ងារដឹកជញ្ជូនទេសចរណ៏ជលយានខេត្តព្រះសីហនុ នឹងខិតខំធ្វើការងារឲ្យបានល្អ ស្របតាមគោលនយោបាយរបស់គណបក្សប្រជាជនកម្ពុជា ។

ឯកឧត្តម គួច ចំរើន ក្នុងនាមគណកម្មាធិការគណបក្សប្រជាជនកម្ពុជាខេត្តព្រះសីហនុ មានប្រសាសន៌កោតសរសើរដល់លោកឧកញ៉ា ទៀ វិចិត្រនិងបងប្អូន ក្មួយៗដែលជាសមាជិក សមាជិកា សាខាគណបក្សប្រជាជនកម្ពុជា ភ្នាក់ងារដឹកជញ្ជូនទេសចរណ៏ជលយានខេត្តព្រះសីហនុ សម្រាប់ការស្រឡាញ់ជឿជាក់និងចូលរួមជីវភាពនយោបាយជាមួយគណបក្សប្រជាកម្ពុជា ដែលមានសម្តេចតេជោ ហ៊ុន សែន ជាប្រមុខដឹកនាំគណបក្ស។

ឯកឧត្តម គួច ចំរើន មានប្រសាសន៌សង្កត់ធ្ងន់ថា ក្រោមការដឹកនាំរបស់សម្តេចតេជោ ហ៊ុន សែន បច្ចុប្បន្ននេះប្រទេសជាតិមានសុខសន្តិភាព គ្មានសង្គ្រាមនិងកំពុងមានការអភិវឌ្ឍន៌លើគ្រប់វិសយ័ ដែលធ្វើឲ្យប្រជាពលរដ្ឋច្រើនលើសលប់ក្នុងព្រះរាជាណាចក្រកម្ពុជា គាំទ្រដល់គោលនយោបាយរបស់គណបក្សប្រជាជនកម្ពុជា និងបានបោះឆ្នោតជូនគណបក្សប្រជាជនកម្ពុជាឲ្យដឹនាំប្រទេសគ្រប់អាណត្តិបោះឆ្នោតជាបន្តបន្ទាប់៕