កែប ៖ ការប្រារព្វទិវាលើកទី៥ កែបសំអាតកែប Kep Kep Clean! ត្រូវបានធ្វើឡើងតាមការកំណត់ នាព្រឹកថ្ងៃទី១៥ខែកក្កដា ឆ្នាំ២០១៧នេះហើយ ក្រោមវត្តមានដ៏ខ្ពង់ខ្ពស់ លោកកែន សត្ថា អភិបាលនៃគណៈអភិបាលខេត្តកែប និងកញ្ញា អារ៉ៃ ហីុសាអិ អគ្គនាយិកានៃអង្គការមូលនិធិទឹកចិត្តទាំងបី ព្រមទាំងមានការចូលរួមពីសំណាក់ លោកអ៊ាង សុផល្លែត អនុរដ្ឋលេខាធិការក្រសួងបរិស្ថានផងដែរ។
ការធ្វើទិវាកែបសំអាតកែប Kep Kep Clean!នឹងបានផ្តោតការសំខាន់មកលើកក្តាអនាម័យ បរិស្ថានក្នុងតំបន់ឲ្យក្លាយជាទីតាំងមួយដែលមានភាពស្រស់ស្អាតនិងការទាក់ទាញប្រកបដោយផាសុខភាព។ ក្នុងអត្ថន័យនេះ ក៏បានផ្សារភ្ជាប់លើសក្តានុពលក្នុងវិស័យទេសចរណ៍ដ៏សំខាន់ ដោយកិច្ចការខាងលើក៏ជាសុឆន្ទៈដ៏ល្អប្រសើរសម្រាប់ឲ្យមហាជនទូទៅអនុវត្តឲ្យបានព្រមគ្នា គឺការពារបរិស្ថាន ការរស់នៅស្អាត មានអនាម័យ ប្រកបដោយផាសុខភាព។
ជាមួយនេះមនុស្សគ្រប់វ័យ ពិសេសយុវជន យុវនារី គ្រប់មជ្ឈដ្ឋានក៏បានយកចិត្តទុកដាក់ខ្ពស់លើកក្តាអនាម័យ ដោយគេបានយកកាកសំណល់សំរាមផ្សេងៗ ដូចជាកំប៉ុង ដបទឹកសុទ្ធឬកាកសំណល់រឹងមួយចំនួនយកមកកែច្នៃជាសម្ភារៈប្រើប្រាស់និងវត្ថុអនុស្សាវរីយ៍ជាច្រើនមុខ សម្រាប់តាំងលម្អឬលក់តាមស្តង់ក្នុងតំបន់ទេសចរណ៍ទៀតផង។នេះជាការកែច្នៃមួយបែប ហើយក៏ជាប្រសិទ្ធភាពមួយយ៉ាងល្អប្រសើរក្នុងការជួយកាត់បន្ថយការបោះចោលសំរាមនិងកាកសំណល់គ្រប់ប្រភេទ នៅតាមទីសាធារណៈ ហើយក៏ជាការប្រជែងយកស្នាដៃឆ្នើមពីក្រុមយុវជន យុវតីផងដែរ។
ក្នុងទិវានេះ កញ្ញា អារ៉ៃ ហ៊ីសាអិ (អតីតបវរកញ្ញាជប៉ុន) បានលើកឡើងថា បទបង្ហាញបញ្ជាក់ពីទ្រឹស្តីនៃបរិស្ថានពិតជាមានន័យទូលំទូលាយដ៏អស្ចារ្យ ហើយនេះជាការចូលរួមចំណែកដ៏សកម្មដើម្បីរក្សាអនាម័យ ដោយអត្ថន័យខាងលើក៏បានជះឥទ្ធិពលយ៉ាងខ្លាំងដល់មូលនិធិទឹកចិត្តទាំងបីឲ្យកាន់តែមានការគាំទ្រដ៏ពេញទំហឹង។ តាមរយៈការសហការ៤ឆ្នាំជាមួយនឹងរដ្ឋបាលខេត្តកែប ពិតជាដំណើរការល្អ ដោយបានទាក់ទាញអ្នកទេសចរណ៍ឲ្យមកកំសាននៅតំបន់នេះកាន់តែច្រើនឡើងៗពីមួយឆ្នាំទៅមួយឆ្នាំ។
តបតាមប្រធានបទជាច្រើនខាងលើ លោកកែន សត្ថា អភិបាលខេត្តកែប បានមានប្រសាសន៍ថា នេះជាលើកទី៥នៃទិវា កែប សំអាត កែប Kep Kep Clean! ដែលបានធ្វើនៅព្រឹកនេះ ក្នុងគោលបំណងអនុវត្តរាល់ខ្លឹមសារឲ្យមានប្រសិទ្ធភាព ពិសេសក៏សម្រាប់ឲ្យយុវជន យុវតី បានយល់ដឹងអ្វីដែលហៅថាបរិស្ថាន ដូចជាការគ្រប់គ្រងកាកសំណល់ ឬការកែច្នៃកាកសំណល់ផ្សេងៗ និងការកាត់បន្ថយពីការបោះចោលសំរាមឬកាកសំណល់នៅទីសាធារណៈ។លោកបញ្ជាក់យ៉ាងដូច្នោះថា កក្តាដ៏ចាំបាច់សម្រាប់និរន្តរភាពទីក្រុងស្អាត គឺការគ្រប់គ្រងបរិស្ថានឲ្យបានល្អ ហើយបញ្ហាអនាម័យក៏ជាកក្តាគួរឲ្យចាប់អារម្មណ៍បំផុតទាក់ទងនឹងការរស់នៅរបស់យើងផងដែរ។លោកអភិបាលខេត្តបង្ហាញទៀតថា ចាប់តាំងពីមានការបង្កើតទិវាអនាម័យបរិស្ថាន ទេសចរណ៍ មកនោះភ្ញៀវមានការកើនឡើងពីមួយឆ្នាំទៅមួយឆ្នាំ បើគិតជាតួលេខចាប់ពី១.៣០០.០០០នាក់ឡើងទៅក្នុងមួយឆ្នាំ និងអាចកើនឡើងលើសពីនេះទៅទៀត។
ជាចុងក្រោយ គណៈអធិបតីក៏បានជូនប័ណ្ណសរសើរ ដល់ក្រុមយុវជន យុវនារី ដែលមានស្នាដៃក្នុងការកែច្នៃផលិតផលពីកាកសំណល់សំរាម ទៅជាសម្ភារៈប្រើប្រាស់ឬវត្ថុអនុស្សាវរីយ៍ផ្សេងៗប្រកបដោយភាពទាក់ទាញ ៕
ណារិទ្ធ
